అంతర్యామి

మతం-సనాతన ధర్మం
ర్మం అనే మాటకు మతం అన్న అర్థమూ ఉంది. సనాతన ధర్మం చెప్పేదంతా ధర్మమే అయినా, అది మతాలకు భిన్నమైన ధర్మం. మతం కొన్ని విశ్వాసాలకే మనిషిని పరిమితం చేస్తుంది. మతాన్ని మనిషి ఇష్టానుసారంగా మార్చుకోగలడు. సనాతన ధర్మంలో అటువంటిది ఉండదు. మతాలను ఎవరు, ఎందుకోసం, ఏ పరిస్థితుల్లో ఏర్పాటు చేశారో చెప్పడానికి స్పష్టమైన చారిత్రక ఆధారాలుంటాయి. రామానుజులు అన్నట్లు, సనాతన ధర్మం ఆద్యంతాలు లేనిది.

మతానికి, సనాతన ధర్మానికి గల లక్ష్యం ఒకటే. మనిషి తనలోనే ఉన్న, తాను మరిచిన తన దైవత్వాన్ని తానే వెతుక్కొని గుర్తుచేసుకోవడమే అది. మతం అందుకోసం అతడికో ఆధ్యాత్మిక బాట వేస్తుంది. అందులో నడిచి వెళ్లేందుకు సమసిద్ధతలన్నీ సమకూరుస్తుంది. సనాతన ధర్మమూ మనిషికి తానెవరన్న నిజాన్ని చెప్పడానికి నిత్యం శోధించే ఒక తత్వవిచారం. అది చేయగల సామర్థ్యం ఉన్నవారే వేదాంతులు. ­హాజనితం అనిపించినా, వారు చెప్పాలనుకున్నదానికి తర్కాన్ని జోడిస్తూ, కొనసాగించే ఆ ధ్యాస సామాన్యుడి ఆలోచనలకు అతీతమైనది.

పక్షపాతం కనబరచకుండా తత్వవిచారం సాగించే వేదాంతులది కుశాగ్ర బుద్ధి. దురభిమానం, సంకుచితం చొరనీయకుండా వారు తత్వవిచారాన్ని ఒక ప్రత్యేక ప్రక్రియ చేసి, అది విశిష్టమైన జ్ఞానం అనిపిస్తారు. విషయ చర్చల్లో వారెప్పుడూ ఎదుటి వ్యక్తి పరిణతిని, అవగాహన రాహిత్యాన్ని ప్రస్తావించరు. ‘మీరు చెప్పేదీ నిజం కావచ్చు. నేను చెప్పేదీ అదే కావచ్చు. అంతకు మించిన నిజాలు మరెన్నో ఉండవచ్చు’ అని సమాధానపరచే వారి వైఖరితో తత్వవిచారం సజావుగా సాగిపోతుంది. అది సనాతన ధర్మానికి ఓ ప్రత్యేకతనిస్తుంది.

దేవుడు ఉన్నాడన్న నమ్మకమే మతాలన్నింటికీ మూలాధారం. మనిషి, దేవుడు ఒకడేనన్న ప్రాథమిక సత్యాన్ని విశ్వసించినంత కాలం మనుషులకు- ఆయన ఉన్నాడా లేడా అనే వాదనతో పని లేదు. దేవుణ్ని నమ్మిన తరవాత, నమ్మని మనిషిని గురించి పట్టించుకోవాల్సిన అవసరం లేదు. దేవుడు లేడంటున్నవాళ్లూ ఆయన ఎందుకు లేడో తేల్చి చెప్పలేకపోతున్నారు. మనుషులు ఎప్పుడూ గుర్తుంచుకోవాల్సిన విషయం అది.

పద్ధతులు సక్రమంగా పాటిస్తే- ప్రతీ మతం మనిషికో ఉన్నతమైన వ్యక్తిత్వాన్ని, మానసిక శక్తిని, చైతన్యాన్ని ప్రసాదించగలిగేదే. మనిషి తనలోని దైవత్వానికి తాను దగ్గర కాకుండా నిలువరిస్తున్న భౌతిక ప్రలోభాల నుంచి దూరం కావాలి. అలా శాంతిసౌఖ్యాలు పొందడానికి అతడే చేసుకున్న ఏర్పాటు ‘మతం’ అన్నది నిర్వివాదాంశం.

‘అహం’ ముసుగులో అల్లాడుతూ ‘నేను వేరు’ అనే మానసిక భావనతోఉంటాడు మనిషి. కళ్లకు కనిపించేదే జీవితం అనుకునే అతడు సత్యాన్వేషణ దిశలో సాగేందుకు ప్రయత్నాలు చేయించేదే సనాతన ధర్మం. కర్మబంధాలు, విషయ వాసనలు, సంస్కారాల నుంచి ముక్తి అంటే ఏమిటో అది అతడికి వివరిస్తుంది. అంతఃకరణ శుద్ధి చేసుకొని ఆత్మజ్ఞానం పొందగలిగే పద్ధతులన్నింటినీ చెబుతుంది. ‘ఆత్మజ్ఞానంతోనే నామం, రూపం, గుణం లేని ఆ కాలాతీత దివ్యత్వాన్ని చేరుకోగలవు’ అంటుంది. అది కులం, మతం, జాతీయతల ప్రమేయం లేకుండా మనుషులందరినీ ఒకేలా ఆలోచింపజేస్తుంది. దాన్ని లౌకిక వ్యాపారాలతో సంబంధం లేని సైద్ధాంతిక వేదాంతం అనుకోవడం పొరపాటే అవుతుంది.

మతం, సనాతన ధర్మం- రెండూ... మనిషి ఆత్మను చైతన్యపరచి, దాన్ని పరమాత్మతో అనుసంధానించేందుకే ఉన్నాయి. సనాతన ధర్మం నుంచి మనిషికి అలవడే ఆధ్యాత్మిక మతాల గురించి మాట్లాడకున్నా, ఆధ్యాత్మికత లేకుండా మతం అనేది ఉండదు. అందుకే వివేకానందుడు ‘మనిషి తనలోని ఆధ్యాత్మికతను ఎప్పుడూ విస్మరించకూడదు’ అని ప్రబోధించారు!

- జొన్నలగడ్డ నారాయణమూర్తి

మరిన్ని కథనాలు

జిల్లా వార్తలు

దేవ‌తార్చ‌న

రుచులు

© 1999- 2017 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.