Sat, February 06, 2016

Type in English and Give Space to Convert to Telugu

'గులాబీ.. సునామీ''మాట నిలబెట్టుకుంటాం''నౌకా సంరంభం నేడే''కక్షతోనే పార్లమెంటులో రగడ!''వ్యూహాత్మక విజయం''ఆఖర్లో వచ్చారు.. అదరగొట్టారు!''సమర సేనాని''పర్యాటకులకు మణిహారం''ముద్రగడ ఆమరణ దీక్ష''హైదరాబాద్‌లో మరో రెండు పెద్దాసుపత్రులు'
రావల్సిన వాటాకూ మొండిచెయ్యి
కృష్ణపట్నం నుంచి రావాల్సిందే 862 మెగావాట్ల విద్యుత్‌
అక్కడ మొదటి దశకే రూ. 1,050 కోట్ల పెట్టుబడి
ఇవికాక మరో 601 మెగావాట్లనూ ఆంధ్రప్రదేశ్‌ ఇవ్వడం లేదు
ముఖ్యమంత్రి కేసీఆర్‌కు తెలంగాణ జెన్‌కో నివేదిక
ఈనాడు, హైదరాబాద్‌: తెలంగాణలో విద్యుత్‌ కొరత తీవ్రమైన నేపథ్యంలో విద్యుత్‌ వాటాపై ఆంధ్రప్రదేశ్‌తో అమీతుమీ తేల్చుకునేందుకు తెలంగాణ ప్రభుత్వం సిద్ధమవుతోంది. ఈ నేపథ్యంలో అసలు ఏపీలో ఎక్కడెక్కడ కొత్త ప్లాంట్లు నిర్మాణంలో ఉన్నాయి, వాటి నుంచి తెలంగాణకు రావాల్సిన వాటా ఎంత, వాటిలో తెలంగాణ ప్రభుత్వ పెట్టుబడుల విలువ ఎంత, గత ఐదు నెలల్లో ఏపీ ప్రభుత్వం ఎంత మేర వాటా ఇవ్వలేదనే లెక్కలన్నీ ముఖ్యమంత్రి కేసీఆర్‌ తెప్పించుకున్నారు. తెలంగాణ జెన్‌కో ఈ లెక్కలతో తాజా నివేదికను తయారుచేసి సీఎంకు అందజేసినట్లు విశ్వసనీయ సమాచారం. అందులో ముఖ్యాంశాలను ‘ఈనాడు’ సేకరించింది.

నెల్లూరు జిల్లా కృష్ణపట్నం వద్ద రెండు దశల్లో 1600 మెగావాట్ల విద్కుత్కేంద్రాలు నిర్మించాలని ఎనిమిదేళ్ల క్రితం అప్పటి ఉమ్మడి రాష్ట్ర ప్రభుత్వం నిర్ణయించింది. దీనికి సంబంధించిన విద్యుత్‌ కొనుగోలు ఒప్పందం (పీపీఏ)పై 2010 నవంబరు 22న రాష్ట్రంలోని నాలుగు విద్యుత్‌ పంపిణీ సంస్థ(డిస్కం)లు సంతకాలు చేశాయి. ఒక్కో డిస్కమ్‌కు ఎంత శాతం విద్యుత్‌ను కృష్ణపట్నం నుంచి సరఫరా చేయాలో వివరిస్తూ 2007 సెప్టెంబరు 27న రాష్ట్ర విద్యుత్‌ సమన్వయ కమిటీ రాష్ట్ర విద్యుత్‌ కంపెనీకి లేఖ రాసింది. దీని ప్రకారం ఇప్పుడు తెలంగాణ పరిధిలోకి వచ్చిన హైదరాబాద్‌లోని దక్షిణ ప్రాంత విద్యుత్‌ పంపిణీ సంస్థ(ఎస్పీడీసీఎల్‌)కు అత్యధికంగా 46.06 శాతం విద్యుత్‌ను కృష్ణపట్నం నుంచి ఇవ్వాలి. తెలంగాణలోని మరో డిస్కం ఎన్పీడీసీఎల్‌కు మరో 15.87 శాతం వాటా ఇవ్వాలని ఆ లేఖలోనే తెలిపారు. ఈ లెక్కల ప్రకారం ఇప్పుడు కృష్ణపట్నంలో పూర్తయిన మొదటి దశ 800 మెగావాట్ల విద్యుత్కేంద్రం నుంచి 431 మెగావాట్లు, భవిష్యత్తులో నిర్మించే రెండో దశ నుంచి మరో 431 మెగావాట్ల విద్యుత్‌ తెలంగాణకు రావాలని టీజెన్‌కో స్పష్టం చేసింది.

* తొలి దశ 800 మెగావాట్ల విద్యుత్కేంద్రంలో ఇంకా వాణిజ్య ప్రాతిపదికన విద్యుదుత్పత్తి ప్రారంభమవలేదు. కానీ గత ఏప్రిల్‌ నుంచి ఏపీ జెన్‌కో అక్కడ ప్రయోగాత్మకంగా విద్యుదుత్పత్తి చేస్తోంది. కృష్ణపట్నంపై కుదిరిన పీపీఏలోని 2.1 సెక్షన్‌ నిబంధన ప్రకారం ఈ ప్రయోగాత్మక విద్యుత్‌లోనూ తెలంగాణకు వాటా ఇవ్వాలని జులై 3న అప్పటి తెలంగాణ ట్రాన్స్‌కో ఎండీ రిజ్వీ.. ఏపీ జెన్‌కో ఎండీ విజయానంద్‌కు లేఖ రాశారు. అయినా ఏపీ ప్రభుత్వం నుంచి స్పందన లేదని టీజెన్‌కో తెలిపింది.

* తొలుత ప్రతిపాదించిన ప్రకారం కృష్ణపట్నంలో రెండు యూనిట్లు పూర్తయితే ఉత్పత్తయ్యే మొత్తం 1600 మెగావాట్లలో తెలంగాణకే 862 మెగావాట్లను ఏపీ ప్రభుత్వం ఇవ్వాల్సి ఉంటుందని పీపీఏ చెపుతోంది.

* మొదటిదశ 800 మెగావాట్లలో వాటానే తెలంగాణకు ఇవ్వకుండా ఏపీ ప్రభుత్వం ఉద్దేశపూర్వకంగా ఎగవేస్తోందని, భవిష్యత్తులో రెండో విద్కుత్కేంద్రం నుంచి ఏం ఇస్తుందని టీజెన్‌కో వర్గాలు ఆందోళన వ్యక్తం చేస్తున్నాయి.

* కృష్ణపట్నం తొలి దశ 800 మెగావాట్ల విద్యుత్కేంద్రంలో తెలంగాణ ఎస్పీడీసీఎల్‌ తరపున రూ.352 కోట్లు, ఎన్పీడీసీఎల్‌ తరపున రూ.143 కోట్లు, టీజెన్‌కో తరపున రూ.555 కోట్లు కలిపి మొత్తం రూ.1,050 కోట్ల పెట్టుబడి వాటాలున్నాయి.

* రాష్ట్ర విభజన చట్టం ప్రకారం రెండు రాష్ట్రాల్లో అన్ని విద్యుత్కేంద్రాల్లో ఉత్పత్తయ్యే విద్యుత్‌లో తెలంగాణకు 53.89 శాతం చొప్పున వాటా ఇవ్వాలి. ఈ ప్రకారం కృష్ణపట్నం విద్యుత్‌లో తెలంగాణకు 57.45 శాతం వాటా రావాలి. అక్కడ మిగిలిన వాటాదారు ఏపీ జెన్‌కో, ఏపీ డిస్కంలు. ఎక్కువ వాటాలున్న తెలంగాణ జెన్‌కో, తెలంగాణ డిస్కంలకు చెప్పకుండానే కృష్ణపట్నంపై నిర్ణయాలు తీసుకునే అధికారం ఏపీ ప్రభుత్వానికి లేదని టీజెన్‌కో స్పష్టం చేసింది. ప్రయోగాత్మకంగా గత ఆరునెలలుగా కృష్ణపట్నంలో ఉత్పత్తి చేసిన విద్యుత్‌లో 57.45 శాతం వాటా ప్రకారం తెలంగాణకు ఇప్పటికే 220 మెగావాట్లు ఏపీ ప్రభుత్వం ఇవ్వలేదు. దీనిపై ఆంధ్రప్రదేశ్‌ ప్రభుత్వం సమాధానం చెప్పాల్సి ఉంటుంది.

* కృష్ణపట్నం ప్రాజెక్టు కాకుండా సీలేరు జల విద్యుత్కేంద్రం నుంచి 282.36 మెగావాట్లు, అంతర్రాష్ట్ర జల విద్యుత్కేంద్రాలైన మాచ్‌కుండ్‌, టీబీ డ్యామ్‌ నుంచి మరో 63, ఇతర ప్రాజెక్టుల నుంచి మరో 36 మెగావాట్లు తెలంగాణకు ఇవ్వడం లేదు. ఇప్పటివరకూ సేకరించిన లెక్కల ప్రకారం ఏపీ ప్రభుత్వం రోజూ 601.36 మెగావాట్ల విద్యుత్‌ను తెలంగాణకు ఇవ్వకుండా ఎగ్గొడుతోందని టీజెన్‌కో ముఖ్యమంత్రి కేసీఆర్‌కు వివరించింది.

ఇది చాలా అన్యాయం
- డి.ప్రభాకరరావు, సీఎండీ టీజెన్‌కో, ఇన్‌ఛార్జి సీఎండీ టీ ట్రాన్స్‌కో
కృష్ణపట్నం నుంచి తెలంగాణకు విద్యుత్‌ ఇవ్వాల్సి వస్తుందనే ఏపీ ప్రభుత్వం అక్కడ వాణిజ్య విద్యుదుత్పత్తి ప్రారంభించడం లేదు. ఇది చాలా అన్యాయం. అసలు ఎక్కువ వాటాలున్న తెలంగాణ జెన్‌కో, డిస్కంలే అక్కడ నిర్ణయాలు తీసుకోవాలి. ఏపీ ప్రభుత్వం మా వాటా విద్యుత్‌ మాకు ఇవ్వకపోవడం వల్ల తెలంగాణ ప్రభుత్వం ఐదు నెలల్లో రూ.350 కోట్లు ఖర్చుపెట్టి విద్యుత్‌ను కొనాల్సి వచ్చింది. తెలంగాణ రాష్ట్రానికి రావాల్సిన న్యాయమైన వాటా కోసం పోరాడతాం.

జీన్స్‌ ప్రభ!

కొన్నిరోజులు వాడగానే జీన్స్‌ బిగుతైపోతాయి. అలాగని వాటిని పారేయలేం. ఎందుకంటే చూడ్డానికేమో కొత్తగా ఉంటాయి. అలాంటి జీన్స్‌నే రీసైకిల్‌ చేసి కొత్త ఉత్పత్తులుగా మార్కెట్‌లోకి...

బుల్డోజర్స్‌పై విజయం మాదే: అఖిల్‌

సినీతారల క్రికెట్‌ మ్యాచ్‌లకు అభిమానుల నుంచి విశేష స్పందన లభిస్తోందని తెలుగు వారియర్స్‌ జట్టుకు సారథ్యం వహిస్తున్న యువ కథానాయకుడు అఖిల్‌....

 
 
 
 
 
Copyright © 2014 Ushodaya Enterprises Pvt. Ltd., All Rights Reserved.
For Digital Marketing enquiries contact 9000180611 or Mail :Marketing@eenadu.net