latest breaking telugu news

తాజావార్తలు


సేనాని పిలిచె.. అభిమాని కదిలె..
తిరుపతి వేదికగా మరోసారి పవన్‌ సభ
పార్టీ కార్యకలాపాల విస్తరించాలన్న వ్యూహం, కేంద్ర, రాష్ట్ర ప్రభుత్వాల్లో నెలకొన్న తాజా పరిణామాలు, అభిమాని హత్యోదంతం, కాపు రిజర్వేషన్లపై చర్చ నేపథ్యంలో.. జనసేన పార్టీ అధినేత పవన్‌ కల్యాణ్‌ తిరుపతిలో సభ నిర్వహణకు నిర్ణయం తీసుకోవడం ఆసక్తి రేపుతోంది. అభిమానులకు, జనసేన పార్టీ కార్యకర్తలకు ఎలాంటి దిశానిర్దేశం చేయనున్నారన్న చర్చ మొదలైంది. రెండేళ్ల తరవాత తిరుపతి వేదికగా నిర్వహిస్తున్న ఈ బహిరంగ సభ.. అనూహ్యమే అయినా, అప్పటికప్పుడు ఆయన అభిమాన దళం ఏర్పాట్లలో నిమగ్నమైంది. తిరుపతిలోని తుడా ఇందిరా మైదానంలో శుక్రవారం సాయంత్రం నుంచే సభకు ముమ్మర ఏర్పాట్లు చేస్తున్నారు. అధినేత ఏయే అంశాలపై ప్రసంగించనున్నారు? అన్న ఉత్కంఠ అటు పార్టీ శ్రేణుల్లోనూ, ఇటు రాజకీయ వర్గాల్లోనూ చర్చనీయాంశమైంది.
 తిరుపతి: జనసేన అధినేత పవన్‌ కల్యాణ్‌ రెండేళ్ల తరవాత మరోసారి తిరుపతిలో బహిరంగ సభకు సిద్ధమయ్యారు. 2014 ఎన్నికల సమయాన నాటి భాజపా, తెదేపా అగ్రనేతలు నరేంద్రమోదీ, వెంకయ్యనాయుడు, చంద్రబాబునాయుడితో కలిసి ప్రచారసభలో పాల్గొన్నారు. జిల్లాలోని తిరుపతి, మదనపల్లెలో ఎన్నికల ప్రచారసభలకు హాజరయ్యారు. ఆ తర్వాత పార్టీ కమిటీలు లేకపోయినా.. ఆయన అభిమాన సంఘాలు రాజకీయ కార్యకలాపాలు అడపా దడపా నిర్వహిస్తూ వస్తున్నాయి. ఈ క్రమంలో తన అభిమాని వినోద్‌ రాయల్‌ ఇటీవల కర్ణాటకలో హత్యకు గురి కాగా.. పరామర్శించేందుకు రెండు రోజుల క్రితం తిరుపతికి చేరుకున్న పవన్‌ కల్యాణ్‌.. రెండు రోజులుగా తిరుమలలో బస చేశారు. ఇక్కడే అనూహ్యంగా బహిరంగ సభ నిర్వహించాలన్న నిర్ణయానికి వచ్చినట్లు పార్టీ వర్గాల ద్వారా తెలిసింది. తిరుమల తిరుపతి పర్యటనకు ముందు దీనిపై ఎలాంటి ప్రకటన చేయలేదు. సభ దిశగా సంకేతాలు కూడా ఇవ్వలేదు. శుక్రవారం రోజంతా తిరుమలలో వసతిగృహంలోనే ఉన్న పవన్‌.. తనను చూసేందుకు విచ్చేసిన అభిమానులను కూడా కలవలేదు. జనసేన కోశాధికారి రాఘవయ్య తదితరులు స్థానిక జిల్లా నాయకులు, తితిదే పాలకమండలి సభ్యులు డాక్టర్‌ హరిప్రసాద్‌, కిరణ్‌రాయల్‌, హనీఫ్‌, రియాజ్‌, శంకర్‌గౌడ్‌, మహీధర్‌రెడ్డి, నరసింహా తదితరులు పవన్‌తో సమావేశమై బహిరంగసభ ఏర్పాట్లపై సుదీర్ఘంగా చర్చించారు. అప్పటికప్పుడు అధినేత శ్రేణుల కోసం నిర్వహిస్తోన్న తిరుపతి సభకు తరలిరావాలని జిల్లా సహా అన్ని ప్రాంతాలకు సమాచారం పంపారు. తదనుగుణంగా 15నుంచి 20వేల మంది వరకు వస్తారని పార్టీ వర్గాలు చెబుతున్నాయి. ఇందుకోసం తుడా మైదానాన్ని ఎంపిక చేసుకుని శుక్రవారం రాత్రి నుంచే ఏర్పాట్లు మొదలుపెట్టారు. కార్యకర్తలకు దిశానిర్దేశం చేస్తారని.. తిరుమల తిరుపతికి వచ్చినందున అందరితో మాట్లాడతారని మాత్రమే నాయకులు మీడియాతో చెప్పారు. అయితే.. వివిధ సమస్యలతోబాటు ప్రత్యేక హోదా, రాష్ట్రానికి రావాల్సిన పెండింగ్‌ ప్రాజెక్టులు, కాపుల రిజర్వేషన్‌ తదితర అంశాలనూ ఆయన ప్రస్తావిస్తారని భావిస్తున్నారు. అదే సమయంలో సినీ అభిమానులకూ మార్గదర్శనం చేస్తారనీ సమాచారం. జనసేన భవిష్యత్‌ కార్యక్రమాన్నీ ప్రకటిస్తారనే వూహాగానాలు ప్రచార, సామాజిక మాధ్యమాల్లో జోరుగా ప్రచారంలో ఉన్నాయి.

అభిమానులే అన్నీ తామై..
మరోవైపున హైదరాబాద్‌, తిరుపతికి చెందిన జనసేన ప్రత్యేక బృందాలు ఇందిరా మైదానంలో నిర్వహించనున్న సభ ఏర్పాట్లలో తలమునకలయ్యాయి. బహిరంగసభకు పోలీసులు అనుమతి ఇవ్వడంతో శనివారం సాయంత్రం నాలుగు గంటలకు సభ ప్రారంభం కానుంది. మైదానంలో బ్యారికేడింగ్‌, మీడియా గ్యాలరీ, విచ్చేసిన వారికోసం తాగునీటి వసతి, వేదికను సిద్ధం చేస్తున్నారు. శుక్రవారం రాత్రి పొద్దు పోయే సమయానికి సౌండ్‌సిస్టమ్‌ తదితరాలను సమకూర్చుకున్నారు. పార్టీ నాయకులు, పోలీసులు పలుమార్లు మైదానాన్ని పరిశీలించి వెళ్లారు. ట్రాఫిక్‌కు ఎలాంటి ఇబ్బందులు కలగకుండా అటు తిరుమల బైపాస్‌ మార్గంలో పీఎస్‌ఆర్‌ హోటల్‌ వద్ద, ఇటు నగరపాలక సమీపాన ఉన్న సెంట్రల్‌పార్క్‌ వద్ద ఉన్న మార్గాలను మూసివేయాలని ప్రాథమికంగా నిర్ణయించారు. కేవలం సభకు వచ్చేవారిని మాత్రమే అనుమతిస్తారు. ప్రముఖ సినీ నటుడు కావడంతో తరలివచ్చే అభిమానులను దృష్టిలో పెట్టుకుని ఎక్కడా రద్దీ.. రాకపోకలకు ఆటంకాలు కలగకుండా పోలీసులు చర్యలు ప్రారంభించారు. భద్రతా పరంగా పటిష్టమైన బందోబస్తును ఏర్పాటు చేస్తున్నారు. పవన్‌కల్యాణ్‌ శనివారం సాయంత్రం మూడు గంటలకు తిరుమల నుంచి బయల్దేరి బహిరంగసభకు విచ్చేస్తారు. అక్కడ ప్రసంగించి ఆపై చెన్నై మీదుగా హైదరాబాద్‌ వెళ్లనున్నారు.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు
Property Handling 300x50

దేవ‌తార్చ‌న

రుచులు

© 1999- 2016 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.