‘భద్రత’కే మా ఓటు..!

తాజావార్తలు

‘భద్రత’కే మా ఓటు..!
నిర్ణయాత్మకంగా ‘బాణసంచా’ కార్మికులు
ప్రమాద వేళ అండ కోసం ఎదురుచూపు
విదేశీ సరకు దిగుమతి వద్దని డిమాండ్‌
చెన్నై, న్యూస్‌టుడే
దేశంలో 70 శాతం బాణసంచా తయారయ్యే శివకాశిలో ఓటర్ల మొగ్గు ఎటువైపు ఉంటుందనే విషయం ఇప్పుడు అక్కడ ప్రధానాంశంగా మారింది. ఎందుకంటే బాణసంచా తయారు చేసే కర్మాగారాల్లో దాదాపు 1.75 లక్షల మంది సిబ్బంది వేయబోయే ఓట్లు రేపటి ఎన్నికలలో నిర్ణయాత్మకంగా మారనున్నాయి. ముఖ్యంగా ప్రమాద సమయాల్లో అన్నివిధాలా తమను ఆదుకునే వారికే కార్మికులు మద్దతు తెలిపే అవకాశాలు ఉన్నాయి. చైనా తదితర విదేశీ బాణసంచా దిగుమతిని అడ్డుకుని తమ ఉపాధికి భద్రత కల్పించాలని కూడా వారు కోరుకుంటున్నారు.

శివకాశిలో బాణసంచా కర్మాగారాల్లో పనిచేసే సిబ్బంది అనునిత్యం దినదిన గండంగానే బతుకుతారు. ఏరోజుకారోజు ఎలాంటి ప్రమాదమూ సంభవించకుండా బయటపడితే అదే గొప్ప వరంగా భావిస్తారు. అందుకే తమకు భద్రత కల్పించే వారికే ఓటు వేస్తారు. ప్రతి ఎన్నికల సమయంలోనూ వారు కోరుకునేదీ ఈ అంశమే. ప్రాణాపాయ పరిస్థితులు ఎదురవుతున్నా అనాదిగా పొట్టకూటి కోసం వారు ఈ వృత్తిపైనే ఆధారపడి జీవిస్తున్నారని తమిళనాడు బాణసంచా కార్మికుల సంఘం (సీఐటీయూ) జిల్లా కార్యదర్శి ఎం.మహాలక్ష్మి చెప్పారు. ఇతర ప్రాంతాల నుంచి బాణసంచా దిగుమతిని నిషేధించి తమ ఉద్యోగాలకు భద్రత కల్పించాలని కూడా కార్మికులు ఆకాంక్షిస్తున్నారు.

మారిన సమీకరణాలు
విరుదునగర్‌ జిల్లాలో వ్యవసాయం కలిసిరాక చాలామంది రైతు కటుంబాల వారు బాణసంచా కర్మాగారాల్లో చేరి జీవనం సాగిస్తున్నారు. ఇదివరకు శివకాశి నుంచి మాత్రమే ప్రజలు వచ్చి ఉద్యోగులు, కార్మికులు పనిచేసేవారు. ఇప్పుడు తూత్తుకుడి జిల్లా కోవిల్‌పట్టి, తిరునల్వేలి జిల్లాలోని వసుదేవనల్లూర్‌, శంకరన్‌ కోవిల్‌ నుంచి కూడా ఇక్కడి పనులకు వస్తున్నారు. ప్రధాన కర్మాగారాల నుంచి బస్సులు ఉదయమే వివిధ ప్రాంతాలలో సిబ్బందిని ఎక్కించుకుని, మళ్లీ వారి విధులు ముగిశాక ఇంటికి చేరుస్తుంటాయి. గతంలో ఇక్కడ చాలా మంది సిబ్బంది కాంగ్రెస్‌ పార్టీకే ఓటు వేసేవారు. 1960 నుంచి వారు డీఎంకే పార్టీవైపు మొగ్గు చూపారు. ఆ తర్వాత ఎంజీఆర్‌ నాయకత్వంలోని అన్నాడీఎంకే వైపు మళ్లారు. అన్నాడీఎంకే పార్టీ శివకాశిలో నాలుగు పర్యాయాలు విజయం సాధించింది. 2011 అసెంబ్లీ ఎన్నికల్లో కేటీ రాజేంద్ర బాలాజీ ఇక్కడ గెలుపొందారు. కాలం మారినా ఎంజీఆర్‌ అంటే అభిమానం, రెండాకుల గుర్తంటే నమ్మకం ఇక్కడి ఓటర్లలో చెరిగిపోలేదనే అభిప్రాయం ఉంది. కొన్ని సంవత్సరాలలో బాణసంచా కార్మికులలో వివిధ కులాలవారు వచ్చి చేరుతున్నారు. శివకాశి, తిరుత్తాంగల్‌, సాత్తూరు ప్రాంతాలకు చెందిన పేద దళితులే ఎక్కువగా ఉన్నారు. వీరితోపాటు ఓటర్లలో దేవర్లు, తెలుగు మాట్లాడేవారు కూడా అధిక సంఖ్యలోనే ఉన్నారు. వీసీకే, పుదియ తమిళగం వంటి పార్టీలు కూడా ఇక్కడ జెండాలు పాతడంతో ప్రజా సంక్షేమ కూటమికి కొంత మద్దతు కూడగట్టుకునే అవకాశం లభించింది. దళితులలో కూడా ఇప్పుడు రాజకీయ చైతన్యం వెల్లివిరుస్తోంది. బలమైన రాజకీయ శక్తిగా ఎదగడానికి ఇంకా కొంత వ్యవధి అవసరమవుతుందనే వాదన వినిపిస్తోంది. చాలా మంది కార్మికులు డీఎంకే, అన్నాడీఎంకేలలో ఏదో ఒకదానిని ఎంచుకుంటారని భావిస్తున్నారు. యజమానులు కూడా కార్మికులను కొంత వరకు ప్రభావితం చేయవచ్చనే వాదనలు ఉన్నాయి.

శివకాశి గురించి మరికొంత...
* 2001-2013 మధ్య బాణసంచా కర్మాగారాల్లో 199 ప్రమాదాలు సంభవించాయి. వాటిలో 269 మంది మరణించగా, 233 మంది గాయపడ్డారు.

* తొంభై సంవత్సరాలుగా శివకాశిలో బాణసంచా తయారీ జరుగుతోంది. నానాటికీ ప్రమాదాల సంఖ్య మాత్రం పెరుగుతోంది. భద్రత కల్పించే విషయం ఇక్కడి కార్మికుల నుంచి వచ్చే ప్రధాన డిమాండ్‌గా మారింది.

* పి.అయ్యానాడార్‌, షణ్ముఖ నాడార్‌లు కొల్‌కతాలో బాణసంచా వ్యాపారం గురించి తెలుసుకుని 1923లో శివకాశిలో అగ్గిపెట్టెల తయారీని ప్రారంభించారు. 1960 నాటికి అగ్గిపెట్టెలు, బాణసంచా తయారీ కేంద్రాల సంఖ్య 67కు చేరింది. క్రమంగా అనుబంధ పరిశ్రమలు ఆవిర్భవించాయి. దాదాపు 800 వరకు విస్తరించిన కర్మాగారాల్లో ఇప్పుడు 1.7 లక్షల మంది పనిచేస్తున్నారు.

* అనుబంధ పరిశ్రమలలో 1.5 లక్షల మంది విధులు నిర్వర్తిస్తున్నారు. వీరిలో చాలా మంది ఇళ్లలోనే బాణసంచాకు కావాల్సిన ముడిపదార్థాలు తయారు చేస్తారు.

* 800 కర్మాగారాల వార్షిక ఆదాయం సుమారు రూ. వెయ్యి కోట్లు ఉంటుందని అంచనా.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు

దేవ‌తార్చ‌న

రుచులు

© 1999- 2016 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.