kalanjali_200
Comments
0
Recommend
0
Views
453
మహిళలకు ఆర్థిక సాధికారత అవసరం: సుప్రీం
దిల్లీ: రాజ్యాంగం ప్రకారం స్త్రీ, పురుషులు సమానమే అయినా వాస్తవంలో దానిని సాధించడానికి మహిళలు చాలాదూరం ప్రయాణించాల్సి ఉందని సుప్రీంకోర్టు పేర్కొంది. ఆర్థిక సాధికారతతోనే వారికి నిజమైన సాధికారత లభిస్తుందని వ్యాఖ్యానించింది. ఛత్తీస్‌గడ్‌కు చెందిన మహిళా ఎక్సైజ్‌ అధికారిణి రిచా మిశ్ర- వయోపరిమితి దృష్ట్యా తనకు డీఎస్పీగా పదోన్నతిని నిరాకరించడంపై సుప్రీంకోర్టును ఆశ్రయించారు. దీనిని జస్టిస్‌ ఏకే సిక్రి, జస్టిస్‌ అభయ్‌ ఎం సప్రేలతో కూడిన ధర్మాసనం బుధవారం విచారించింది. మిశ్రకు డీఎస్పీగా పదోన్నతి కల్పించాలని ఆదేశించింది. మధ్యప్రదేశ్‌ సివిల్‌ సర్వీసెస్‌ నిబంధనల ప్రకారం మహిళా అభ్యర్థులకు పదేళ్ల సడలింపు ఉందనీ, దాని ప్రకారం ఆమె అర్హురాలని స్పష్టం చేసింది. లింగపరమైన వివక్షను ఎదుర్కొనే మహిళల్ని భిన్న రంగాల్లో ప్రోత్సహించడానికే ఇలాంటి సడలింపులు ఉన్నాయని గుర్తు చేసింది.

మహిళలు తమకు రాజ్యాంగం కల్పించిన హక్కుల్ని అనుభవించాలంటే, ఆర్థిక సాధికారత అవసరమని ధర్మాసనం చెప్పింది. ‘ఆర్థికాభివృద్ధి-మహిళాభివృద్ధిల మధ్య పరస్పరం సంబంధం ఉంది. ఆరోగ్యం, విద్య, ఆర్జించే అవకాశాలు, హక్కులు, రాజకీయ భాగస్వామ్యం వంటివి మహిళలకు చేరువ కావాలి. మహిళలు తమకు సాయపడే సంక్షేమ పథకాల కోసం ఎదురుచూస్తూ స్తబ్దుగా ఉండే రోజులకు కాలం చెల్లింది. స్త్రీ పురుషులిద్దరి జీవితాల్లోనూ మార్పు తీసుకువచ్చే సామాజిక రూపాంతరీకరణ ప్రక్రియలో వారు క్రియాశీలంగా పాల్గొంటున్నారు. కొంతకాలం క్రితం వరకు మహిళలకు మర్యాద కల్పించడం, వారి సంక్షేమాన్ని చూడడంపైనే దృష్టి ఉండేది. ఇప్పుడు వారి ఆర్థిక సాధికారతపై దృష్టి మళ్లింద’ని ధర్మాసనం 38 పుటల తీర్పులో పేర్కొంది.

Your Rating:
-
Overall Rating:
0