తాటిని తలదన్నేలా!

వేసవికాలంలో మాత్రమే దొరికే తాటిముంజలను ఇష్టపడనివాళ్లు ఉండరు. మృదువుగా ఉండే వీటిని అలా నోట్లో వేసుకోగానే ఇలా కరిగిపోతుంటాయి. మామూలుగా తినడమే కాకుండా వీటితో రకరకాల వంటలూ చేసుకోవచ్చు. అవేమిటంటే...

జ్యూస్‌

కావాల్సినవి: ముంజలు- మూడు, పంచదార- మూడు టేబుల్‌ స్పూన్లు, నిమ్మకాయ- ఒకటి.
తయారీ: ముంజలు, పంచదార, నిమ్మరసం, కాసిన్ని నీళ్లు జ్యూసర్‌లో వేసుకుని జ్యూస్‌ చేయాలి. దీన్ని గ్లాసులో పోసి ఐస్‌ముక్కలు వేస్తే రుచికరమైన జ్యూస్‌ సిద్ధమవుతుంది.

కుర్మా

కావాల్సినవి: తాటిముంజలు- ఆరు, నువ్వులు జీడిపప్పు పేస్టు- మూడు టేబుల్‌స్పూన్లు, కారం- రెండు టేబుల్‌స్పూన్లు, కొత్తిమీర- కొద్దిగా, అల్లంవెల్లుల్లి పేస్టు- రెండు టీస్పూన్లు, జీలకర్ర- టీస్పూన్‌, సన్నగా తరిగిన ఉల్లిపాయ- ఒకటి, తరిగిన పచ్చిమిర్చి- రెండు, ఉప్పు- తగినంత, ముక్కలుగా కోసిన టమాటాలు- రెండు, నూనె- మూడు టేబుల్‌స్పూన్లు, గరంమసాలా- రెండు టీస్పూన్లు, పెరుగు- మూడు టేబుల్‌స్పూన్లు, క్యారెట్‌ తురుము- రెండు టేబుల్‌స్పూన్లు, పసుపు- పావు టీస్పూన్‌.
తయారీ: ముంజలకు ఉప్పు, కారం, పసుపు పట్టించి పక్కన పెట్టుకోవాలి. కడాయిలో నూనె పోసి వేడెక్కాక జీలకర్ర వేయాలి. అది చిటపటలాడాక పచ్చిమిర్చి, ఉల్లిపాయ ముక్కలు వేసి గోధుమ రంగులోకి వచ్చేంత వరకు వేయించాలి. ఇప్పుడు అల్లంవెల్లుల్లి పేస్టు వేసి పచ్చివాసన పోయేంత వరకు వేయించాలి. తర్వాత క్యారెట్‌ తురుము, టమాటా ముక్కలు వేసి కొద్దిగా నీళ్లు పోసి రెండు నిమిషాలపాటు ఉడికించాలి. ఇందులో నువ్వులు, జీడిపప్పు పేస్టు, ఉప్పు, కారం, పసుపు, గరంమసాలా, పెరుగు వేసి కొద్దిగా నీళ్లు పోసి బాగా కలపాలి. ఈ మిశ్రమంలో ముంజలు వేసి అయిదు నిమిషాలపాటు ఉడికించాలి. దించిన తర్వాత కొత్తిమీర తురుముతో అలంకరించాలి. లేత ముంజలను నూనెలో వేయించాల్సిన పనిలేదు. ముదురు ముంజలైతేనే నూనెలో వేయించాలి.

కొబ్బరికూర

కావాల్సినవి: ఒలిచిన ముంజలు- కప్పు, పచ్చికొబ్బరి పేస్టు- అరకప్పు, నువ్వుల పొడి- టేబుల్‌స్పూన్‌, నూనె- రెండు టేబుల్‌స్పూన్లు, పచ్చిమిర్చి పేస్టు- రెండు టీస్పూన్లు, ఉప్పు- తగినంత, తరిగిన ఉల్లిపాయ- ఒకటి, కసూరీమేథి- అర టీస్పూన్‌, అల్లంవెల్లుల్లి పేస్టు- టీస్పూన్‌, గరంమసాలా- టీస్పూన్‌, పసుపు- చిటికెడు, కొత్తిమీర- కొద్దిగా, టమాటా ముక్కలు- అరకప్పు, చింతపండు గుజ్జు- తగినంత.
తయారీ: కడాయిలో నూనె పోసి అది వేడయ్యాక ఉల్లిపాయ ముక్కలు వేసి వేయించాలి. దీంట్లో పసుపు, అల్లంవెల్లుల్లి పేస్టు, గరంమసాలా, కసూరీమేథి, పచ్చిమిర్చి పేస్టు, టమాటా ముక్కలు వేసి కాసేపు వేయించాలి. ఇప్పుడు దీంట్లో కొబ్బరిపేస్టు, నువ్వుల పొడి, ఉప్పు వేసి బాగా కలిపి నీళ్లు పోసి అయిదు నిమిషాలు ఉడికించాలి. తాటి ముంజలను చిన్నముక్కలుగా కోసుకుని ఈ మిశ్రమంలో వేసి, ఆ తరువాత చింతపండు గుజ్జును చేర్చి మరో అయిదు నిమిషాలపాటు ఉడికించి దించేయాలి. చివరగా కొత్తిమీర వేసుకుంటే సరి.

బజ్జీలు

కావాల్సినవి: ముదిరిన తాటి ముంజలు- అయిదు, సెనగపిండి- 200 గ్రా., వాము- టీస్పూన్‌, అల్లంవెల్లుల్లి పేస్ట్‌- టేబుల్‌స్పూన్‌, వంటసోడా- చిటికెడు, కారం- టేబుల్‌స్పూన్‌, ఉప్పు- సరిపడా.
తయారీ: తొక్క తీసిన ముంజలను పొడవుగా, సన్నగా కోసుకోవాలి. సెనగపిండిలో ఉప్పు, కారం, వాము, వంటసోడా, అల్లంవెల్లుల్లి పేస్టు అన్నీ వేసి కలిపి పెట్టుకోవాలి. ఇప్పుడు కొద్దిగా నీళ్లు పోసుకుంటూ పిండిని కలపాలి. పొయ్యి వెలిగించి కడాయి పెట్టి నూనె పోసి వేడిచేయాలి. పిండి మరీ పలచగా లేకుండా చూసుకోవాలి. ఇప్పుడు ముంజల ముక్కలను పిండిలో ముంచి బజ్జీలు వేసుకోవాలి. వేయించిన బజ్జీలను వేడివేడిగా తింటే చాలా రుచిగా ఉంటాయి.

పాయసం

కావాల్సినవి: ముంజలు- ఆరు, కాచిన పాలు- రెండు కప్పులు, పంచదార- రెండు టేబుల్‌ స్పూన్లు, యాలకుల పొడి- చిటికెడు.
తయారీ: పాలను తక్కువ మంట మీద సగం అయ్యేంత వరకు మరిగించాలి. అవి చిక్కగా అయిన తర్వాత పంచదార, యాలకుల పొడి వేసి దించేయాలి. చివరగా చిన్నముక్కలుగా చేసుకున్న ముంజలను వేయాలి. దీన్ని రెండు గంటలపాటు ఫ్రిజ్‌లో పెట్టి తింటే చాలా రుచికరంగా ఉంటుంది.

సలాడ్‌

కావాల్సినవి: ఒలిచిన ముంజలు- నాలుగు, గింజలు తీసిన పుచ్చకాయ ముక్కలు- కప్పు, వేయించిన నల్ల నువ్వులు- రెండు టీస్పూన్లు, పుదీనా- గుప్పెడు, మిరియాల పొడి- టీస్పూన్‌, నిమ్మరసం- టీస్పూన్‌.
తయారీ: ముంజలను చిన్న ముక్కలుగా కోసుకోవాలి. వీటిలో పుచ్చకాయ ముక్కలను వేయాలి. ఇందులోనే నిమ్మరసం, వేయించిన నల్ల నువ్వులు, మిరియాల పొడి, రుచి కోసం కాస్త నల్ల ఉప్పు వేసి కలపాలి.

తాటిముంజల ఉపయోగాలు

* తాటిముంజల్లో ఉండే సోడియం, పొటాషియం శరీరంలో ఎలక్ట్రోలైట్‌ సమతుల్యతను కాపాడటంలో సాయపడతాయి. ఎండ, వేడిమి కారణంగా మనం కోల్పోయిన పోషకాలని తిరిగి అందిస్తాయి.
* చర్మం పొడిబారే సమస్య నుంచి కాపాడి నిగారింపుని అందిస్తాయి. మనలోని అలసటను పోగొడతాయి.
* దాహాన్ని తగ్గించి రోజంతా చురుగ్గా పనిచేయడానికి కావాల్సిన శక్తిని అందిస్తాయి.
* వీటిలోని నీరు చలువ చేస్తుంది. ఇది పిల్లలకు, వృద్ధులకు ఎంతో మంచిది.
* ముంజలు జీర్ణక్రియను మెరుగుపరుస్తాయి. ఎసిడిటీ సమస్యను నివారిస్తాయి.
* వాంతులు, వికారంగా ఉన్నప్పుడు వీటిని తీసుకోవడం వల్ల ఉపశమనం లభిస్తుంది.
* వీటిలో నీరు అధికంగా ఉండటం వల్ల తిన్న వెంటనే కడుపు నిండిన భావన కలుగుతుంది. అందువల్ల బరువు తగ్గాలనుకునేవాళ్లు వీటిని తీసుకోవచ్చు.
* వేసవికాలంలో శరీర ఉష్ణోగ్రత పెరిగి చర్మ సంబంధ సమస్యలెన్నో వస్తాయి. అలాంటి సమస్యలను వీటిని తీసుకోవడం ద్వారా నివారించవచ్చు.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App