కురుమూర్తి కబాబ్స్‌!

పక్కాలోకల్‌

జాతరలు, ఉత్సవాల పేరుచెబితే మిఠాయి ప్రసాదాలే గుర్తుకొస్తాయి కదా! పాలమూరుజిల్లా అమ్మాపురం గ్రామంలో జరిగే శ్రీకురుమూర్తి స్వామివారి బ్రహ్మోత్సవాల పేరుచెబితే మాత్రం నోరూరించే మటన్‌ కబాబ్‌లు గుర్తుకొస్తాయి. కొండపై స్వామివారిని దర్శించుకున్న తర్వాత కొండదిగి ఈ కబాబ్‌లు తినికానీ వెళ్లరు చాలామంది. భక్తులేంటి.. కబాబ్‌లు తినడమేంటి అనేగా మీ అనుమానం..

పాలమూరు జిల్లా చింతకుంట మండలం అమ్మాపూర్‌ గ్రామంలో కురుమూర్తిగా వెలసిన వెంకటేశ్వరస్వామికి ప్రతి ఏటా బ్రహ్మోత్సవాలు జరుగుతుంటాయి. వీటిని తిలకించడానికి జనం పెద్దఎత్తున పోటెత్తుతుంటారు. శ్రీవారిని దర్శించుకుని వెళ్తూవెళ్తూ అక్కడ దొరికే ప్రత్యేకమైన మటన్‌ కబాబ్‌లని మాత్రం తినకుండా ఉండలేరు. ఈ కబాబ్‌లు జాతర సమయంలో మాత్రమే లభిస్తాయి. అందుకే ఆ మటన్‌ కబాబ్‌లకు స్థానికంగా కురుమూర్తి కబాబ్‌లనే పేరొచ్చింది. రాష్ట్రం నలుమూలల నుంచి మాంసప్రియులు ఈ కబాబ్‌లని తినడం కోసమే ఈ జాతరకొస్తారంటే ఆశ్చర్యంగా ఉంటుంది. జాతర సమయంలో సాయంత్రం అయ్యిందంటే చాలు మటన్‌ కబాబ్‌ల కోసం జనం క్యూకడుతుంటారు.

కావాల్సినవి: మటన్‌- 200గ్రా, పెరుగు- 100గ్రా, ఉప్పు- తగినంత, పచ్చిమిర్చి పేస్ట్‌- చెంచా, అల్లంవెల్లుల్లి పేస్ట్‌- అరచెంచా, నిమ్మకాయలు- రెండు, సలాడ్‌నూనె- చెంచా, జీలకర్రపొడి- అరచెంచా, గరంమసాలా- అరచెంచా, ధనియాలపొడి- చెంచా
తయారీ: మటన్‌ని చిన్నముక్కలుగా కోసి ఒక పాత్రలోకి తీసుకోవాలి. పచ్చిమిర్చి, అల్లంవెల్లుల్లి ముద్ద, పెరుగు, నిమ్మరసం, జీలకర్రపొడి, ధనియాలపొడి, గరంమసాలా వేసి బాగా కలపాలి. పచ్చిమిర్చి బదులు కారం కూడా వేసుకోవచ్చు. లేదంటే సగంసగం కూడా వేసుకోవచ్చు. ఇప్పుడు మటన్‌ ముక్కలని ఊసలకి గుచ్చుకుని బొగ్గులపై కాల్చుకుని తింటే రుచిగా ఉంటాయి.

-జ్యోతి వలబోజు చిత్రం: గంజి బాలరాజు, న్యూస్‌టుడే, పాలమూరు

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App