close

ప్రధానాంశాలు

రోగ నిరోధక శక్తే మన బలం..

అలవాట్లలో మార్పు తప్పనిసరంటున్న నిపుణులు

 

కరోనా వైరస్‌కు మరికొన్ని ఆరోగ్య సమస్యలు తోడైతే రోగికి ప్రాణాంతకంగా మారతాయి. కొవిడ్‌ తీవ్రతను పెంచే కొన్ని రకాల సమస్యలను నిపుణులు గుర్తించారు. అలవాట్లలో చిన్నచిన్న మార్పులు చేసుకొంటే తేలిగ్గా ఈ సమస్యలను అధిగమించొచ్చు. రోగ నిరోధక శక్తితోనే కొవిడ్‌ను ఎదుర్కోవాలి కాబట్టి మనం ఆరోగ్యకరమైన అలవాట్లను పెంచుకొనే కొద్దీ ఈ శక్తి బలపడుతుంది. రోగనిరోధక శక్తిని ఎలా పెంచుకోవాలంటే...


మధుమేహాన్ని నియంత్రించాలి

మనుషులకు వచ్చే చాలా ఆరోగ్య సమస్యలకు శరీరంలో చక్కెర స్థాయిలే మూలం. అంతర్జాతీయ మధుమేహ సమాఖ్య లెక్కల ప్రకారం భారత్‌లో 7.7 కోట్ల మంది పెద్దలు మధుమేహంతో బాధపడుతున్నారు. తాజాగా కరోనా వైరస్‌ కారణంగా మరణించిన ప్రతి నలుగురిలో ఒకరికి మధుమేహం సమస్య ఉన్నట్లు గుర్తించారు. చక్కెర వ్యాధి బాధితుల్లో కరోనా వైరస్‌ ముప్పు రెండింతలు అవుతుందని నిపుణులు చెబుతున్నారు. రోగ నిరోధక శక్తిని కూడా అది అచేతనంగా మార్చేస్తుందని ఇంపీరియల్‌ కాలేజ్‌ ఆఫ్‌ లండన్‌కు చెందిన వైద్యనిపుణులు వెల్లడించారు. టైప్‌2 మధుమేహం బారిన పడినట్లు కూడా తెలియని వారు బ్రిటన్‌లోనే దాదాపు 10 లక్షల మంది ఉంటారని అంచనా. ముఖ్యంగా గొంతు ఎండిపోవడం, రాత్రివేళల్లో ఎక్కువసార్లు మూత్రానికి పోవాల్సి రావడం వంటి లక్షణాలు వీరిలో కనిపిస్తాయి. అందుకే 40 ఏళ్లు దాటిన ప్రతిఒక్కరూ రక్తంలో చక్కెర శాతాన్ని పరీక్షించుకోవాలి. బరువు తగ్గించుకోవడం, ఆహారం తీసుకోవడంలో జాగ్రత్తలు పాటించడం వంటివి చేస్తే దీనిని తేలికగా అదుపు చేయొచ్చు.


హృదయం పదిలం

ప్రపంచ ఆరోగ్య సంస్థ లెక్కల ప్రకారం ఏటా 1.7 కోట్ల మంది హృద్రోగాలతో ప్రాణాలు కోల్పోతున్నారు. గుండెజబ్బులు దరిచేరకుండా తగిన జాగ్రత్తలు తీసుకోవాలని, కొలెస్ట్రాల్‌ పెరగకుండా చూసుకోవాలని నిపుణులు సూచిస్తున్నారు. దీనివల్ల కరోనా ముప్పును గణనీయంగా తగ్గించొచ్చని ఇంపీరియల్‌ కాలేజ్‌ ఆఫ్‌ లండన్‌కు చెందిన ప్రొఫెసర్‌ కౌశిక్‌రాయ్‌ తెలిపారు. చాలా మంది హృద్రోగులు రక్తపోటును అదుపులో ఉంచుకొనేందుకు ఏసీఈ ఇన్‌హ్యాబిటర్లను వినియోగించాల్సి ఉంది. కరోనావైరస్‌ ఏసీఈ2కు సోకుతుండటంతో ముప్పు పెరిగిపోతుందని ఆందోళన చెందారు. కానీ, చాలా పరిశోధనల్లో దీనిని బలపరిచే ఆధారాలు లభించలేదు. హృద్రోగులు ఏసీఈ ఇన్‌హ్యాబిటర్లను నిర్భయంగా వాడుకోవచ్చని బ్రిటన్‌కు చెందిన ప్రముఖ హృద్రోగ నిపుణురాలు డాక్టర్‌ లౌరా కొర్‌ చెప్పారు. ప్రతి ఇంట్లో రక్తపోటును తనిఖీ చేసుకొనే పరికరం ఉంచుకోవడం మంచిదని నిపుణులు సూచిస్తున్నారు.


ఆరోగ్యానికి ‘పొగ’ పెట్టొద్దు

తొలుత పారిస్‌లోని ఒక ఆసుపత్రిలో చేసిన చిన్నస్థాయి పరిశోధనలో పొగతాగే వారికి కరోనాసోకే ముప్పు తక్కువగా ఉంటుందని తేలింది. దీంతో నికోటిన్‌ ప్యాచ్‌లు వాడి దీనికి చికిత్స చేయొచ్చని భావించారు. కానీ, గత వారం కాలిఫోర్నియా విశ్వవిద్యాలయం 11,590 మంది కొవిడ్‌ రోగులపై పరీక్షలు నిర్వహించింది. పొగతాగే అలవాటు ఉన్న వారిలో కొవిడ్‌ మృతుల సంఖ్య.. పొగతాగని వారి కంటే రెండు రెట్లు ఎక్కువగా ఉన్నట్లు గుర్తించారు. ధూమపానం వల్ల ఊపిరితిత్తులు, శ్వాసనాళం దెబ్బతిని కొవిడ్‌ లక్షణాలు తీవ్రస్థాయిలో కనిపిస్తున్నాయి. దీంతోపాటు ఈ-సిగరెట్లు కూడా భారీ ముప్పును తీసుకొస్తున్నట్లు గుర్తించారు. గతంలో సాధారణ సిగరెట్లు తాగినవారు.. ఈ-సిగరెట్లు ఉపయోగించడం మొదలుపెట్టారు. వారు కూడా మృతుల్లో ఎక్కువగానే ఉన్నారు. వీలైనంత వరకు వైద్యుల సాయంతో ధూమపానం అలవాటును మానేయడం మంచిది.


వ్యాయామం తప్పనిసరి

వ్యాయామాలు నేరుగా కొవిడ్‌పై పనిచేస్తాయని ఇప్పటి వరకు పరిశోధనల్లో వెల్లడి కాలేదు. కానీ, రోగనిరోధక శక్తిని బలోపేతం చేస్తాయి. వారానికి నాలుగుసార్లు రోజుకు 30 నిమిషాలు చొప్పున నడిచే వారికి వైరల్‌ ఇన్ఫెక్షన్లు వచ్చే అవకాశం గణనీయంగా తగ్గిపోతుంది. వ్యాయామం రక్తంలో కొలెస్ట్రాల్‌ స్థాయిని సరైన స్థాయిలో ఉంచుతుంది. దీంతో రక్తపోటు అదుపులో ఉంటుంది. ముఖ్యంగా పొట్ట వద్ద కొవ్వును కరిగిస్తుంది. సాధారణంగా హృద్రోగులు వాయ్యామాలు చేస్తూ చికిత్స తీసుకొంటే వారికి రెండోసారి సమస్య తిరగబెట్టే అవకాశాలు మూడొంతులు తగ్గిపోతున్నాయని పరిశోధనలు చెబుతున్నాయి. వారానికి కనీసం 150 నిమిషాల వ్యాయామం ఉండాలి.  71-90 ఏళ్ల వారు అదనంగా చేసే 30 నిమిషాల వ్యాయామం వారిలో మరణం ముప్పును 17 శాతం తగ్గిస్తుంది. దీనికి బ్రిటన్‌ యువరాజు ప్రిన్స్‌చార్లెస్‌ ఒక ఉదాహరణ. ఆయన సాధారణ వ్యాయామాలు చేస్తూ చికిత్స పొందడంతో వారంలోనే కరోనా నుంచి    బయటపడ్డారు.


కొవ్వును వదిలించుకోండి..

భారత్‌లో 1975 నుంచి ఊబకాయం సమస్య క్రమంగా పెరుగుతూ వస్తున్నట్లు ప్రపంచ ఆరోగ్య సంస్థ లెక్కలు చెబుతున్నాయి. 1975లో 5.3 శాతంగా ఉన్న సమస్య 2016 నాటికి 19.7కు చేరింది. అంటే ప్రతి ఐదుగురిలో ఒకరు ఊబకాయంతో బాధపడుతున్నట్లే. అదనపు బరువు రక్తపోటును పెంచడం, హృద్రోగాలకు దారితీస్తుడంటంతో కొవిడ్‌ ముప్పు వీరికి గణనీయంగా పెరిగిపోతోంది. మంచి కూరగాయలు, పప్పుదినుసులు, పాలిష్‌ చేయని ధాన్యాలు, చేప, ఆలివ్‌ ఆయిల్‌ వంటివి వినియోగిస్తే బరువు అదుపులోకి తీసుకురావచ్చని పోషకాహార నిపుణులు వెల్లడిస్తున్నారు.


ప్రిన్స్‌ చార్లెస్‌ చేసిన వ్యాయామాలు ఇవే..

బ్రిటన్‌ యువరాజు ప్రిన్స్‌ చార్లెస్‌ వయసు 71 సంవత్సరాలు. కరోనా బారిన పడటం ఆయనకు చాలా ప్రమాదకరం. దీంతో ఆయన రోగ నిరోధక శక్తిని పెంపొందించుకొనేందుకు వ్యాయామాలు చేశారు. ఆ వయసులో భారీ కసరత్తులు సాధ్యంకాదు కాబట్టి.. ప్రభావవంతమైన ఐదు ప్రాథమిక వ్యాయామాలను మాత్రమే కొద్దిసేపు చేశారు. వీటిని 5 బీఎక్స్‌ అంటారు. ఇవి శరీరం మొత్తంపై ప్రభావం చూపిస్తాయి. కెనడా వాయుసేనలో ఈ వ్యాయామాలు చేస్తుంటారు.
 

1.స్ట్రెచ్‌: రెండుకాళ్ల మధ్య అడుగు దూరంలో ఒక చోట నిలబడి మెడ నిటారుగా ఉంచి రెండు చేతులను పైకెత్తాలి. ఆ తర్వాత మెల్లగా మెడ వంచుతూ చేతులతో నేలను తాకాలి. ఆ తర్వాత మెల్లగా చేతులను పైకెత్తి యథాస్థానానికి రావాలి. ఇలా రెండు నిమిషాలపాటు చేయాలి.


2. సిట్‌-అప్‌: ఒక చాపపై పడుకొని చేతులను చెవుల వెనుక భాగానికి తాకించాలి. కాళ్లను కొంచెం వంచి చిత్రంలో చూపిన విధంగా ఉంచాలి. ఆ తర్వాత మెల్లగా తలను, భుజాలను పైకి ఎత్తాలి. తిరిగి మళ్లీ యథాస్థానానికి తీసుకెళ్లాలి. ఇలా నిమిషం పాటు చేయాలి.


3. బ్యాక్‌ ఎక్స్‌టెన్షన్‌: ఒక చాపపై బోర్లా పడుకోవాలి. అర చేతులను తొడల కిందకు తీసుకురావాలి. మెల్లగా తలా, ఒక కాలు వెనక్కి లేపాలి. అలానే మరో కాలుతో కూడా చేయాలి. ఒక నిమిషంపాటు వీటిని చేయాలి.


4. ప్రెస్‌-అప్స్‌: నేలపై బోర్లా పడుకొని అరచేతులను భుజాల పక్కకు పెట్టాలి. నెమ్మదిగా చేతులను ముందుకు నెడుతూ శరీరాన్ని పైకి లేపాలి. అవసరమైతే మోకాళ్లు నేలను తాకేలా ఉంచుకోవచ్చు. మళ్లీ శరీరాన్ని యథాస్థితికి తీసుకురావాలి. ఒక నిమిషంపాటు ఇలా చేయాలి.


5. సిజర్‌ జంప్స్‌: దాదాపు ఆరు నిమిషాలపాటు ఉన్నచోటే పరిగెత్తండి. ప్రతి 75 అడుగులు వేసిన తర్వాత 10 సిజర్‌జంప్స్‌ చేయాలి. అంటే ఎడమ చేయి ముందుకు పెట్టినప్పుడు కుడికాలును ముందుకు తీసుకురావాలి. ఆ తర్వాత ఒక సారి ఎగిరి కుడిచేయి, ఎడమకాలు ముందుకు తీసుకురావాలి.

ముఖ్యాంశాలు

జిల్లా వార్తలు

దేవతార్చన


రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.