close

ప్రధానాంశాలు

Facebook Share Twitter Share WhatsApp Share Telegram Share
పందెం కోడి.. కాలు దువ్వింది

జోరుగా కోడిపందేలు, గుండాట, పేకాట
వేలల్లో బరుల ఏర్పాటు.. రూ. కోట్లలో జూదం
పోలీసుల హెచ్చరికలు బేఖాతరు
ప్రజాప్రతినిధుల సమక్షంలోనే నిర్వహణ

ఈనాడు, ఈనాడు డిజిటల్‌, న్యూస్‌టుడే యంత్రాంగం: ప్రతిసారీలాగే పందెం కోడి మళ్లీ గెలిచింది. ఎన్ని బరులు ధ్వంసం చేసినా, ఎన్నెన్ని హెచ్చరికలు చేసినా, ఎంతలా నచ్చజెప్పినా ఉభయ గోదావరి, గుంటూరు జిల్లాల్లో కోడి పందేలు జోరుగా సాగాయి. స్వయంగా ప్రజాప్రతినిధులు సైతం బరుల వద్దకు వచ్చి కోళ్లను దువ్వి జోరును మరింతగా పెంచారు. దీంతో పోలీసులు సైతం మిన్నకుండిపోవాల్సి వచ్చింది. భోగి రోజున కోట్లలో జూదానికి తెరలేచింది. కోడిపందేలకు తోడు గుండాట, పేకాటలనూ నిర్వహించారు. వేల సంఖ్యలో కార్లలో ఔత్సాహికులు ఈ పందేలు చూసేందుకు, ఆడేందుకు వచ్చారు. మామూలు పందేల నుంచి కోసు పందేలు, ముసుగు పందేలనూ ఈసారి పెద్ద ఎత్తున నిర్వహించారు. కనుమ రోజుతో ముగించకుండా.. మరో రెండు రోజులు అదనంగా నిర్వహించేందుకు అనధికారిక అనుమతులు వచ్చేసినట్లు తెలుస్తోంది.

పశ్చిమ గోదావరి జిల్లాలో బుధవారం కోడి పందేలు జోరుగా సాగాయి. దెందులూరు, ఆకివీడు, పెదవేగి, కుక్కునూరు, భీమవరం, అయిభీమవరం, వెంప, పాలకొల్లు, లింగపాలెం, చింతలపూడి, జంగారెడ్డిగూడెం, తాడేపల్లిగూడెం, మొగల్తూరు, పోడూరు, కామవరపుకోట తదితర ప్రాంతాల్లో భారీగా పందేలు వేశారు. బరుల్లో రూ.లక్ష నుంచి రూ.8 లక్షల వరకూ పందెం కడుతున్నారు. కొన్నిచోట్ల రూ.2 లక్షల చొప్పున ముసుగు పందేలు నిర్వహిస్తున్నారు. అన్ని రాజకీయ పార్టీలవారూ ఒక్కటై బరులు పంచుకున్నారు. కొన్ని ప్రాంతాల్లో ఉదయం నుంచే పందేలు మొదలయ్యాయి. తెలంగాణ- ఆంధ్రా సరిహద్దుల్లో భారీగా పందేలకు ఏర్పాట్లు చేశారు. ఈ బరులకు తెలంగాణ నుంచి పెద్ద ఎత్తున ప్రజలు హాజరయ్యారు. కరోనా భయాన్ని పక్కనపెట్టి పెద్ద సంఖ్యలో జనం గుమిగూడారు. ఎక్కడో తప్ప ఎవరూ మాస్క్‌లు ధరించటం లేదు. భౌతికదూరం ఊసేలేదు. శానిటైజర్ల వాడకం అసలు లేదు. తెలంగాణ, తమిళనాడు రాష్ట్రాల నుంచీ పందేలు చూసేందుకు వచ్చారు. రాత్రుళ్లు సైతం పందేలు నిర్వహించేలా విద్యుత్తు దీపాలు, జనరేటర్లు ఏర్పాటు చేసుకున్నారు.

తూర్పుగోదావరి జిల్లాలో పందెం కోళ్లు కయ్యానికి కాళ్లు దువ్వాయి. 500కుపైగా బరులు ఏర్పాటుచేసి పందేలు నిర్వహించారు. వీటికి అనుసంధానంగా పేకాట, గుండాట, ఇతర కార్యక్రమాలు సాగాయి. 144 సెక్షన్‌, 30 పోలీసు యాక్ట్‌ అమల్లో ఉందనీ.. కోడిపందేలు నిర్వహిస్తే చర్యలు తప్పవని పోలీసులు పదేపదే హెచ్చరించారు. అయినా రాజకీయ ఒత్తిళ్లతో రూ.కోట్ల జూదానికి తెరలేచింది. కొత్తపేటలో కోడిపందేలను వైకాపా ఎమ్మెల్యే చిర్ల జగ్గిరెడ్డి ప్రారంభించారు. చాలాచోట్ల అన్ని పార్టీల నేతలూ కనిపించారు. కాకినాడ నగరం, గ్రామీణం, కరప, ఐ.పోలవరం, ముమ్మిడివరం, అల్లవరం, అమలాపురం, ప్రత్తిపాడు, కొత్తపేట, రావులపాలెం, ఆత్రేయపురం, అంబాజీపేట, అయినవిల్లి, కాట్రేనికోన, పిఠాపురం, రామచంద్రపురం, గొల్లప్రోలు తదితర మండలాల్లో విచ్చలవిడిగా కోడిపందేలు జరిగాయి. నిర్వాహకులే భోజన వసతులు ఏర్పాటుచేశారు.  గుంటూరు జిల్లాలోనూ యథేచ్ఛగా కోడి పందేలు జరిగాయి. ప్రజాప్రతినిధులు తరలివచ్చి కోళ్లను బరుల్లోకి వదిలారు. పెదకూరపాడు, వేమూరు, రేపల్లె నియోజకవర్గాల్లో 19 బరులు ఏర్పాటయ్యాయి. వీటిలో కోడి పందేలతో పాటు పేకాట కొనసాగింది. పెదకూరపాడు నియోజకవర్గంలోని బలుసుపాడులో ఏర్పాటుచేసిన బరుల వద్దకు వైకాపా ఎంపీలు లావు శ్రీకృష్ణదేవరాయులు, వల్లభనేని బాలశౌరి, రాజ్యసభ సభ్యుడు ఆళ్ల అయోధ్యరామిరెడ్డితో పాటు పలువురు నాయకులు తరలివచ్చారు. బలుసుపాడు శిబిరం వద్దకు తెలంగాణకు చెందిన తెరాస ఎమ్మెల్యే మాధవరం కృష్ణారావు హాజరై పందేలు చూశారు.

ప్రధానాంశాలు

జిల్లా వార్తలు

దేవతార్చన


మరిన్ని
రుచులు