close

ప్రధానాంశాలు

Facebook Share Twitter Share WhatsApp Share Telegram Share
మంట నూనెలు

లీటరు వేరుసెనగ నూనె రూ.175, పామోలిన్‌ రూ.130పైనే
దిగొచ్చిన ఉల్లి

ఈనాడు, అమరావతి: వంట నూనెల ధరలు భగ్గుమంటూనే ఉన్నాయి. గతేడాది చివరి నుంచి మొదలైన నూనెల మంటలు ఇంకా చల్లారలేదు. రబీలో వేసిన వేరుసెనగ విక్రయాలు పూర్తి కావొస్తున్నాయి. నూనె ధర మాత్రం మండుతూనే ఉంది. కొన్ని ప్రాంతాల్లో లీటరు వేరుసెనగ నూనె రూ.175, పామోలిన్‌ రూ.130పైనే విక్రయిస్తున్నారు. పప్పుల ధరలు కూడా చురుక్కుమనిపిస్తున్నాయి. మధ్యతరగతి వినియోగదారుడిపై భారం మోపుతున్నాయి. కొత్త పంట రాకతో ఉల్లి ధరలు దిగిరావడం కాస్త ఉపశమనాన్నిస్తోంది.
గతేడాదితో పోలిస్తే వంట నూనెల ధరలు 30% నుంచి 65% వరకు పెరిగాయి. లీటరు పొద్దుతిరుగుడు నూనెపై రూ.65, పామోలిన్‌పై ఏకంగా రూ.45 వరకు పెరిగింది. మలేసియా, ఇండోనేసియా తదితర దేశాల నుంచి పామోలిన్‌ దిగుమతి అవుతుంది. దేశీయంగా జరిగే మొత్తం వంటనూనెల వినియోగంలో 70% మేర దిగుమతులపైనే ఆధారపడటంతో ధరలు తగ్గడం లేదని వ్యాపారవర్గాలు పేర్కొంటున్నాయి. పొద్దుతిరుగుడు నూనె ధరలు కూడా 7% పెరిగాయి.

పప్పుధాన్యాలు తక్కువ.. పప్పుల ధర ఎక్కువ

క్వింటా కందుల ధర రూ.6వేలలోపే పలుకుతోంది. అదే కందిపప్పు ధర మాత్రం మార్కెట్లో కిలో రూ.110 నుంచి రూ.120 మధ్య ఉంది. హోల్‌సేల్‌ వ్యాపారులు కిలో రూ.85 చొప్పున విక్రయిస్తున్నారు. ఇది చిల్లర వ్యాపారులకు, అక్కడినుంచి వినియోగదారుడికి అందేసరికి కిలోకు రూ.25 నుంచి రూ.35 వరకు ఎక్కువ ఉంటోంది. ఏడాది కిందటితో పోలిస్తే కందిపప్పు ధర కిలోకు రూ.10 నుంచి రూ.20 వరకు పెరిగింది. మినుములు కిలో రూ.6వేల నుంచి రూ.6,500 మధ్య రైతులనుంచి కొంటుంటే, మార్కెట్‌లో మినపగుళ్లు కిలో రూ.125 నుంచి రూ.135కు విక్రయిస్తున్నారు. సెనగపప్పు ధర కిలో రూ.72 వరకుంది.
దిగొచ్చిన ఉల్లి
ఉత్పత్తి లేకపోవడంతో ఉల్లి ధరలు జనవరి ఆఖరునుంచి ఫిబ్రవరి వరకు కిలో రూ.50కి చేరాయి. మార్చి నుంచి క్రమంగా తగ్గుతున్నాయి. ప్రస్తుతం కొన్ని ప్రాంతాల్లో కిలో రూ.20కి విక్రయిస్తుండగా.. కొన్ని చోట్ల రూ.15కే అమ్ముతున్నారు.
* బెల్లం, పంచదార ధరలు నిలకడగానే ఉన్నాయి. కిలో బెల్లం రూ.55 నుంచి రూ.65 మధ్య ఉంది. పంచదార కిలో రూ.40 నుంచి రూ.43 మధ్య విక్రయిస్తున్నారు.
తగ్గిన చికెన్‌ ధర
గత వారంతో పోలిస్తే కోడి మాంసం ధర కాస్త తగ్గింది. కిలో రూ.250 వరకు విక్రయిస్తున్నారు. స్కిన్‌లెస్‌ అయితే కిలో రూ.280 నుంచి రూ.290 ఉంది. గత వారం ఎండల తీవ్రత ఎక్కువగా ఉండటంతో ధర పెరిగింది. దాణా ధరలు పెరగడంతో రైతులు కోళ్ల ఉత్పత్తి తగ్గించారు. ఎండాకాలం కోడి ఎదుగుదల కూడా తక్కువగా ఉంటుంది. ఈ నేపథ్యంలో ధరలు పెరిగాయి. వాతావరణం కాస్త చల్లబడటంతో కిలోకు రూ.11 వరకు తగ్గిందని వ్యాపారులు వివరిస్తున్నారు. కోడిగుడ్డు ధర రూ.4.25 ఉంది. 10రోజుల్లో 35 పైసలు పెరిగింది.


ప్రధానాంశాలు

జిల్లా వార్తలు

దేవతార్చన


మరిన్ని
రుచులు