కరోనా మూడో దశ ఖాయం

ప్రధానాంశాలు

కరోనా మూడో దశ ఖాయం

రోజుకు గరిష్ఠంగా 1.40 లక్షల కేసులు రావచ్చు
రెండో దశ అంత ప్రభావం ఉండే అవకాశం లేదు
దేశంలో 90 కోట్ల మందిలో యాంటీబాడీలు
డెల్టా కాకుండా మరో వేరియంట్‌ వస్తే కాస్త అధిక ప్రభావం
‘ఈనాడు’తో ఐఐటీ హైదరాబాద్‌ ప్రొఫెసర్‌ విద్యాసాగర్‌

ఈనాడు, సిటీ బ్యూరో ప్రధాన ప్రతినిధి: దేశంలో కరోనా మూడో దశ ప్రభావం ఉంటుందని, అది ఆగస్టు నుంచి అక్టోబర్‌ వరకు కొనసాగుతుందని ఐఐటీ హైదరాబాద్‌ ఆర్టిఫిషియల్‌ ఇంటిలిజెంట్‌, ఎలక్ట్రానిక్‌ విభాగాల ప్రొఫెసర్‌ ఎం.విద్యాసాగర్‌ తెలిపారు. మొదటి, రెండో దశల్లోలా మూడో దశలో వైరస్‌ తీవ్ర ప్రభావం చూపించదని స్పష్టం చేశారు. ఈ దశలో వైరస్‌ తీవ్రంగా ఉంటే గరిష్ఠంగా రోజుకు 1.40 లక్షల కేసులు రావచ్చన్నది తమ అంచనా అని పేర్కొన్నారు. నిర్లక్ష్యం వహిస్తే తీవ్రపరిణామాలను ఎదుర్కోవాల్సి వస్తుందని హెచ్చరించారు. గత కొంతకాలంగా విద్యాసాగర్‌తోపాటు ఐఐటీ కాన్పూర్‌ ప్రొఫెసర్‌ మణీంద్ర అగర్వాల్‌, సైన్యంలో పని చేస్తున్న డాక్టర్‌ మాధురీ కనిట్కర్‌ కలిసి మ్యాథమెటికల్‌ విధానంలో కరోనా మీద విశ్లేషణ చేశారు. వీరు రెండో దశలో రోజుకు గరిష్ఠంగా 3.90 లక్షల కేసులు వస్తాయని అంచనా వేయగా నాలుగు లక్షల కేసులు వచ్చాయి. ఈ నేపథ్యంలో మూడో దశ అవకాశాలపై బుధవారం విద్యాసాగర్‌ ‘ఈనాడు’ ప్రతినిధికి ప్రత్యేకంగా ఇంటర్య్వూ ఇచ్చారు. వివరాలు ఇవీ.

మూడో దశ కరోనా వచ్చే అవకాశం ఉందా?

మా అంచనా ప్రకారం మూడో దశలో కరోనా కేసులు వచ్చే అవకాశం ఉంది. ఆగస్టు నుంచి అక్టోబర్‌ వరకు ఉండే ఈ దశలో రోజుకు గరిష్ఠంగా 60 వేల నుంచి 70 వేల వరకు కేసులు ఉండొచ్చు. మొదటి రెండు దశల్లాగా తీవ్ర ప్రభావం చూపిస్తుందని మా పరిశీలనలో తేలలేదు. డెల్టా కాకుండా కొత్త వేరియంట్‌ వచ్చి ప్రభావం చూపిస్తే మాత్రం ఈ సంఖ్య గరిష్ఠంగా 1.40 లక్షలకు పెరగొచ్చు.

మూడో దశలో కరోనా తీవ్రత ఎందుకు తక్కువగా ఉండే అవకాశం ఉంది?

మా పరిశీలనలో దేశవ్యాప్తంగా 90 కోట్ల మందిలో యాంటీబాడీలు వృద్ధి చెందినట్లు తేలింది. చిన్నారుల్లో కూడా యాంటీబాడీలు ఉన్నాయి. దీనివల్ల ప్రస్తుత డెల్టా వేరియంట్‌తో మూడో దశలో భారీ ఎత్తున వైరస్‌ సోకే అవకాశం లేదు. యాంటీబాడీలు వృద్ధి చెందిన వారికి కరోనా వచ్చినా పెద్దగా ప్రభావం ఉండదు.

కరోనా విస్తరణలో ఆర్‌వాల్యూ ప్రభావం ఎలా ఉండబోతోంది?

ఆర్‌వాల్యూ ఒక శాతం కంటే తక్కువగా ఉంటే కరోనా వృద్ధి పెద్దగా ఉండదు. మొదటి, రెండో దశలో ఆర్‌వాల్యూ శాతం అధికంగా ఉండటం వల్లే కేసులు సంఖ్య పెరిగింది. ప్రస్తుతం ఆర్‌వాల్యూ 1.01 శాతం ఉంది. కేరళలో రోజుకు 24 వేల కేసులు రావడం వల్లే ఈ మేరకు ఉంది. ఆ కేసులు తగ్గితే  ఈ శాతం మరింత తగ్గే అవకాశం ఉంది.

కేరళలో రోజుకు 20 వేల నుంచి 24 వేల కేసులు వస్తున్నాయి.. దీన్ని మూడో దశ అనుకోవచ్చా?

కానేకాదు. మూడో దశ కింద దేశంలో ఎక్కడా కేసులు ఇప్పటి వరకు నమోదు కాలేదు. కేరళలో వస్తున్న కేసులన్నీ రెండో దశ కిందకే వస్తున్నాయి. అక్కడ యాంటీబాడీలు వృద్ధి చెందిన వారి సంఖ్య కొంత తక్కువగా ఉండటం, అక్కడి వారు సరైన జాగ్రత్తలు తీసుకోకపోవడం వల్ల ఈ పరిస్థితి ఏర్పడింది.

రెండు తెలుగు రాష్ట్రాల్లో పరిస్థితి ఎలా ఉండబోతోంది?

ప్రస్తుతం తెలంగాణలో రోజుకు 500 పైబడి కేసులు వస్తుంటే ఏపీలో 1500 వస్తున్నాయి. రెండో దశ ఈ రెండు రాష్ట్రాల్లో చాలా వరకు తగ్గింది. ఈ పరిస్థితిని విశ్లేషిస్తే మూడో దశ తీవ్ర ప్రభావం చూపిస్తుందని భావించడం లేదు. అందువల్ల ఆక్సిజన్‌ కొరత సమస్య ఏర్పడే అవకాశం ఉండదని మా భావన.

మూడోసారి టీకా వేయించుకోవడం అవసరమా?

ఎంతమాత్రం అవసరం లేదు. ఏ కంపెనీ టీకా అయినా రెండు డోసులు వేయించుకున్న అందరిలో యాంటీబాడీలు వృద్ధి చెందుతున్నాయి. ఇలా వచ్చిన యాంటీబాడీలు కనిష్ఠంగా ఎనిమిది నెలలపాటు ఉంటున్నాయి. అందువల్ల మూడో డోసు అవసరం లేదు. ఈ లోపు తాజా పరిశోధనలో అవసరం అనుకుంటే అప్పుడు వేయించుకోవచ్చు గానీ అప్పటి వరకు మూడో డోసు జోలికి వెళ్లకపోవడమే మంచిది.

డెల్టా ప్లస్‌ వేరియంట్‌తో నష్టం అధికంగా ఉంటుందా?

డెల్టా, డెల్టా ప్లస్‌ వేరియంట్లలో స్వల్పంగా మార్పు ఉంది. డెల్టా ప్లస్‌ తీవ్ర ప్రభావం చూపిస్తుందని అనుకోవడం లేదు.


Tags :

ప్రధానాంశాలు

జిల్లా వార్తలు

దేవతార్చన


మరిన్ని