Latest Telugu News | Breaking News Telugu | Telugu News Today | News in Telugu

సంపాదకీయం

Facebook Share Twitter Share Comments Telegram Share
శ్వేత విప్లవంపై కల్తీవేటు

పకడ్బందీ చర్యలతోనే స్వచ్ఛమైన పాలు

సిపిల్లల నుంచి పండు ముదుసలి వరకు ఎందరికో పాలు సమీకృత ఆహారం. పాలలో 88శాతం నీరు, నాలుగు శాతం కొవ్వు, 4.7 శాతం పిండిపదార్థాలు, 3.3శాతం మాంసకృత్తులు ఉంటాయి. ఏ, డీ విటమిన్లు, ఖనిజ లవణాలు, ప్రొటీన్లు పుష్కలం. పిల్లల ఎదుగుదలకు, శక్తికి, దృఢత్వానికి రోజూ పాలు, పాల పదార్థాలు ఇవ్వాలనేది వైద్యుల సూచన. ప్రపంచ పాల ఉత్పత్తిలో భారతదేశం మొదటి స్థానంలో కొనసాగడంలో శ్వేతవిప్లవ పితామహుడు వర్గీస్‌ కురియన్‌ కృషి అమోఘం. ఆయన పుట్టినరోజైన నవంబరు 26ను జాతీయ పాల దినోత్సవంగా జరుపుకొంటున్నాం.

అనారోగ్య కారకం
కల్తీ సమస్య ఈ రంగానికి ప్రబల శత్రువుగా మారింది. ఉత్పత్తి, సేకరణ, రవాణా, సరఫరాల్లోని పలు దశల్లో పాలు కల్తీ అవుతూ, అనారోగ్యానికి కారణమవుతున్నాయి. రైతుల అవగాహన లోపం, కొందరి స్వార్థం వెరసి- పాల కల్తీ నిత్యకృత్యమవుతోంది. కల్తీ పాల ద్వారా చాలామంది అనారోగ్యం బారిన పడుతున్నట్లు భారత ఆహార భద్రత ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ) సర్వేలో వెల్లడి కావడం ఆందోళనకరం. చక్కెర, ఉప్పు, గంజిపొడి, బియ్యపుపిండి, యూరియా, గ్లూకోజ్‌, హైడ్రోజన్‌ పెరాక్సైడ్‌, కాస్టిక్‌ సోడా, వంటసోడా, డిటర్జెంట్లు, మెలమైన్‌ పొడి, నూనె తదితర పదార్థాలతో పాలకల్తీకి పాల్పడుతున్నారు. ఇలాంటి పాలనే చిల్లర వ్యాపారులు వినియోగదారులకు ఎక్కువగా సరఫరా చేస్తున్నారు. కల్తీపాలు తాగితే అజీర్తి సమస్యలు, కడుపునొప్పితోపాటు, మూత్రపిండాలు, కాలేయం, నాడీవ్యవస్థపై ప్రభావం పడుతుంది. రసాయనాలతో కూడిన పాలు దీర్ఘకాలం తీసుకుంటే క్యాన్సర్‌ వచ్చే ప్రమాదం ఉందని వైద్యనిపుణులు హెచ్చరిస్తున్నారు. ఇటీవలి కాలంలో పాలలో ప్రొటీన్‌ శాతం కోసం ప్రమాదకరమైన మెలమైన్‌ రసాయన పొడిని కలుపుతున్నారు. 2008లో చైనాలో మూడు లక్షల మంది పసిపిల్లలు ఈ రసాయన దుష్ప్రభావానికి గురయ్యారు. కొందరు చిన్నారులు మృత్యువాత పడ్డారు. అది ప్రపంచవ్యాప్తంగా కలకలం రేపింది. మహారాష్ట్రలోనూ 2019లో పాలలో మెలమైన్‌ పొడి కలిపినట్లు పరీక్షల్లో తేలింది. కొన్ని డెయిరీలు పాలను పరీక్షించే అత్యాధునిక కిట్లను అన్ని సేకరణ కేంద్రాల్లో ఏర్పాటు చేయకపోవడం సైతం కల్తీకి అవకాశం కల్పిస్తోంది. మేతను రసాయనాలతో పండించడం, క్రిమిసంహారాలు పిచికారీ చేసిన పచ్చిగ్రాసాన్ని పశువులకు వేయడం వంటివీ దుష్ప్రభావాలకు కారణమవుతున్నాయి. పాలు పితికిన తరవాత సేకరణ కేంద్రానికి ఆలస్యంగా తీసుకురావడం, అక్కడి నుంచి శీతలీకరణ కేంద్రానికి తరలించడంలో జాప్యంతో నాణ్యత దెబ్బతింటోంది.

విదేశాల్లో సంఘటిత రంగంలో పాల ఉత్పత్తి జరగడం, ఉత్పత్తిదారుల వద్దే శీతలీకరణ సౌలభ్యం ఉండటంతో కల్తీకి ఆస్కారం తక్కువ. దేశీయంగా వ్యవసాయానికి పశుపోషణ అనుబంధంగా ఉంది. దీనివల్ల పాల ఉత్పత్తి ఇనుమడించినా సేకరణ, రవాణాకు అధిక సమయం, మానవ శ్రమ వెచ్చించక తప్పడం లేదు. పాడి పశువులకు ఆరోగ్యకరమైన మేతలో 18శాతం ప్రొటీను, 0.3 నుంచి 0.8శాతం జింకు ఉండాలి. రోజుకు 30 నుంచి 40గ్రాముల కాల్షియం అందించాలి. పిండిపదార్థాలు, ప్రొటీన్లతో కూడిన మేత వేయాలి. పాడిపశువుల మేత నుంచి వినియోగదారుడికి చేరే వరకు ప్రతిదశలో శుభ్రతకు ప్రాధాన్యం ఇవ్వడం ద్వారా పాల స్వచ్ఛతను కాపాడవచ్చు. గాలికుంటు తదితర వ్యాధులు సోకిన పశువుల నుంచి పాలు పితకకూడదు. పాలు పితికిన వెంటనే సేకరణ కేంద్రానికి, అక్కడి నుంచి శీతలీకరణ కేంద్రానికి వేగంగా తరలించాలి. ఆలస్యమయ్యేకొద్దీ పాలలో రెట్టింపయ్యే బ్యాక్టీరియా- నాణ్యతను దెబ్బతీస్తుంది. నిర్ణీత వ్యవధిలోపు వేడి చేయకపోతే పాలు పాడవుతాయి. డబ్బాల్లో రవాణా చేసే సమయంలో ఎండ నేరుగా పడకుండా జాగ్రత్తపడాలి. కల్తీని పసిగట్టి నివారించడానికి డెయిరీలు 42 రకాల అత్యాధునిక పరీక్షలు నిర్వహిస్తుండటం కొంత ఉపశమనం. మార్కెట్లోకి విడుదల చేసే ముందూ పరీక్షించాలి. ఇలాంటి జాగ్రత్త చర్యలన్నీ పకడ్బందీగా అమలయ్యేలా చూడాలి.

అవగాహన అవసరం
ప్రజారోగ్య భద్రత దృష్ట్యా పాలకల్తీని అరికట్టడం ప్రభుత్వాల గురుతర బాధ్యత. కల్తీకి అడ్డుకట్ట వేయాల్సిన యంత్రాంగాన్ని మౌలిక వసతుల కల్పన వేధిస్తోంది. ఆహార కల్తీ నియంత్రణ చట్టంలో కాలానుగుణంగా మార్పులు తీసుకురావాలి. నిబంధనల్ని కట్టుదిట్టంగా అమలు చేయాలి. క్షేత్రస్థాయిలో తగినంత సిబ్బంది నియామకం, ఆధునిక యంత్ర పరికరాలు అందుబాటులోకి తీసుకురావడం తప్పనిసరి. గృహవిజ్ఞాన కళాశాలలు, సామాజిక విజ్ఞాన కళాశాలలు, విశ్వవిద్యాలయాలు, విస్తరణ విభాగాలు బృందాలుగా ఏర్పడి పాల నాణ్యతను పరీక్షించి ప్రజలకు అవగాహన కల్పించవచ్చు. డెయిరీల నుంచి వినియోగదారులు పాలు, పాల ఉత్పత్తులు కొనుగోలు చేసినప్పుడు నాణ్యత పరీక్షల కోసం ప్రత్యేక కేంద్రాలను ఏర్పాటు చేయాలి. ఈ వ్యవస్థ ద్వారా ర్యాపిడ్‌ కిట్లు అందుబాటులోకి వస్తే పాల నాణ్యతను నిరక్షరాస్యులు సైతం గుర్తించవచ్చు. కల్తీకి పాల్పడేవారిపై ప్రభుత్వ యంత్రాంగం అనునిత్యం నిఘా పెట్టడం, కఠిన చర్యలు తీసుకోవడంతోపాటు, ప్రజలకూ అవగాహన పెరిగినప్పుడే- ఈ సమస్యను అరికట్టడం సాధ్యమవుతుంది.

- పెనికలపాటి రమేష్

 


+

© 1999- 2022 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.