యూపీలో దారుణం

మథుర: సామాజిక మాధ్యమాల్లో చేసే కొన్ని స్నేహాలు ఎంత చేటు చేస్తాయో తెలిపే సంఘటన ఉత్తర్‌ప్రదేశ్‌లోని మథురలో జరిగింది. ఫేస్‌బుక్‌లో పరిచయమైన 21 ఏళ్ల యువతిని.. ఓ యువకుడు కదులుతున్న కారులో అత్యాచారం చేశాడు. బాధిత యువతి ఎస్సై పరీక్షకు హాజరై తిరిగి ఇంటికి వస్తున్న క్రమంలో ఈ ఘటన చోటు చేసుకుంది. బాధిత యువతికి.. హరియాణాలోని పాల్వాల్‌కు చెందిన తేజ్‌వీర్‌ అనే యువకుడు ఫేస్‌బుక్‌ ద్వారా పరిచయమయ్యాడు. తాను ఆగ్రాలో ఎస్సై రాత పరీక్షకు హాజరవుతున్నట్లు యువతి చెప్పింది. దీనిని అదనుగా భావించిన ఆ యువకుడు... మంగళవారం తన డ్రైవర్‌తో కారులో బయలుదేరి ఆమె పరీక్ష రాస్తున్న కేంద్రానికి చేరుకున్నాడు. పరీక్ష రాసి వస్తున్న ఆమెను తన కారులో ఎక్కించుకున్నాడు. తర్వాత ఆమెకు మత్తు మందిచ్చి కదులుతున్న కారులోనే అత్యాచారం చేశాడు. స్పృహ తప్పి పడిపోగానే ఆగ్రా-దిల్లీ హైవే పక్కన వదిలేసి వెళ్లిపోయాడు. అపస్మారక స్థితిలో ఉన్న యువతిని చికిత్స నిమిత్తం ఓ ప్రైవేటు ఆసుపత్రికి తరలించారు. నిందితుడిని పోలీసులు అరెస్ట్‌ చేశారు.