Andhra news: జీతాలు ఇప్పించినందుకు అక్రమ వసూళ్లు

సచివాలయాల ఉద్యోగులకు తప్పని అవినీతి బెడద

ఈనాడు, అమరావతి: ప్రొబేషన్‌ ఖరారయ్యాక పెరిగిన మొదటి జీతం అందుకున్న గ్రామ, వార్డు సచివాలయాల ఉద్యోగులకు అవినీతి బెడద తప్పట్లేదు. బిల్లుల తయారీ నుంచి.. అధికారుల ఆమోదం పొంది బ్యాంకు ఖాతాల్లో జీతాలు పడేవరకూ వివిధ దశల్లో ఒక్కో ఉద్యోగి నుంచి రూ.500-1,000 చొప్పున వసూలు చేస్తున్నారు. గుంటూరు జిల్లాలోని ఒక సచివాలయం ఉద్యోగుల నుంచి రూ.750 చొప్పున క్షేత్రస్థాయి ఉద్యోగి ఒకరు జమ చేయించుకున్నారు. ఏమైందో గానీ సాయంత్రం మళ్లీ డబ్బులు వెనక్కి పంపారు. పల్నాడు, శ్రీకాకుళం, అనంతపురం జిల్లాల్లో వసూళ్లపర్వం కొనసాగింది. 8నెలల ఆలస్యంగా ప్రొబేషన్‌ ఖరారు చేయడంతో ఇప్పటికే నష్టపోయామని ఉద్యోగులు ఆందోళనతో ఉన్నారు. పెరిగిన జీతం చేతికి అందిందో లేదో అప్పుడే మా సంగతేమిటని ఖజానా శాఖ ఉద్యోగుల నుంచి మండల పరిషత్‌ కార్యాలయాల ఉద్యోగుల వరకు వెంటాడుతుండటంతో సచివాలయాల ఉద్యోగులు తీవ్ర ఆవేదన చెందుతున్నారు.

బిల్లులు పెట్టినప్పటి నుంచే.. 

ప్రొబేషన్‌ ఖరారైన గ్రామ, వార్డు సచివాలయాల ఉద్యోగుల జులై నెల జీతాల బిల్లులు అప్‌లోడ్‌ చేసినప్పటి నుంచే వసూళ్ల పర్వం మొదలైంది. అనేక జిల్లాల్లో ఖజానా శాఖ కార్యాలయాల్లో కొందరు ఉద్యోగులు జీతాల ప్రక్రియ పూర్తిచేసేందుకు ఒక్కో ఉద్యోగి నుంచి రూ.500 వరకు వసూలు చేశారు. కొన్ని జిల్లాల్లో జీతాలు చేతికొచ్చాక ఇస్తామని ఉద్యోగులు హామీ ఇచ్చారు. బ్యాంకుఖాతాల్లో జీతాలు జమవ్వడంతో ఇప్పుడు వసూళ్లు ప్రారంభించారు. మండలపరిషత్‌ కార్యాలయాల్లోనూ కొందరు ఉద్యోగులు గ్రామ సచివాలయాల ఉద్యోగుల నుంచి ముక్కుపిండి వసూలు చేస్తున్నారు. కొందరైతే... ‘ప్రొబేషన్‌ ఖరారై జీతాలు పెరిగాయి కదా.. మమ్మల్ని మరచిపోతే తర్వాత ఇబ్బందులుంటాయి’ అంటూ సున్నితంగా హెచ్చరించి సొమ్ము చేసుకుంటున్నారు.

ఉన్నతాధికారులకు ఫిర్యాదులు 

అక్రమ వసూళ్లపై రాష్ట్ర, జిల్లా ఉన్నతాధికారులకు ఉద్యోగులు ఫిర్యాదులు చేస్తున్నారు. రూ.500-రూ.1,000 చొప్పున వసూలుచేస్తే పెరిగిన ఖర్చులతో ఎలా బతకాలని తూర్పుగోదావరి జిల్లాకు చెందిన ఉద్యోగి ఒకరు జిల్లా ఉన్నతాధికారికి వాట్సాప్‌ మెసేజ్‌ పెట్టారని తెలిసింది. అడిగిన డబ్బులివ్వకపోతే మీకే నష్టమని మండలపరిషత్‌ కార్యాలయ పర్యవేక్షకుడు బెదిరిస్తున్నారని నెల్లూరు జిల్లాకు చెందిన కొందరు గ్రామ సచివాలయాల ఉద్యోగులు ఎంపీడీవోకు ఫిర్యాదు చేసినట్లు సమాచారం. అక్రమ వసూళ్లపై చర్యలు తీసుకోవాలని రాష్ట్ర సచివాలయాల శాఖ ఉన్నతాధికారులకు ఫిర్యాదు చేస్తున్నామని సచివాలయాల ఉద్యోగ సంఘం నాయకుడొకరు తెలిపారు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని