16 నుంచి ఉపాధ్యాయులకు ఫేషియల్‌ రికగ్నిషన్‌ హాజరు

నెట్‌వర్క్‌ సమస్యలున్న చోట్ల ఏం చేయాలంటున్న టీచర్లు

ఈనాడు, అమరావతి: ప్రభుత్వ పాఠశాలల్లో ఉపాధ్యాయులు, విద్యార్థులు, బోధనేతర సిబ్బందికి కలిపి  పాఠశాల విద్యాశాఖ ఒకే హాజరు యాప్‌ను రూపొందించింది. పాఠశాల ప్రాంగణంలో మాత్రమే పని చేసే ఈ యాప్‌ను ఈ నెల 16 నుంచి అందుబాటులోకి తీసుకురానున్నారు. ఉపాధ్యాయులు తమ సెల్‌ఫోన్‌లో యాప్‌ డౌన్‌లోడ్‌ చేసుకుని ఉదయం 9 గంటల్లోపు ముఖ ఆధారిత (ఫేషియల్‌ రికగ్నిషన్‌తో) హాజరు వేయాలి. ఆ తర్వాత వేస్తే సెలవుగా పరిగణిస్తుంది. సెలవులు కూడా ఈ యాప్‌లోనే నమోదు చేసుకోవాలి. గ్రామీణ ప్రాంతాల్లో నెట్‌వర్క్‌ సరిగా పనిచేయక హాజరు పడకపోతే సెలవుగా పరిగణిస్తే ఎలా అని ఉపాధ్యాయులు ప్రశ్నిస్తున్నారు. యాప్‌ వినియోగానికి ప్రత్యేకంగా పరికరం ఇవ్వకుండా ఉపాధ్యాయుల సొంత సెల్‌ఫోన్‌, నెట్‌ వినియోగించాలని చెప్పడం ఏమిటని పేర్కొంటున్నారు. ఈ యాప్‌ డౌన్‌లోడ్‌ చేసుకుంటే తమ ఫోన్‌లోని డేటా ఇతరులకు వెళ్లిపోయే ప్రమాదం ఉంటుందనే అనుమానాలు వ్యక్తం చేస్తున్నారు. మరోవైపు విద్యార్థులకు గతంలోలాగే టిక్‌ మార్క్‌ హాజరును ఉదయం 10 గంటల్లోపు నమోదు చేయాలి. అన్ని పథకాలకు ఈ హాజరునే ప్రామాణికంగా తీసుకుంటారు.


మరిన్ని

ap-districts
ts-districts