Kia Carens: 44 వేల కియా కరెన్స్‌ కార్ల రీకాల్‌.. ఎందుకో తెలుసా?

దిల్లీ: ప్రముఖ కార్ల తయారీ సంస్థ కియా ఇండియా (Kia India) తమ తాజా మోడల్‌ కరెన్స్‌ (Carens) కార్లను రీకాల్‌ (Recall) చేస్తున్నట్లు మంగళవారం తెలిపింది. ఎయిర్‌బ్యాగ్‌ నియంత్రణా సాఫ్ట్‌వేర్‌లో ఏమైనా లోపాలున్నాయేమో తనిఖీ చేయడానికే ఈ నిర్ణయం తీసుకున్నట్లు వెల్లడించింది. దాదాపు 44 వేల కార్లను వెనక్కి పిలిపిస్తున్నట్లు తెలిపింది. ఒకవేళ ఏమైనా లోపాన్ని గుర్తిస్తే ఉచితంగా సాఫ్ట్‌వేర్‌ అప్‌డేట్‌ సేవల్ని అందజేస్తామని చెప్పింది. దీనిపై తాము నేరుగా కరెన్స్‌ యజమానులనూ సంప్రదిస్తామని వెల్లడించింది. ఒకవేళ ఏ కారులోనైనా సాఫ్ట్‌వేర్‌ అప్‌డేట్‌ అవసరమని తమ సిబ్బంది నిర్ణయిస్తే సదరు యజమానులు నిరంతరం కియా డీలర్‌షిప్‌ ప్రతినిధులతో సంప్రదింపుల్లో ఉండాలని సూచించింది. తగు సమయాన్ని చూసుకొని కావాల్సిన మార్పులు చేస్తామని పేర్కొంది. 6, 7 సీట్ల సామర్థ్యంతో వస్తున్న కరెన్స్‌ను ఈ  ఏడాది ఫిబ్రవరిలో కియా విడుదల చేసింది.