Indian Railways: ఆరేళ్లలో 3.5 లక్షల ఉద్యోగాలు.. ఈ ఒక్క ఏడాదే 18 వేలు..!

దిల్లీ: ఆరేళ్ల కాలంలో భారత రైల్వే కింద మూడున్నర లక్షల మందికిపైగా ఉద్యోగం పొందారని రైల్వే శాఖ మంత్రి అశ్విని వైష్ణవ్ వెల్లడించారు. రాజ్యసభలో ప్రశ్నోత్తరాల సమయంలో అడిగిన ప్రశ్నకు ఈ సమాధానం ఇచ్చారు. దేశ యువతకు ఉపాధి కల్పించడంలో రైల్వేశాఖ కీలకపాత్ర పోషిస్తోందని, ఈ ఒక్క ఏడాదే 18 వేల ఉద్యోగాలు అందించిందని చెప్పారు. 

‘2014 నుంచి 2022 మధ్య భారత రైల్వే కింద 3,50,204 మందికి ఉద్యోగం లభించింది. ప్రభుత్వ శాఖల్లోని ఖాళీలను భర్తీ చేస్తూ.. ఏడాదిన్నరలో 10 లక్షల ఉద్యోగాలు కల్పించాలని కొద్దినెలల క్రితం ప్రధాని మోదీ కీలక ఆదేశాలు ఇచ్చారు. ఆ విషయంలో రైల్వే కీలక పాత్ర పోషిస్తోంది. దానికింద 1.4 లక్షల ఉద్యోగాలు భర్తీకానున్నాయి. ఈ ఒక్క ఏడాదే 18 వేల మందికి ఉపాధి కల్పించాం. 1.4 లక్షల ఉద్యోగాల భర్తీకి సంబంధించిన ప్రక్రియ ప్రారంభమైంది. త్వరలో పూర్తవుతుంది. కొంతమంది 10 వేలు, 20 వేలకే పెద్ద ప్రకటనలు చేస్తారు. కానీ మేం వాస్తవంలో భర్తీలు చేపడుతున్నాం’ అని మంత్రి వెల్లడించారు. ‘భారత రైల్వే అనేది భారీ స్థాయి సంస్థ. పదవీ విరమణ, రాజీనామాలు, మరణాల కారణంగా ఖాళీలు ఏర్పడుతుంటాయి. వాటి భర్తీ నిరంతరం కొనసాగుతుంది’ అని తెలిపారు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని