Ponniyin Selvan: పాత్రను అర్థం చేసుకోడానికి పుస్తకం మొత్తం చదివాను: త్రిష

హైదరాబాద్‌: అందానికి తగిన అభినయంతో అలరించే తారల్లో త్రిష ఒకరు. టాలీవుడ్‌లోని అగ్రహీరోలందరితో కలిసి నటించింది. తాజాగా మణిరత్నం కలల సినిమా ‘పొన్నియిన్‌ సెల్వన్‌1’లో రాజకుమారి కుందవై పాత్రతో ప్రేక్షకులను పలకరించింది. ఈ పాత్రలో నటించేముందు ఆ రాజకుమారి గురించి తెలుసుకోవడం కోసం కల్కి కృష్ణమూర్తి రాసిన ‘పొన్నియిన్‌ సెల్వన్‌’ నవల మొత్తం చదివినట్లు తెలిపింది. ఇటీవల ఓ ఇంటర్వ్యూలో త్రిష మాట్లాడుతూ..‘‘పొన్నియిన్‌ సెల్వన్‌1 సినిమా షూటింగ్‌ మొదలు పెట్టగానే ప్రపంచం మొత్తం లాక్‌డౌన్‌లోకి వెళ్లిపోయింది. నేను ఆ సమయంలో కల్కి కృష్ణమూర్తి రాసిన పొన్నియిన్‌ సెల్వన్‌ నవల 5 భాగాలను మొత్తం చదివాను. చరిత్రకు సంబంధించిన పుస్తకాలను చదవడం కష్టమని నేను నమ్ముతాను. కానీ ఆ నవల మాత్రం చాలా ఆసక్తిగా ఉంది. ఒక పుస్తకం అయిపోగానే మరొక  పుస్తకం మొదలుపెట్టాను. నాకు ఆశ్చర్యమైన విషయం ఏమిటంటే 5 భాగాలున్న ఈ పుస్తకాన్ని మణిరత్నం 2 భాగాల్లో చూపించడానికి సిద్ధం చేశారు. ఇది నాకు నిజంగా ఊహకు అందడం లేదు’’ అని చెప్పింది. కల్కి కృష్ణమూర్తి నవల ఆధారంగా తెరకెక్కిన ఈ సినిమా సెప్టెంబర్‌ 30న ప్రేక్షకుల ముందుకు వచ్చి అలరిస్తోంది. విక్రమ్‌, కార్తి, జయం రవి, ఐశ్వర్య రాయ్‌, త్రిష పలువురు ప్రముఖులు ఈ సినిమాలో నటించారు.


మరిన్ని