Jammu And Kashmir: గొంతుకోసి.. జైళ్ల శాఖ డీజీ దారుణ హత్య..!

శ్రీనగర్: జమ్మూకశ్మీర్ పోలీసు ఉన్నతాధికారి సోమవారం రాత్రి దారుణ హత్యకు గురయ్యారు.  ఇంట్లో పనిచేసే వ్యక్తి ఆయన గొంతు కోసి హత్య చేసినట్లు పోలీసులు అనుమానిస్తున్నారు. ప్రస్తుతం అక్కడ కేంద్ర హోం మంత్రి అమిత్‌ షా మూడురోజుల పర్యటన జరుగుతుండగా.. ఈ ఘటన వెలుగులోకి వచ్చింది. పోలీసులు వెల్లడించిన వివరాల ప్రకారం..

జమ్మూకశ్మీర్‌ డీజీపీ(జైళ్ల విభాగం) హేమంత్ కుమార్ లోహియా.. 1992 బ్యాచ్‌కు చెందిన ఐపీఎస్‌ ఆఫీసర్. తన ఇంటికి మరమ్మతులు చేయిస్తుండటంతో జమ్ము శివారులోని తన స్నేహితుడి ఇంట్లో ఉంటున్నారు. ఈ క్రమంలో సోమవారం రాత్రి హత్యకు గురయ్యారు. ఆయన గొంతు కోసిన ఆనవాళ్లతో పాటు, ఒంటిపై కాలిన గాయాలున్నాయి. తీవ్ర డిప్రెషన్‌లో ఉన్న ఇంటి సహాయకుడే ఈ ఘాతుకానికి పాల్పడినట్లు పోలీసులు అనుమానిస్తున్నారు.

కెచప్‌ బాటిల్ పగులకొట్టి గొంతుకోసి, తర్వాత ఆ మృతదేహాన్ని మంటల్లో కాల్చేయాలని యత్నించినట్లు ప్రాథమికంగా తెలుస్తోంది. మంటలు రావడం గుర్తించి భద్రతా సిబ్బంది ఇంట్లోకి వెళ్లేందుకు యత్నించారు. అయితే గది లోపలి నుంచి గడియపెట్టి ఉన్నట్లు పోలీసులు మీడియాకు వెల్లడించారు. ప్రస్తుతం మృతదేహాన్ని పోస్టుమార్టం నిమిత్తం ఆసుపత్రికి తరలించారు. 

అయితే ఈ హత్యకు తామే బాధ్యులమంటూ పీపుల్స్‌ యాంటీ ఫాసిస్ట్ ఫోర్స్(పీఏఎఫ్ఎఫ్‌) అనే ఉగ్ర సంస్థ ప్రకటించుకున్నప్పటికీ.. పోలీసులు మాత్రం ఉగ్రకోణాన్ని ప్రస్తావించలేదు.


మరిన్ని

ap-districts
ts-districts

సుఖీభవ

చదువు