Satyendar Jain: జైలు సీసీటీవీ దృశ్యాలు లీక్‌.. కోర్టును ఆశ్రయించిన జైన్‌

దిల్లీ: ప్రస్తుతం తిహాడ్ జైల్లో ఉన్న ఆప్‌ నేత, దిల్లీ మంత్రి సత్యేందర్ జైన్‌కు సంబంధించిన సీసీటీవీ దృశ్యాలు వరుసగా వెలుగులోకి వస్తున్నాయి. మీడియాలో ఈ వీడియోలు చక్కర్లు కొడుతున్నాయి. అక్కడ ఆయన ప్రత్యేక సేవలు పొందుతున్నట్లు వాటిలో కనిపిస్తోందని భాజపా విమర్శలు గుప్పిస్తోంది. అయితే వాటిని ప్రచురించకుండా అడ్డుకోవాలని జైన్‌.. సీబీఐ కోర్టును ఆశ్రయించారు. అంతేకాకుండా అసలు ఈ వీడియోలు ఎలా లీక్‌ అయ్యాయో తెలుసుకునేందుకు విచారణకు ఆదేశించాలని విజ్ఞప్తి చేశారు. 

ఇటీవల జైలులో జైన్ మర్దన చేయించుకుంటున్న వీడియోతో పాటు ఆయన ఆహారానికి సంబంధించిన దృశ్యాలు బయటకు వచ్చాయి. మంత్రికి మర్దన చేస్తున్న వ్యక్తి ఫిజియోథెరపిస్టు కాదు..  ఓ రేపిస్ట్‌ అంటూ జైలు వర్గాలు వెల్లడించాయి. దీంతో ఇవన్నీ భాజపాకు అస్త్రంగా మారాయి. దిల్లీ మున్సిపల్ ఎన్నికలు, గుజరాత్‌ అసెంబ్లీ ఎన్నికల వేళ ఈ వ్యవహారం ఆప్‌ను ఇరకాటంలోకి నెట్టింది. ఆయన వైద్యులు చెప్పిన ప్రకారమే చికిత్స పొందుతున్నారని, తన మత విశ్వాసాల ఆధారంగానే ఆహారం తీసుకుంటున్నారంటూ ఆ విమర్శలను ఆప్‌ తిప్పికొడుతోంది.


మరిన్ని

ap-districts
ts-districts

సుఖీభవ

చదువు