CWG 2022 : చాను మాకు ప్రేరణ

బర్మింగ్‌హామ్‌: పాకిస్థాన్‌ వెయిట్‌లిఫ్టర్‌ దస్తగిర్‌ బట్‌ కామన్వెల్త్‌ క్రీడల్లో స్వర్ణం గెలిచిన వెంటనే అతణ్ని అభినందించిన వారిలో భారత సూపర్‌స్టార్‌ మీరాబాయి చాను కూడా ఉంది. ‘‘ఆమె నన్ను అభినందించినప్పుడు, నా ప్రదర్శనను మెచ్చుకున్నప్పుడు నాకు చాలా గర్వంగా అనిపించింది’’ అని 109+ విభాగంలో పసిడి గెలిచిన అనంతరం బట్‌ వ్యాఖ్యానించాడు. ‘‘మీరాబాయి చాను మాకు ప్రేరణ. దక్షిణాసియా దేశాల వెయిట్‌లిఫ్టర్లు కూడా ఒలింపిక్స్‌లో పతకం గెలవొచ్చని ఆమె నిరూపించింది. ఆమె టోక్యోలో రజతం గెలిచినప్పుడు మేమెంతో గర్వపడ్డాం’’ అని అన్నాడు. 109+ కిలోల కాంస్యం గెలిచిన గుర్‌దీప్‌ సింగ్‌ తన సన్నిహిత మిత్రుల్లో ఒకడని బట్‌ చెప్పాడు. ‘‘గత ఏడెనిమిదేళ్లుగా మేం మంచి స్నేహితులం. విదేశాల్లో కొన్నిసార్లు కలిసి శిక్షణ పొందాం. మేం ఎప్పుడూ మాట్లాడుకుంటుంటాం’’ అని అన్నాడు. 24 ఏళ్ల బట్‌ టోర్నమెంట్లలోఆడేందుకు గతంలో రెండు సార్లు భారత్‌కు వచ్చాడు. ఆ రెండు సార్లు అక్కడి ప్రజలు తననెంతో ఆదరించారని బట్‌ తెలిపాడు. పాక్‌లో కన్నా భారత్‌లోనే తనకు ఎక్కువ అభిమానులు ఉన్నట్టు అనిపిస్తోందని చెప్పాడు.


మరిన్ని

ap-districts
ts-districts