TS HihgCourt: న్యాయవాది హత్య ఘటనపై ప్రభుత్వానికి నోటీసులు

బార్‌ కౌన్సిళ్లను ప్రతివాదులుగా చేర్చిన హైకోర్టు

ఈనాడు, హైదరాబాద్‌: ములుగులో న్యాయవాది మల్లారెడ్డి హత్యకు సంబంధించి పూర్తి వివరాలు సమర్పించాలంటూ ప్రభుత్వానికి సోమవారం హైకోర్టు నోటీసులు జారీ చేసింది. అంతేగాకుండా న్యాయవాదుల రక్షణ చట్టానికి సంబంధించిన అంశం ఉండటంతో బార్‌ కౌన్సిల్‌ ఆఫ్‌ ఇండియాతోపాటు తెలంగాణ రాష్ట్ర బార్‌ కౌన్సిల్‌, కేంద్ర ప్రభుత్వాలను ప్రతివాదులుగా చేర్చింది. ఇందులో ప్రతివాదులైన రాష్ట్ర ప్రభుత్వ ప్రధాన కార్యదర్శి, హోంశాఖ ముఖ్యకార్యదర్శి, డీజీపీ, ములుగు ఎస్పీ, ఎస్‌హెచ్‌వోలకు నోటీసులు జారీ చేసింది. వరంగల్‌ జిల్లా బార్‌ అసోసియేషన్‌కు చెందిన న్యాయవాది మల్లారెడ్డి హత్య సంఘటనను హైకోర్టు సుమోటో ప్రజాప్రయోజన వ్యాజ్యంగా పరిగణనలోకి తీసుకున్న విషయం విదితమే. డాక్టర్లకు రక్షణ చట్టం ఉన్నట్లుగానే న్యాయవాదులకు రక్షణ చట్టం ఉండాలన్న హైకోర్టు బార్‌ అసోసియేషన్‌ అధ్యక్షుడు వి.రఘునాథ్‌ విజ్ఞప్తిపై సోమవారం ప్రధాన న్యాయమూర్తి జస్టిస్‌ ఉజ్జల్‌ భూయాన్‌, జస్టిస్‌ సి.వి.భాస్కర్‌రెడ్డిలతో కూడిన ధర్మాసనం విచారణ చేపట్టింది. వాదనలను విన్న ధర్మాసనం ఈ కేసులో అమికస్‌ క్యూరీలుగా సీనియర్‌ న్యాయవాదులు ఎల్‌.రవిచందర్‌, జి.విద్యాసాగర్‌లను నియమించింది. న్యాయవాదులకు రక్షణ యంత్రాంగం ఉండాలని అభిప్రాయపడింది. కౌంటర్లు దాఖలు చేయాలని ఆదేశిస్తూ విచారణను వాయిదా వేసింది.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని