మైదానం కాదు చెరువే..!

ఓ మైదానంలో పసుపు ఎండబోసినట్టు ఆహ్లాదంగా కనిపిస్తోంది కదూ.. కానీ ఇది ఓ చెరువు. ఆదిలాబాద్‌ జిల్లా తాంసి మండలంలోని వడ్డాడి చెరువు 120 ఎకరాల్లో విస్తరించి ఉండగా అందులో సుమారు 80 ఎకరాలకుపైగా జెయింట్‌ సాల్వినియా అనే మొక్క ఆక్రమించింది. పొలాలకు సాగునీరు, పశువుల దాహార్తి, చేప పిల్లల పెంపకం ఇలా అన్నింటికి ఈ చెరువే ఆధారం కావడంతో గతేడాది రూ.5 లక్షలు ఖర్చుచేసి శుభ్రపరిచినా ఫలితం లేకపోయింది. మళ్లీ పెరిగి ఇలా విస్తరించింది. దీంతో చేపల పెంపకానికి అవరోధంగా మారింది. మరోవైపు చిన్నారులు, పశువులు ఈ చెరువులో దిగితే కనిపించకుండా పోయే ప్రమాదం ఉందంటూ గ్రామస్థులు ఆందోళన వ్యక్తం చేస్తున్నారు. ఈ విషయమై జిల్లా ఉద్యాన అధికారి శ్రీనివాసరెడ్డి మాట్లాడుతూ.. ఈ మొక్క గుర్రపు డెక్క జాతికంటే ప్రమాదకరమైందని, ఇది అరుదుగా కనిపిస్తుందన్నారు. ఇంత ఉద్ధృతి ఎక్కడా కనిపించలేదని, మొదటి దశలోనే నిర్మూలించకపోతే జిల్లాలోని అన్ని చెరువులకు వ్యాప్తి చెందే ప్రమాదం ఉందని చెప్పారు.

- ఈనాడు, ఆదిలాబాద్‌, న్యూస్‌టుడే, తాంసి


మరిన్ని

ap-districts
ts-districts