close

వసుంధర

Facebook Share Twitter Share WhatsApp Share Telegram Share Link Share
రెండు రోజులే..ఎందుకిలా?

మా పాపకు పదమూడేళ్లు. నెలసరి మొదలై రెండేళ్లవుతోంది. అయినా ఇప్పటికీ రెగ్యులర్‌గా రావడం లేదు. అలాగే రెండు రోజులు మాత్రమే రక్తస్రావమవుతోంది. ఎందుకిలా జరుగుతుంది? - ఓ సోదరి
నెలసరి మొదలైన తొలినాళ్లలో, అలాగే ఆగిపోయే చివరి దశలో హార్మోన్ల అసమతుల్యత ఉంటుంది. అందువల్లే ఇలా జరుగుతుంది. రుతుచక్రం చాలా అంశాలపై ఆధారపడుతుంది. మెదడులోని హైపోథాలమస్‌  నుంచి సిగ్నల్స్‌ మొదట పిట్యూటరీ గ్రంథికి, అక్కడి నుంచి అండాశయానికి చేరతాయి. అప్పుడు హార్మోన్లు ఉత్తేజితమై గర్భాశయం మీద  ప్రభావం చూపడంతో  నెలసరి వస్తుంది.  దీన్నే వైద్య పరిభాషలో హైపోథాలమో పిట్యూటరీ ఒవేరియన్‌ యాక్సస్‌ (హెచ్‌పీవో యాక్సస్‌) అంటాం. మనం భావోద్వేగాలకు గురైనప్పుడు ఈ వ్యవస్థలన్నీ ప్రభావితమవుతాయి. మీ పాపకు పదమూడేళ్లని రాశారు. ఈ వయసులో చిన్నారులు తెలియని ఒత్తిడికి గురవుతుంటారు. చదువులు, పెరిగే వయసు, శరీరంలో వస్తున్న మార్పులు (బరువు పెరగడం/తగ్గడం లాంటివి)... వీటన్నింటి వల్ల వారు తమకు తెలియకుండానే ఒత్తిడికి లోనవుతుంటారు.  హెచ్‌పీవో యాక్సస్‌ పరిణతి చెందడానికి రెండు మూడేళ్లయినా పడుతుంది. పదకొండేళ్లకు పీరియడ్స్‌ వచ్చినంత మాత్రాన త్వరగా అది కుదురుకోదు. కాస్త సమయం పడుతుంది. అలాకాకుండా పాపకు తీవ్రరక్తస్రావం, కడుపునొప్పి, రక్తహీనత లాంటి సమస్యలతో బాధపడుతోంటే లేదా పీరియడ్స్‌ రాకుండా  లావవుతోంటే మాత్రం ఆలోచించాలి. అలాంటివేమీ లేనప్పుడు కంగారుపడాల్సిన అవసరం లేదు.
మీరేం చేయాలంటే... పాప ఏ విషయంలో ఒత్తిడికి లోనవుతుందో గమనించి దాన్ని తగ్గించే ప్రయత్నం చేయండి. పిండి పదార్థాలు తక్కువగా, ప్రొటీన్లు ఎక్కువగా ఉండే ఆహార పదార్థాలు తీసుకునేలా చూడండి.  వ్యాయామం తప్పనిసరి. అమ్మాయి ఎదుగుదలలో ఇదొక మార్పు మాత్రమే.


మరిన్ని