close

తాజా వార్తలు

ఆవులను స్కూల్‌కు తీసుకొచ్చిన రైతులు

భయాందోళనకు గురైన విద్యార్థులు 

సంభల్‌‌: వీధిలో తిరిగే ఆవులు పొలాల్లోకి చొరబడి తమ పంటలను నాశనం చేస్తున్నాయని ఆగ్రహించిన రైతులు వాటిని పాఠశాలకు తీసుకెళ్లారు. ఆవులన్నింటినీ పాఠశాల ప్రాంగణంలో తోలి  బయటి నుంచి తాళం వేశారు. దీంతో స్కూల్‌లో పాఠాలు వింటున్న విద్యార్థులు ఒక్కసారిగా ఆందోళనకు గురై పరుగులు తీశారు. ఉత్తరప్రదేశ్‌లోని సంభల్ జిల్లాలో ఈ ఘటన చోటుచేసుకుంది. వివరాల్లోకి వెళితే..

సంభల్‌లోని గోన్‌హత్‌ గ్రామానికి చెందిన రైతులు మంగళవారం వీధుల్లో తిరిగే 200లకు పైగా ఆవులను స్థానిక ప్రభుత్వ పాఠశాలకు తీసుకొచ్చారు. ఈ ఆవులు తమ పంటలను నాశనం చేస్తుండటంతో వాటిని స్కూల్‌లోకి తోలి తాళం వేయడమే దీనికి పరిష్కారమని రైతులు భావించారు. అయితే అక్కడే చదువుకుంటున్న తమ పిల్లల గురించి వారు మర్చినట్లున్నారు. పాఠశాల గేటును తెరిచి ఆవులను ప్రాంగణంలోకి పంపించారు. ఆ తర్వాత బయటి నుంచి తాళం వేశారు. 

ఒక్కసారిగా వందల సంఖ్యలో ఆవులు స్కూల్‌ ప్రాంగణంలోకి రావడంతో ఆందోళనకు గురైన విద్యార్థులు అక్కడి నుంచి పరుగులు తీశారు. ఉపాధ్యాయులు విద్యార్థులను గదుల్లోకి తీసుకెళ్లి తలుపులు వేసుకొన్నారు. సమాచారమందుకున్న స్థానిక విద్యాశాఖ అధికారి స్కూల్‌కు చేరుకుని రైతులతో మాట్లాడారు. అయితే రైతులు వాగ్వాదానికి దిగడంతో పోలీసులకు సమాచారమిచ్చారు. పోలీసులు వచ్చి రైతులకు నచ్చజెప్పి ఆవులను అక్కడి నుంచి పంపించారు. చిన్నారులను ప్రమాదంలో పడేసిన రైతులపై కేసు నమోదు చేసినట్లు పోలీసులు తెలిపారు. 


మరిన్ని

జిల్లా వార్తలు

దేవ‌తార్చ‌న

రుచులు