28న జీఎస్టీ కౌన్సిల్‌ సమావేశం... ఎజెండా ఇదే! - GST Council to meet on May 28
close

Published : 15/05/2021 17:28 IST
Facebook Share Twitter Share WhatsApp Share Telegram Share Link Share

28న జీఎస్టీ కౌన్సిల్‌ సమావేశం... ఎజెండా ఇదే!

దిల్లీ: చాలా రోజుల విరామం తర్వాత జీఎస్టీ కౌన్సిల్‌ సమావేశం కానుంది. ఈ నెల 28న వర్చువల్‌గా ఈ భేటీ జరగనుంది. కేంద్ర ఆర్థిక మంత్రి నిర్మలా సీతారామన్‌ అధ్యక్షతన జరిగే 43వ జీఎస్టీ కౌన్సిల్‌ సమావేశంలో ఆర్థిక శాఖ సహాయ మంత్రి అనురాగ్‌ ఠాకూర్, అన్ని రాష్ట్రాల ఆర్థికమంత్రులు, కేంద్ర ఆర్థిక శాఖ ఉన్నతాధికారులు పాల్గొననున్నారు. ఈ మేరకు నిర్మలా సీతారామన్‌ ట్వీట్‌ చేశారు. కొవిడ్‌-19 సంబంధిత ఔషధాలు, ఆక్సిజన్‌ పరికరాలు, వ్యాక్సిన్లు వంటి వాటిపై పన్ను రేట్ల అంశం ఈ భేటీలో ప్రధానంగా చర్చకు వచ్చే అవకాశం ఉంది. 

ఏటా కనీసం మూడు నెలలకోసారి జీఎస్టీ కౌన్సిల్‌ సమావేశం అవ్వాల్సి ఉంది. కానీ, చివరికి సారిగా గతేడాది అక్టోబర్‌ 5న భేటీ జరిగింది. ఈ క్రమంలో వర్చువల్‌గా కౌన్సిల్‌ సమావేశం నిర్వహించాలని పంజాబ్‌, పశ్చిమ బెంగాల్‌ ఆర్థికమంత్రులు నుంచి డిమాండ్లు వచ్చాయి. ఈ నేపథ్యంలో ఈ భేటీ జరగనుంది. అలాగే, కొవిడ్‌ వేళ బాధితుల ప్రాణాలు కాపాడేందుకు ఉద్దేశించిన ఔషధాలపై పన్నులు తగ్గించాలని కాంగ్రెస్‌ అధినేత్రి సోనియా గాంధీ, తృణమూల్‌ అధినేత్రి మమతా బెనర్జీ ఇటీవల డిమాండ్‌ చేసిన సంగతి తెలిసిందే. ఈ క్రమంలో ఔషధాలు, వైద్య పరికరాలు, వ్యాక్సిన్లపై పన్ను తగ్గింపు అంశం ప్రధానంగా చర్చకు రానుంది. దీంతో పాటు కరోనా వేళ రాష్ట్రాల ఆదాయం; జీఎస్టీ పరిహారం బకాయిలు; పెట్రోల్‌, డీజిల్‌ జీఎస్టీ పరిధిలోకి తీసుకురావడం వంటి పలు అంశాలు జీఎస్టీ కౌన్సిల్‌ సమావేశంలో చర్చకు వచ్చే అవకాశం ఉంది.


మరిన్ని

మీ ప్రశ్న

సిరి జవాబులు

మరిన్ని
తాజా వార్తలు
మరిన్ని