భారత్‌ బయోటెక్‌ సన్నాహాలు
 అనుమతుల కోసం డీసీజీఐకి దరఖాస్తు?  

కొవిడ్‌-19 ముప్పు నుంచి రక్షణ పొందేందుకు, ఇంజెక్షన్‌ ద్వారా ఇచ్చే ‘కొవాగ్జిన్‌’ టీకాకు అత్యవసర వినియోగ అనుమతి పొందిన భారత్‌ బయోటెక్‌ ఇంటర్నేషనల్‌ ‘ముక్కు ద్వారా ఇచ్చే టీకా తయారీ’ యత్నాలను వేగవంతం చేసింది. భారత్‌ సహా అధిక జనాభా కలిగిన దేశాలకు ముక్కు ద్వారా ఇచ్చే టీకా ఎంతో మేలైనదని భారత్‌ బయోటెక్‌ ఇంటర్నేషనల్‌ సీఎండీ డాక్టర్‌ కృష్ణ ఎల్ల వివిధ సందర్భాల్లో చెబుతూ వస్తున్నారు. ఇంజెక్షన్‌ ద్వారా ఇచ్చే టీకా ఇవ్వాలంటే సిరంజిలు, సూదులు పెద్ద సంఖ్యలో కావాలి. ఇంజెక్షన్‌ చేయడానికి అనుభవం గల వైద్యులు లేదా నర్సులు కావాలి. టీకా ఇచ్చిన తర్వాత సిరంజిలు, సూదులను పర్యావరణానికి హాని లేకుండా జాగ్రత్తగా పడవేయడం కూడా సమస్యే. అందుకే ముక్కు ద్వారా ఇచ్చే టీకా ఆవిష్కరించడానికి భారత్‌ బయోటెక్‌ ఇంటర్నేషనల్‌ కొంతకాలం క్రితమే అమెరికాలోని వాషింగ్టన్‌ యూనివర్సిటీకి చెందిన స్కూల్‌ ఆఫ్‌ మెడిసిన్‌ ఇన్‌ సెయింట్‌ లూయీస్‌తో ఒప్పందం కుదుర్చుకుంది. ఛింప్‌- అడినోవైరస్‌తో ఈ టీకా అభివృద్ధి చేస్తారు. పోలియో టీకా చుక్కలు నోట్లో వేసినట్లుగా, ఈ కొవిడ్‌-19 టీకాను ముక్కులో వేస్తే సరిపోతుంది.  ఇప్పటికే ప్రాథమిక పరీక్షలు పూర్తి కావటంతో మొదటి దశ క్లినికల్‌ పరీక్షల నిర్వహణకు సిద్ధమవుతున్నట్లు తెలుస్తోంది. ఇందుకు అనుమతి కోరుతూ డీసీజీఐ (డ్రగ్‌  కంట్రోలర్‌ జనరల్‌ ఆఫ్‌ ఇండియా) కు దరఖాస్తు చేసినట్లు తెలిసింది. ప్రస్తుత సన్నాహాల ప్రకారం వచ్చే మార్చి నుంచి దీనిపై మొదటి దశ క్లినికల్‌ పరీక్షలు మొదలయ్యే అవకాశం ఉందని సమాచారం.
ఈ టీకాతయారీని భారత్‌ బయోటెక్‌ హైదరాబాద్‌లోని తన యూనిట్లో చేపడుతుంది. యూఎస్‌, జపాన్‌, ఐరోపా దేశాలను మినహాయిస్తే మనదేశంతో సహా మిగిలిన దేశాల్లో ఈ టీకా విక్రయించే హక్కులు భారత్‌ బయోటెక్‌కు ఉంటాయి. ముక్కు ద్వారా ఇచ్చే టీకాను 100 కోట్ల డోసులు తయారు చేయాలనే ఉద్దేశాన్ని అప్పట్లోనే భారత్‌ బయోటెక్‌ వెల్లడించింది.