2020-21 బడ్జెట్‌

కొవిడ్‌ కారణంగా దెబ్బతిన్న గిరాకీని పెంచేందుకు అవసరమైన చర్యలను వచ్చే బడ్జెట్‌లో ప్రవేశ పెట్టాల్సి ఉంది. కొవిడ్‌ ముందునుంచే డీలాపడిన వాహన రంగానికీ ఉపశమనం అవసరమే. డిసెంబరు త్రైమాసికంలో మాత్రం వాహన అమ్మకాలు సానుకూలమయ్యాయి. ఈ వృద్ధి కొనసాగాలన్నా.. భారత్‌ను విద్యుత్తు వాహనాల తయారీ కేంద్రంగా మార్చాలన్నా, బడ్జెట్‌లో కీలక చర్యలు అవసరమని 45 లక్షల మందికి ఉపాధి కల్పిస్తున్న వాహన రంగం కోరుకుంటోంది.

పన్నుపోటు:  వాహనాలపై 28 శాతం జీఎస్‌టీ, వాహన రకాన్ని బట్టి అదనంగా 1-22 శాతం వరకు సెస్‌ ఉంటోంది. పూర్తిగా నిర్మితమైన వాహనం గా దిగుమతి చేసుకునే వాహనాలపై కస్టమ్స్‌ సుంకం 60-100 శాతం మేర ఉంది.
* వాహన రంగానికి చేయూతనిచ్చే రిటైల్‌ రుణ సంస్థలు అధిక మొండి బకాయిలతో ఇబ్బంది పడుతున్నాయి. వాణిజ్య వాహనాల విక్రయాలకు మద్దతునిచ్చే ఎన్‌బీఎఫ్‌సీ రంగానికి నిధుల లభ్యత పెరిగితే మినహా కోలుకోని పరిస్థితి ఉంది.
* 2020 అక్టోబరు 1 నుంచి అమలవుతున్న 0.1 శాతం మేర మూలం వద్ద పన్ను వసూళ్ల వల్ల వాహన రంగంపై భారీ ఆర్థిక భారం పడుతోంది.
* 2018-19లో దేశీయంగా 2.56 కోట్ల వాహనాలు విక్రయమవ్వగా, 2019-20లో అవి 18 శాతం తగ్గి 2.09 కోట్లకు పరిమితమయ్యాయి. 2020-21 ప్రథమార్ధంలో అమ్మకాలు అంతక్రితం ఏడాది ఇదే సమయంతో పోలిస్తే 38 శాతం క్షీణించాయి. కొవిడ్‌ భయంతో వ్యక్తిగత/కుటుంబ రవాణా కోసం అధికులు కొనుగోళ్లకు రావడంతో అక్టోబరు-డిసెంబరులో సానుకూలతలు కనిపించాయి.

ఇవి కావాలి..
* జీఎస్‌టీని 28 శాతం నుంచి 18 శాతానికి తగ్గించాలి.
* 15 ఏళ్లకు పైబడిన పాత వాణిజ్య వాహనాలు మార్చుకుని కొత్తవి కొనేందుకు’ స్వచ్ఛందంగా ముందుకు వచ్చేలా తుక్కు విధానం రూపొందించాలి.
* ఆదాయపు పన్ను చెల్లించేవారు తమ వాహనాలపై తరుగుదలను క్లెయిము చేసుకోవడానికి వీలు కల్పించాలి.
* ఫేమ్‌ 2 విధానంలో వ్యక్తిగత విద్యుత్తు వాహన కొనుగోలుదార్లకూ ప్రోత్సాహకాలు ఇవ్వాలి.
* విలాసవంత కార్లపై అధిక పన్నుల వల్ల మొత్తం వాహన విపణిలో వీటి వాటా 1 శాతం కంటే పెరగడం లేదు.వీటిని తగ్గించాలి.
* ఉత్పత్తి ఆధారిత ప్రోత్సాహకాలు అమలు చేయాలి.
* 25 శాతం కార్పొరేట్‌ పన్నును అన్ని యాజమాన్య, భాగస్వామ్య కంపెనీలకూ వర్తింపజేస్తే... వాహన డీలర్లకు ప్రయోజనం కలుగుతుంది.