ప్రారంభ ధర రూ.14.69 లక్షలు

దిల్లీ: స్పోర్ట్స్‌ వినియోగ వాహన (ఎస్‌యూవీ) విపణిలో మరింత విస్తరించడం కోసం టాటా మోటార్స్‌ సోమవారం సరికొత్త సఫారీని ప్రవేశపెట్టింది. ఈ వాహన ధరల శ్రేణి రూ.14.69-21.45 లక్షలు. 1998లో టాటా సఫారీని తీసుకొచ్చామని.. ప్రస్తుత జీవనశైలికి అనుగుణంగా మరింత మెరుగు పరచి నూతన సఫారీని ప్రవేశపెడుతున్నట్లు సంస్థ ఛైర్మన్‌ ఎన్‌. చంద్రశేఖరన్‌ తెలిపారు. ల్యాండ్‌ రోవర్‌కు చెందిన డి8 ప్లాట్‌ఫాం ఆధారంగా ఈ కొత్త సఫారీని తయారు చేసినట్లు.. భవిష్యత్‌లో ఆల్‌వీల్‌ డ్రైవ్‌, విద్యుదీకరణకు అనుగుణంగా ఇది ఉంటుందని తెలిపారు. అడ్వెంచర్‌ ఎడిషన్‌ ధర రూ.20.2 లక్షలు; రూ.21.45 లక్షల(ఆటోమేటిక్‌) వరకు ఉన్నాయని తెలిపారు. ఇపుడు విక్రయమవుతున్న మూడు కార్లలో ఒకటి ఎస్‌యూవీనేనని.. అందుకే ఈ విభాగంపై గట్టిగా దృష్టి పెట్టినట్లు ఒక ప్రశ్నకు సమాధానంగా ఆయన చెప్పారు.