close

Updated : 14/04/2021 04:34 IST
Facebook Share Twitter Share WhatsApp Share Telegram Share

స్పుత్నిక్‌ వి ధర ఎంతో?

విదేశాల్లో 10 డాలర్లకు విక్రయం
మనదేశంలో రెండు డాలర్లకే  కొవిషీల్డ్‌,  కొవాగ్జిన్‌ టీకాలు
ఈనాడు - హైదరాబాద్‌

కొవిడ్‌ నిరోధానికి ‘స్పుత్నిక్‌ వి’ టీకాకు భారత ఔషధ నియంత్రణ మండలి (డీసీజీఐ) అత్యవసర అనుమతి ఇచ్చిన నేపథ్యంలో ఈ టీకా మనదేశంలో ఎప్పుడు అందుబాటులోకి వస్తుంది, దీని ధర ఎంత ఉంటుంది? అనే చర్చలు మొదలయ్యాయి. కొవిడ్‌-19 రెండోదశ కేసులు రోజుకు లక్షన్నరకు పైగా నమోదవుతున్న పరిస్థితుల్లో దేశంలో టీకాలకు కొరత ఏర్పడింది. ఈ నేపథ్యంలో ‘స్పుత్నిక్‌ వి’ టీకాకు అనుమతి లభించింది. దీంతో అత్యవసరంగా కొన్ని డోసుల టీకాను రష్యా నుంచి దిగుమతి చేసుకుని దేశీయంగా పంపిణీ చేసేందుకు డాక్టర్‌ రెడ్డీస్‌ లేబొరేటరీస్‌ సన్నాహాలు చేస్తోంది. ఈ నెలాఖరు నాటికి కొన్ని డోసుల స్పుత్నిక్‌ టీకా అందుబాటులోకి రావచ్చు. మనదేశంలో ప్రస్తుతం టీకాల పంపిణీ కార్యక్రమం అంతా ప్రభుత్వ సారథ్యంలో కొనసాగుతోంది. ఇప్పటికే అందుబాటులో ఉన్న కొవిషీల్డ్‌, కొవాగ్జిన్‌ టీకాలను వాటిని తయారు చేస్తున్న సీరమ్‌ ఇన్‌స్టిట్యూట్‌ ఆఫ్‌ ఇండియా, భారత్‌ బయోటెక్‌ ఇంటర్నేషనల్‌ నుంచి ప్రభుత్వం సేకరించి, ఆసుపత్రులకు అందిస్తోంది. ఒక్కో డోసుకు ప్రభుత్వం దాదాపు రెండు డాలర్ల చొప్పున (దాదాపు రూ.150) చెల్లిస్తున్నట్లు సమాచారం. ఇదే ధరకు ‘స్పుత్నిక్‌ వి’ టీకా కూడా ఇవ్వాలని ప్రభుత్వం రష్యా సంస్థ అయిన ఆర్‌డీఐఎఫ్‌ను, ఆ సంస్థకు దేశీయ వ్యాపార భాగస్వామిగా ఉన్న డాక్టర్‌ రెడ్డీస్‌ను కోరే అవకాశం ఉన్నట్లు తెలుస్తోంది.

ప్రైవేటుకు అనుమతిస్తే..
‘స్పుత్నిక్‌ వి’ ఒక డోసు టీకాను ఆర్‌డీఐఎఫ్‌ ఇతర దేశాల్లో 10 డాలర్లకు (దాదాపు రూ.750) విక్రయిస్తున్నట్లు తెలుస్తోంది. దానికంటే తక్కువ ధరకు మనదేశంలో ఇవ్వగలుగుతుందా, లేదా..అనేది ఆసక్తికర అంశం. ప్రైవేటు మార్కెట్లో అధిక ధరకు విక్రయించేందుకు అనుమతి ఇచ్చే పక్షంలో, ప్రభుత్వానికి తక్కువ ధరకు కొన్ని డోసుల టీకా అందించేందుకు ఆర్‌డీఐఎఫ్‌ సుముఖంగా ఉన్నట్లు తెలుస్తోంది.
85.2 కోట్ల డోసుల తయారీకి ఒప్పందాలు
దేశంలో ‘స్పుత్నిక్‌ వి’ టీకాను 85.2 కోట్ల డోసుల మేర తయారు చేయడానికి ఆర్‌డీఐఎఫ్‌ ఇప్పటికే ఒప్పందాలు కుదుర్చుకుంది. హెటిరో డ్రగ్స్‌, గ్లాండ్‌ ఫార్మా, స్టెలిస్‌ బయోఫార్మా, విర్కో బయోటెక్‌, పానేషియా బయోటెక్‌లు ‘స్పుత్నిక్‌ వి’ టీకా తయారు చేస్తాయి. ప్రపంచ దేశాలకు ఇక్కడ నుంచి ఎగుమతి చేస్తారు.
మా వంతు సహకరిస్తాం: డాక్టర్‌ రెడ్డీస్‌
‘స్పుత్నిక్‌ వి’ టీకాను దిగుమతి చేసుకుని పంపిణీ చేయడానికి భారత ఔషధ నియంత్రణ మండలి (డీసీజీఐ) నుంచి అత్యవసర వినియోగ అనుమతి లభించినట్లు డాక్టర్‌ రెడ్డీస్‌ లేబొరేటరీస్‌ మంగళవారం వెల్లడించింది. ఈ టీకాపై దేశంలో రెండు- మూడో దశ క్లినికల్‌ పరీక్షలను డాక్టర్‌ రెడ్డీస్‌ నిర్వహించింది. అత్యవసర వినియోగ అనుమతి లభించడంపై డాక్టర్‌ రెడ్డీస్‌ సహఛైర్మన్‌, ఎండీ జీవీ ప్రసాద్‌ సంతోషం వెలిబుచ్చారు. వ్యాధి తీవ్రత పెరుగుతున్న నేపథ్యంలో ప్రజలకు తమ వంతుగా తోడ్పాటు అందించే అవకాశం ఏర్పడిందని పేర్కొన్నారు. ఈ టీకాను 60 దేశాలు ఆమోదించాయి. ప్రపంచ వ్యాప్తంగా అత్యధిక అనుమతులు పొందిన రెండో కొవిడ్‌-19 టీకా ఇదే.  


జెన్నోవా ఎం-ఆర్‌ఎన్‌ఏ టీకా

*మొదటి, రెండో దశ క్లినికల్‌ పరీక్షలకు సన్నాహాలు
* కేంద్ర ప్రభుత్వం నుంచి రూ.100 కోట్ల సహాయం  

కొవిడ్‌-19 టీకా తయారీ సన్నాహాల్లో ఉన్న జెన్నోవా బయోఫార్మాస్యూటికల్స్‌కు కేంద్ర ప్రభుత్వం  ఆర్థిక సహాయం కింద రూ.100 కోట్లు మంజూరు చేయనుంది. బయోటెక్నాలజీ మంత్రిత్వ శాఖ (డీబీటీ) రూపొందించిన ‘మిషన్‌ కొవిడ్‌-19 సురక్ష’ కింద మనదేశంలో టీకా తయారీలో నిమగ్నమైన సంస్థలకు ఆర్థిక సహాయం అందించేందుకు రూ.900 కోట్లు కేటాయించింది. పుణె కేంద్రంగా కార్యకలాపాలు సాగిస్తున్న జెన్నోవా బయోఫార్మాస్యూటికల్స్‌, మెసెంజర్‌ ఆర్‌ఎన్‌ఏ టెక్నాలజీ ఆధారిత కొవిడ్‌-19 టీకాను ఆవిష్కరించే సన్నాహాల్లో ఉంది.
వాలంటీర్ల నియామకం
ఈ కంపెనీకి చెందిన ఎం-ఆర్‌ఎన్‌ఏ ఆధారిత టీకా కేండిడేట్‌ అయిన ‘హెచ్‌సీజీఓ19’ పై క్లినికల్‌ పరీక్షలు నిర్వహించడానికి ఇప్పటికే  డీసీజీఐ అనుమతి ఇచ్చింది. జంతువులపై నిర్వహించిన పరీక్షల్లో సానుకూల ఫలితాలు వచ్చినట్లు సమాచారం. యూఎస్‌కు చెందిన హెచ్‌డీటీ బయోటెక్‌ కార్ప్‌., అనే సంస్థతో కలిసి ఈ టీకాను ఆవిష్కరించడానికి జెన్నోవా బయోఫార్మాసూటికల్స్‌ ప్రయత్నాలు చేస్తోంది. ఇప్పటి వరకు ప్రపంచ వ్యాప్తంగా ఫైజర్‌, మొడెర్నా సంస్థలు మాత్రమే ఎం-ఆర్‌ఎన్‌ఏ టెక్నాలజీతో కొవిడ్‌-19 టీకాలు తయారు చేశాయి. డీసీజీఐ నుంచి అనుమతి వచ్చినందున ‘హెచ్‌సీజీఓ19’ పై మొదటి, రెండో దశ క్లినికల్‌ పరీక్షలు నిర్వహించడానికి జెన్నోవా సన్నద్ధమవుతోంది. ఇందుకోసం వాలంటీర్ల  నియామకాల ప్రక్రియ చేపట్టింది.
దేశీయంగా అందుబాటులో లేనందునే
ఎం-ఆర్‌ఎన్‌ఏ సాంకేతిక పరిజ్ఞానం మనదేశంలో అందుబాటులో లేదు. టీకాల తయారీలో మనదేశానికి చెందిన ఫార్మా/ బయోటెక్‌ కంపెనీలకు ఎంతో అనుభవం ఉన్నప్పటికీ, ఇటువంటి సాంకేతిక పరిజ్ఞానాన్ని ఉపయోగించిన దాఖలాలు లేవు. కానీ కొవిడ్‌-19 సవాలును ఎదుర్కొనేందుకు ఈ సాంకేతిక పరిజ్ఞానం తప్పనిసరి అవుతోంది. అందువల్ల కేంద్ర ప్రభుత్వ బయోటెక్నాలజీ మంత్రిత్వ శాఖ ఈ నూతన సాంకేతిక పరిజ్ఞానంతో టీకా ఆవిష్కరణకు ముందుకు వచ్చిన జెన్నోవా బయోఫార్మాకు అండగా నిలిచింది. ఈ టీకా మానవ ప్రయోగాల దశకు రావడంపై బయోటెక్నాలజీ మంత్రిత్వ శాఖ కార్యదర్శి రేణు స్వరూప్‌ సంతోషం వెలిబుచ్చారు.
ప్రోత్సాహకాలు ఇవ్వాలి: ఫిక్కీ
కొవిడ్‌-19 టీకా ఉత్పత్తి పెంచేందుకు, తయారీదార్లకు ప్రోత్సాహకాలు ఇవ్వాలని పరిశ్రమ సంఘం ఫిక్కీ ప్రభుత్వానికి విజ్ఞప్తి చేసింది. దేశంలో ఇప్పటికే కొవిడ్‌-19 టీకాను అభివృద్ధి చేసిన/తయారుచేస్తున్న సంస్థలకు కొవిడ్‌ నిధుల నుంచి తక్షణమే గ్రాంట్లు, సబ్సిడీలు ఇవ్వాలని కోరింది. టీకా ధరలపై ప్రభుత్వం పరిమితులు విధించిన నేపథ్యంలో టీకా ఉత్పత్తి వేగవంతం చేయాలంటే,   టీకా తయారీ సంస్థలకు ఉత్పత్తి ఆధారిత ప్రోత్సాహ పథకం కింద రుణాలు, ప్రయోజనాలకు సిఫారసు చేయాలని  పేర్కొంది.

 


జాన్సన్‌ టీకాకు తాత్కాలిక విరామం

*ఆరుగురికి రక్తం గడ్డకట్టిందనే వార్తలు  
* విచారణ ప్రారంభించిన అమెరికా ప్రభుత్వం

వాషింగ్టన్‌: కొవిడ్‌-19 నిరోధానికి జాన్సన్‌ అండ్‌ జాన్సన్‌ అభివృద్ధి చేసిన ఒకే డోసు టీకాను ప్రజలకు ఇవ్వడాన్ని తాత్కాలికంగా నిలపాలని అమెరికా నిర్ణయించింది. ఈ టీకా తీసుకున్న వారిలో రక్తం గడ్డకట్టడాన్ని గుర్తించిన మీదట ఈ నిర్ణయం తీసుకున్నారు. ‘జాన్సన్‌ అండ్‌ జాన్సన్‌ టీకా తీసుకున్న ఆరుగురు మహిళల్లో రక్తం గడ్డకట్టిన ఉదంతాలు బయటకు వచ్చాయి. దీనిపై మేం విచారణ చేపట్టాం’ అని యూఎస్‌లోని సెంటర్స్‌ ఫర్‌ డిసీజ్‌ కంట్రోల్‌ అండ్‌ ప్రివెన్షన్‌, యూఎస్‌ఎఫ్‌డీఏ ఒక సంయుక్త ప్రకటనలో వెల్లడించాయి. టీకా తీసుకున్న తర్వాత ఈ మహిళల్లో రక్తం గడ్డ కట్టడంతో పాటు ప్లేట్‌లెట్ల కౌంట్‌ తగ్గిపోవడాన్ని కూడా గుర్తించారు. ఇప్పటి వరకు అమెరికాలో 68 లక్షల మందికి జాన్సన్‌ అండ్‌ జాన్సన్‌ టీకా ఇచ్చారు. టీకా తీసుకున్న వారిలో చిన్నపాటి సైడ్‌ఎఫెక్ట్స్‌ తప్పిస్తే, పెద్దగా ఇబ్బందులు కనిపించలేదు. కానీ ఇప్పుడు రక్తం గడ్డకట్టిన కేసులు వెలుగులోకి రావడంతో అమెరికా ఔషధ నియంత్రణ వర్గాలు అప్రమత్తం అయ్యాయి. దీనిపై విచారణ పూర్తయ్యే వరకు, ముందుజాగ్రత్త చర్యగా జాన్సన్‌ అండ్‌ జాన్సన్‌ టీకా ఇవ్వడాన్ని నిలిపివేస్తున్నామని సెంటర్స్‌ ఫర్‌ డిసీజ్‌ కంట్రోల్‌ ప్రిన్సిపల్‌ డిప్యూటీ డైరెక్టర్‌ డాక్టర్‌ అనే షుచట్‌, యూఎస్‌ఎఫ్‌డీఏ సెంటర్‌ ఫర్‌ బయోలాజిక్స్‌ ఎవల్యూషన్‌ అండ్‌ రీసెర్చ్‌ డైరెక్టర్‌ డాక్టర్‌ పీటర్‌ మార్క్స్‌ స్పష్టం చేశారు. టీకా తీసుకున్న తర్వాత రక్తం గడ్డకట్టిన ఉదంతాలు ఇప్పటి వరకూ ఆస్ట్రజెనెకా- ఆక్స్‌ఫర్డ్‌ టీకా విషయంలో కనిపించాయి. అందుకే ఇప్పటి వరకు ఆస్ట్రజెనెకా టీకాకు అమెరికాలో అనుమతి లభించలేదు. ఇప్పుడు జాన్సన్‌ అండ్‌ జాన్సన్‌ టీకా విషయంలోనూ ఇదే ఇబ్బంది తలెత్తింది. ఈ రెండు టీకాలను ఒకేరకమైన సాంకేతిక పరిజ్ఞానం అనుసరించి తయారు చేశారు. ఈ నేపథ్యంలోనే ఐరోపా దేశాలకు తమ టీకా పంపిణీని ఆలస్యం చేయనున్నట్లు జాన్సన్‌ అండ్‌ జాన్సన్‌ ప్రకటించింది.


 

Tags :

మరిన్ని

మీ ప్రశ్న

సిరి జవాబులు

మరిన్ని
తాజా వార్తలు
మరిన్ని