తక్కువ ధరలో రెమ్‌డెసివిర్‌ తయారు చేస్తాం
close

Published : 12/05/2021 02:08 IST
Facebook Share Twitter Share WhatsApp Share Telegram Share Link Share

తక్కువ ధరలో రెమ్‌డెసివిర్‌ తయారు చేస్తాం

సీడీఎస్‌సీఓకు స్థానిక కంపెనీల దరఖాస్తు
‘అత్యవసర అనుమతి’ కోసం ఎదురుచూపులు
ఈనాడు - హైదరాబాద్‌

కొవిడ్‌-19 వ్యాధి తీవ్రత హెచ్చుగా ఉన్న బాధితులకు వైద్యులు సిఫార్సు చేస్తున్న ‘రెమ్‌డెసివిర్‌’ ఇంజక్షన్‌కు గిరాకీ పెరిగి  తీవ్రమైన కొరత ఏర్పడిన ప్రస్తుత పరిస్థితుల్లో ‘అత్యవసర అనుమతి’ ఇస్తే ఈ మందు తయారు చేసి తక్కువ ధరలోనే అందించేందుకు కొన్ని ఫార్మా కంపెనీలు ముందుకు వస్తున్నాయి. ఇందులో రెండు స్థానిక ఫార్మా కంపెనీలు ఉండటం విశేషం. ఈ మేరకు ఈ కంపెనీలు సీడీఎస్‌సీఓ (సెంట్రల్‌ డ్రగ్స్‌ స్టాండర్డ్‌ కంట్రోల్‌ ఆర్గనైజేషన్‌) దరఖాస్తు చేసినట్లు తెలుస్తోంది. ఇవే కాకుండా ముంబయికి చెందిన మరొక ఫార్మా కంపెనీ కూడా ఇదేవిధంగా ముందుకు వచ్చిందని సమాచారం. ఈ దరఖాస్తులు ప్రస్తుతం సంబంధిత అధికారుల పరిశీలనలో ఉన్నట్లు పరిశ్రమ వర్గాలు పేర్కొంటున్నాయి.
కొవిడ్‌-19 సెకండ్‌ వేవ్‌లో చికిత్స కోసం ఆస్పత్రుల్లో  చేరాల్సి వస్తున్న బాధితుల సంఖ్య అధికంగా ఉంది. ఇటువంటి వారికి ఆక్సిజన్‌ సరఫరా చేయటంతో పాటు ఊపిరితిత్తుల ఇన్ఫెక్షన్‌ తగ్గించటం కోసం ‘రెమ్‌డెసివిర్‌’ ఇంజక్షన్‌ను వైద్యులు సిఫార్సు చేస్తున్నారు. రోగికి తొలిరోజు రెండు ఇంజక్షన్లు, ఆ తర్వాత నాలుగు రోజుల పాటు రోజుకు ఒకటి చొప్పున... మొత్తం ఆరు ఇంజక్షన్లు ఇవ్వాల్సి ఉంటుంది. బాధితుల సంఖ్య పెరిగిపోవటంతో దీనికి గిరాకీ గత రెండు మూడు వారాలుగా విపరీతంగా పెరిగింది. దీంతో కొరత ఏర్పడటం, దాన్ని బ్లాక్‌మార్కెటీర్లు సొమ్ము చేసుకోవటం, బాధితులు మందు కోసం ఇబ్బందులు పడటం తెలుస్తూనే ఉంది. ‘రెమ్‌డెసివిర్‌’ ఇంజక్షన్‌పై పేటెంట్‌ హక్కులు యూఎస్‌ కంపెనీ అయిన గిలీడ్‌ సైన్సెస్‌కు ఉన్నాయి. ఈ సంస్థలు దీనికి సంబంధించి మనదేశంలోని  ఏడు ఫార్మా కంపెనీలతో ‘వాలంటరీ లైసెన్సింగ్‌’ ఒప్పందాలు చేసుకుంది. అందువల్ల ఈ ఆరు కంపెనీలు మాత్రమే మనదేశంలో దీన్ని తయారు చేసి సరఫరా చేస్తున్నాయి. కానీ ఈ కంపెనీలు తయారు చేసే మందు ప్రజల అవసరాలకు సరిపోవటం లేదు. ఒక్కో రాష్ట్రానికి ఎన్ని ఇంజక్షన్లు సరఫరా చేయాలనే కోటా నిర్ణయించి...., దాని ప్రకారం మందు సరఫరా చేస్తున్న పరిస్థితి కనిపిస్తోంది. పైగా ధర కూడా అధికంగా ఉంది. ఒక్కో ఇంజక్షన్‌ను రూ.3,500 వరకూ ఫార్మా కంపెనీలు విక్రయిస్తున్నాయి. అదే బ్లాక్‌మార్కెట్‌లో దాన్ని కొనుగోలు చేయాలంటే రూ.25,000 వరకూ చెల్లించాల్సి వస్తోంది. ఈ పరిస్థితుల్లో ‘రెమ్‌డెసివిర్‌’ తయారీని పెంచటం, అందుకు ఇతర కంపెనీలకు సైతం అవకాశం ఇవ్వటం ఒక్కటే పరిష్కారమనే అభిప్రాయం సంబంధిత వర్గాల్లో వినిపిస్తోంది.

సత్వరం పరిశీలిస్తేనే...
అత్యవసర పరిస్థితుల్లో పేటెంట్‌ హక్కులను పక్కన పెట్టాలనే వాదన ఇటీవల ముందుకు వస్తోంది. మేథో సంపత్తి హక్కులు పక్కన పెట్టి టీకాల తయారీకి ఇతర కంపెనీలను అనుమతించాలనే విషయంలో ప్రపంచ వ్యాప్తంగా చర్చ సాగుతోంది. తద్వారా ప్రజలకు తక్కువ సమయంలో టీకాలు ఇచ్చి కొవిడ్‌-19 మహమ్మారి నుంచి కాపాడే అవకాశం వస్తుందని అంటున్నారు. ఇదేవిధంగా అత్యసవర ఔషధాలను సైతం ‘అత్యవసర అనుమతి’ ఇచ్చి అధికంగా ఉత్పత్తి చేయటానికి అవకాశం ఉన్నట్లు పేర్కొంటున్నారు. కొన్ని ఔషధాలకు ఇటీవల సీడీఎస్‌సీఓ అత్యవసర అనుమతి ఇచ్చిన విషయం తెలిసిందే. ఇదే కోవలో ‘రెమ్‌డెసివిర్‌’ ను తక్కువ ధరలో తయారు చేయటానికి ముందుకు వచ్చిన కంపెనీల దరఖాస్తులను సత్వరం పరిశీలించే అవకాశం ఉన్నట్లు తెలుస్తోంది. సీడీఎస్‌సీఓ సానుకూలంగా స్పందిస్తే, ఎక్కువ కంపెనీలు ఈ మందు తయారు చేస్తాయని, తద్వారా ప్రస్తుత అత్యవసర పరిస్థితుల్లో బాధితులకు అండగా నిలిచినట్లు అవుతుందని సంబంధిత వర్గాలు పేర్కొంటున్నాయి.


Tags :

మరిన్ని

మీ ప్రశ్న

సిరి జవాబులు

మరిన్ని
తాజా వార్తలు
మరిన్ని