1990లో తొలిసారి 1000 మార్క్‌ను దాటి.. 

ముంబయి: బాంబే స్టాక్‌ ఎక్స్ఛేంజ్‌ సెన్సెక్స్‌.. నేడు చరిత్ర సృష్టించింది. మార్కెట్‌ చరిత్రలో తొలిసారి 50,000 మార్క్‌ను దాటి సరికొత్త జీవనకాల గరిష్ఠ స్థాయిలో ట్రేడ్‌ అవుతోంది. అమెరికాలో కొత్త ప్రభుత్వం కొలువు దీరడంతో అంతర్జాతీయ మార్కెట్లు ‘జో’ష్‌ లో ఉండటం, దేశంలో విదేశీ పెట్టుబడులు పెరగడం, బడ్జెట్‌పై సానుకూల అంచనాలతో దలాల్‌ స్ట్రీట్‌ కొనుగోళ్లతో కళకళలాడుతోంది. ఫలితంగా సెన్సెక్స్‌ కొత్త రికార్డుల్లో దూసుకెళ్తోంది. 

దాదాపు 30 ఏళ్ల క్రితం 1990లో తొలిసారిగా 1000 మార్క్‌ను దాటిన సెన్సెక్స్‌.. అంచెలంచెలుగా 50వేల మార్క్‌కు చేరింది. అయితే ఈ ప్రయాణంలో ఎన్నో ఎత్తుపల్లాలను చవిచూసింది. హర్షద్‌ మెహతా, కేతన్‌ పరేఖ్‌, సత్యం లాంటి కుంభకోణాలు.. జీఎస్‌టీ అమలు, నోట్ల రద్దు లాంటి ప్రభుత్వ నిర్ణయాలు, కరోనా మహమ్మారి.. ఇలా ఎన్నో ఘటనలు మార్కెట్‌పై తీవ్ర ప్రభావం చూపాయి. అదే సమయంలో మోదీ ప్రభుత్వ సంస్కరణలు, కొవిడ్‌ టీకాలకు ఆమోదం వంటి పరిణామాలు సూచీలను నిలబెట్టాయి. అలా నేడు సెన్సెక్స్‌ 50వేలకు చేరింది. ఈ సందర్భంగా సూచీ ప్రస్థానాన్ని ఓసారి క్షుణ్ణంగా చూస్తే..

* 1990 జులై 25న సానుకూల వర్షపాతం, కార్పొరేట్‌ ఫలితాలతో సెన్సెక్స్‌ తొలిసారిగా 1000 మార్క్‌ను దాటింది. 

* అయితే సెన్సెక్స్‌ 10వేల మార్క్‌ను చేరడగానికి దాదాపు 16ఏళ్లు పట్టింది. 2006 ఫిబ్రవరి 7న 10,000 మైలురాయిని దాటింది.

* ఆ తర్వాతి సంవత్సరమే అంటే 2007 డిసెంబరు 11న సూచీ 20,000 మార్క్‌ను చేరుకుంది. 

* మళ్లీ ఎనిమిదేళ్లకు 2015 మార్చి 4న రిజర్వ్‌బ్యాంక్‌ ఆఫ్‌ ఇండియా రెపో రేట్లను తగ్గించడంతో 30వేల మైలురాయిని దాటింది.

* ఆ తర్వాత నుంచి సెన్సెక్స్‌ వేగం పుంజుకుంది. 2019 మే 23న సార్వత్రిక ఎన్నికల ఫలితాల సమయంలో తొలిసారిగా 40వేల మార్క్‌ను చేరింది. 

9 నెలల్లో 93శాతం పెరిగి..

గతేడాది మార్చిలో దేశంలో కరోనా మహమ్మారి విజృంభించిన సమయంలో సెన్సెక్స్‌ కూడా తీవ్ర ఒడుదొడుకులకు లోనైంది. ఒకదశలో గతేడాది మార్చి నెలలో 25,638.90కి పడిపోయింది. ఆ తర్వాత క్రమక్రమంగా పెరుగుతూ వచ్చిన సూచీ.. ఇటీవల గత కొద్ది రోజులుగా రికార్డు స్థాయిలో దూసుకెళ్తోంది. కేవలం 9 నెలల్లోనే సూచీ 93శాతం పెరగడం విశేషం. తాజాగా సెన్సెక్స్‌ 50వేల మైలురాయిని చేరడంతో బీఎస్‌ఈ తన ట్విటర్‌ ఖాతాలో సెన్సెక్స్‌ ప్రయాణానికి సంబంధించి ఓ ఛార్ట్‌ను పోస్ట్‌ చేసింది. 

ఇవీ చదవండి..

ఊరట లభిస్తుందా?

ఈ బడ్జెట్‌ భిన్నం.. ఎందుకంటే?