ముంబయి: గురువారం భారీ లాభాలతో చరిత్ర సృష్టించిన దేశీయ స్టాక్‌ మార్కెట్లు నేడు కాస్త నెమ్మదించాయి. ఆసియా మార్కెట్లు నేలచూపులు చూడడం, నిన్నటి భారీ లాభాల నేపథ్యంలో మదుపర్లు లాభాల స్వీకరణకు మొగ్గు చూపడం వంటి పరిణామాలు సూచీలను ప్రభావితం చేస్తున్నాయి. శుక్రవారం ఉదయం 9:34 గంటల సమయంలో సెన్సెక్స్‌ 211 పాయింట్లు నష్టపోయి 49,388 వద్ద కొనసాగుతుండగా.. నిఫ్టీ 58 పాయింట్ల నష్టంతో 14,531 వద్ద ట్రేడవుతోంది. డాలరుతో రూపాయి మారకం విలువ రూ.72.98 వద్ద కొనసాగుతోంది. ఆసియా మార్కెట్లు ఈ వారం భారీ లాభాల్లో పయనించిన విషయం తెలిసిందే. ఈ నేపథ్యంలో అక్కడ కూడా మదుపర్లు లాభాల స్వీకరణ దిశగా సాగారు. ఈ నేపథ్యంలోనే ఆసియా మార్కెట్లు నష్టాల బాట పట్టాయి.

టాటా మోటార్స్‌, బజాజ్‌ ఆటో, హీరో మోటోకార్ప్‌, ఐషర్‌ మోటార్స్‌, శ్రీ సిమెంట్‌ షేర్లు లాభాల్లో కొనసాగుతుండగా.. యాక్సిస్‌ బ్యాంక్‌, బజాజ్‌ ఫైనాన్స్‌, హిందాల్కో ఇండస్ట్రీస్‌, టెక్‌ మహీంద్రా, డాక్టర్‌ రెడ్డీస్‌ ల్యాబ్స్‌ షేర్లు నష్టాల్ని చవిచూస్తున్నాయి.

ఇవీ చదవండి...

50000 అద్భుతాన్ని అందుకుని.. వెనక్కి