ముంబయి: సోమవారం నాటి నష్టాల నుంచి స్టాక్‌ మార్కెట్లు పుంజుకున్నాయి. మంగళవారం ఉదయం 9:39 గంటల సమయంలో సెన్సెక్స్‌ 374 పాయింట్లు లాభపడి 49,438 వద్ద కొనసాగుతుండగా.. నిఫ్టీ 107 పాయింట్ల లాభంతో 14,386 వద్ద ట్రేడవుతోంది. డాలరుతో రూపాయి మారకం విలువ రూ.73.11 వద్ద కొనసాగుతోంది. చైనా వృద్ధి రేటు మెరుగుపడడం ప్రాంతీయంగా కలిసొచ్చే అవకాశం ఉందన్న సంకేతాలతో ఆసియా మార్కెట్లు దూసుకెళ్తున్నాయి. అంతర్జాతీయంగా మరోసారి కొవిడ్‌ విజృంభణ, లాక్‌డౌన్ భయాలు వెంటాడుతున్నప్పటికీ.. చైనా వృద్ధి రేటు మదుపర్లలో ఆశలు రేకెత్తిస్తోంది.

బ్యాంకింగ్‌, ఐటీ, ఆటో రంగాలు ఒక శాతానికి పైగా లాభాల్లో పయనిస్తున్నాయి. గ్రాసిమ్‌ ఇండస్ట్రీస్‌, టాటా మోటార్స్‌ లిమిటెడ్‌, ఓఎన్‌జీసీ, గెయిల్‌, సిప్లా షేర్లు లాభాల్లో కొనసాగుతుండగా..యూపీఎల్‌, హెచ్‌డీఎఫ్‌సీ, ఐటీసీ లిమిటెడ్‌, మహీంద్రా అండ్ మహీంద్రా, టాటా స్టీల్‌ షేర్లు నష్టాల్ని చవిచూస్తున్నాయి.