close
ఇప్పటికీ పల్లె పడుచులే

పల్లెల్లో ఇప్పటికీ బ్యాంకులంటే ఆంధ్రా బ్యాంకు, స్టేట్‌ బ్యాంకుల పేర్లే చెబుతారు. గ్రామీణవాసులతో అంతగా మమేకమైపోయాయీ బ్యాంకులు. సంస్కరణల అనంతరం పుట్టుకొచ్చిన నవతరం ప్రైవేటు బ్యాంకులు ఇప్పటికీ పట్టణాలు, నగరాలకే పరిమితమయ్యాయి. గ్రామాల్లో, ఆదాయం తక్కువగా ఉండే ప్రాంతాల్లో బ్యాంక్‌ లావాదేవీలు అధికంగా జరుగుతున్నా, లావాదేవీ సగటు మాత్రం తక్కువగానే ఉంటోంది.
గ్రామీణ ప్రాంతాల్లో నగదు డిపాజిట్ల స్వీకరణ, వ్యవసాయ రుణాలు, చిన్నపాటి సంస్థల ఏర్పాటు, గృహాల కొనుగోలు, బంగారం తనఖా రుణాలు ఇవ్వడం వంటివి బ్యాంకుల్లో ప్రధానంగా జరిగే లావాదేవీలు. విదేశాల్లో స్థిరపడిన, వృత్తిరీత్యా వెళ్లి వస్తున్న ప్రవాసీయుల సంఖ్య నానాటికీ పెరుగుతున్న నేపథ్యంలో, అక్కడ నుంచి నగదు ఇక్కడకు పెద్దమొత్తాల్లో బదిలీ అవుతోంది. దీంతోపాటు దేశీయ జనాభాలో శ్రమించే వయసు కలిగిన యువత వాటా అధికంగా ఉంది. వీరికి ఉపాధి కల్పించే పథకాల కింద అందే నిధులను, గ్రామాల్లో వ్యవసాయ అనుబంధ పరిశ్రమలు ఏర్పాటు చేసేందుకు, పూచీకత్తు అవసరం లేని ముద్ర రుణాలను కూడా ప్రభుత్వరంగ బ్యాంకులే (పీసీబీలు) అందిస్తున్నాయి. పెద్ద గ్రామాల్లో బ్యాంకుల శాఖలున్నా, మిగిలిన గ్రామాల్లోని ప్రజలకూ బ్యాంకు సేవలందించేందుకు బ్యాంకింగ్‌ ప్రతినిధులు (బీసీలు) ఉంటున్నారు. ఇవికాక ఏటీఎంలు, డెబిట్‌ కార్డులతో చెల్లింపునకు వీలున్న పాయింట్‌ ఆఫ్‌ సేల్‌ (పీఓఎస్‌లు) యంత్రాలను కూడా పీసీబీలే అందిస్తున్నాయి. కనీస నిల్వ అవసరం లేని ఖాతాదార్లకు రూపే కార్డులు జారీ చేస్తున్నాయి.యూనిఫైడ్‌ పేమెంట్‌ ఇంటర్‌ఫేస్‌ (యూపీఐ)తో చెల్లింపులు కూడా గ్రామాల్లో పెరుగుతున్నాయి.

మారిన రుణ ప్రాధాన్యాలు
బ్యాంకుల జాతీయీకరణ సమయంలో మొత్తం రుణాల్లో ప్రాధాన్య రంగాలకు కేటాయించిన మొత్తం 14 శాతమే. 1975 జులై నాటికే ఇది 30.3 శాతానికి చేరింది. 1984కు ఇది 40 శాతానికి చేరింది. తరవాత 20 సూత్రాల ఆర్థిక కార్యక్రమం కింద బ్యాంకుల రుణ వితరణ తీరు మరింత మారిపోయింది. కేవలం 20 శాతాన్ని మాత్రం మార్కెట్‌ వడ్డీరేట్ల ప్రకారం ఇచ్చి, మిగిలిన 80 శాతాన్ని ముందుగా నిర్ణయించిన వడ్డీ రేట్ల ప్రకారమే ఇచ్చే స్వేచ్ఛను బ్యాంకులకు కల్పించారు.

డిపాజిట్లు పెద్దగా పెరగలేదు
1969-84 మధ్య బ్యాంకు శాఖల్లో 60 శాతం గ్రామీణ ప్రాంతాల్లో నెలకొల్పినా, స్థూల జాతీయోత్పత్తి (ఏడాది కాలంలో దేశీయంగా జరిగిన ఉత్పత్తి, సేవల విలువ)లో 40 శాతం వ్యవసాయ రంగానిదే అయినా.. మొత్తం డిపాజిట్లలో గ్రామీణ వాటా 3.1 శాతం నుంచి 14.6 శాతానికి మాత్రమే పెరిగింది. బ్యాంకుల జాతీయీకరణ ఫలితంగా, వ్యవసాయానికి రుణాలివ్వడం పెరిగినందున, అవసరాల కోసం పొదుపు చేయడాన్ని ప్రజలు తగ్గించేయడమేనని ఒక అధ్యయనంలో తేలింది.

రుణ మేళాలతోనే సామాన్యులకు..
ప్రధాని ఇందిరాగాంధీ నేతృత్వంలో 1982లో ఆర్థిక శాఖ సహాయమంత్రిగా నియమితులైన జనార్ధన పూజారి, తదుపరి రాజీవ్‌గాంధీ హయాంలో ఆర్థిక, గ్రామీణ శాఖల మంత్రిగా నియమితులయ్యారు. ఆయన హయాంలో నిర్వహించిన రుణమేళాలపై కొన్ని విమర్శలు వచ్చినా, సామాన్యులు తొలిసారిగా బ్యాంకు రుణాలు అందుకోగలిగారని జాతీయ బ్యాంకు ఉన్నతాధికారి ఒకరు తెలిపారు. 1990 ప్రాంతంలో సరళీకృత ఆర్థిక విధానాల ఫలితంగా ప్రైవేటు బ్యాంకులు దేశంలో ఏర్పాటయ్యాయి. అయితే అధిక మొత్తం లావాదేవీలపైనే దృష్టితో వ్యాపారం సాగిస్తూ, గ్రామీణ ప్రాంతాలకు వెళ్లలేదు. 2000వ సంవత్సరం నుంచి టెక్నాలజీ వినియోగం, కంప్యూటర్లతో పనిచేయడం బ్యాంకుల్లో పెరిగింది. ఇదే సమయంలో ఏటీఎంలను నెలకొల్పడమూ అధికమైంది. ప్రారంభంలో ఏటీఎం/డెబిట్‌ కార్డుల వినియోగంలో ప్రజలు భయపడినా, డబ్బుల కోసం ఎక్కువసేపు వేచి ఉండాల్సిన అవసరం లేకపోవడంతో,  బ్యాంకు ఖాతాల్లోనే నగదు దాచుకోవడం పెరిగింది.

ప్రత్యేక అనుబంధం కొనసాగుతుందా?
పట్టణాలు/నగరాలతో పోలిస్తే గ్రామీణ పరిస్థితులు భిన్నంగా ఉంటాయి. మోసం చేసే ధోరణి తక్కువగా ఉండటం, పరువు కోసం పాకులాడేతత్వం, మేలు/సాయం చేసిన వారిపై ఆదరణ చూపడం అధికం. గ్రామాల్లో బ్యాంకు శాఖలను కూడా ఎక్కువగా పీఎస్‌బీలు ఏర్పాటు చేయడంతో, ఆయా బ్యాంకుల అధికారులు, సిబ్బందికి ప్రజలతో అనుబంధం పెరిగింది. కరవు, అతివృష్టి పరిస్థితుల వల్ల పంట నష్టపోయినప్పుడు మాత్రమే రైతులు బ్యాంకు రుణం తీర్చలేకపోయే వారు కానీ, మిగిలిన సందర్భాల్లో ఎట్టి పరిస్థితుల్లో రుణం తీర్చేందుకే ప్రయత్నించేవారు. బ్యాంకర్లు కూడా ప్రజల అవసరాన్ని, పరిస్థితులను గమనిస్తూ అవసరమైనపుడు రుణాలకు వడ్డీ మినహాయింపు, పునర్‌ వ్యవస్థీకరణ వంటి నిర్ణయాలు తీసుకునేవారు. ఏతావాతా ప్రభుత్వరంగ బ్యాంకులు ఇప్పటికీ గ్రామీణావనికి నేస్తాలుగానే సేవలు అందిస్తూ ముందుకు సాగుతున్నాయనడంలో సందేహం లేదు.

ప్రధానాంశాలు

జిల్లా వార్తలు

దేవతార్చన


రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.