close
50 మనకు సాధ్యమేనా...!

సులభతర వాణిజ్యంలో భారత్‌ త్వరలో 50వ ర్యాంకుకు చేరుకునే అవకాశాలు కనిపిస్తున్నాయి. అయితే మూలాల్లో అంతగా మార్పులు జరిగాయా? ఉద్యోగాలు భారీగా వచ్చాయా? ఔత్సాహిక పరిశ్రమల్లో వైఫల్యాలు తగ్గాయా? కార్మికులు ఎక్కువగా ఉండే మన దేశంలో తయారీ ఎందుకు అభివృద్ధి చెందలేదు? ఇవన్నీ సమాధానాలు దొరకని ప్రశ్నలే. వీటికి జవాబులు దొరకాలంటే  ఏం చేయాలో చూద్దామా.

డాక్టర్‌ వికాస్‌ సింగ్‌

సులువుగా వ్యాపారం చేసుకోవడానికి వీలు కల్పించడం వల్ల పౌరుల జీవన ప్రమాణాలు మెరుగయ్యాయని ప్రధాన మంత్రి నరేంద్ర మోదీ ఇటీవల ప్రకటించారు. సులభరత వ్యాపారం విషయంలో భారత్‌ ఏకంగా 14 స్థానాలు ఎగబాకి 63వ ర్యాంకును దక్కించుకోవడం ఇందుకు నేపథ్యం. అదే సమయంలో వరుసగా మూడో ఏడాదీ అగ్రగామి 10 అత్యుత్తమ పనితీరు ప్రదర్శించిన దేశాల్లో నిలిచింది. సమీప భవిష్యత్‌లో 50వ ర్యాంకుకు చేరుకోవాలన్నది ప్రధాని మోదీ లక్ష్యంగా ఉంది. మోదీ 2014లో పగ్గాలు చేపట్టినపుడు ఇరాన్‌, ఉగాండాల కంటే తక్కువ ర్యాంకైన 142వ స్థానంలో ఉండేది.

సంస్కరణల వల్లే
కార్పొరేట్‌ పన్ను రేటును తగ్గించడం వంటి ధైర్యవంతమైన సంస్కరణలను ప్రభుత్వం చేపట్టడంతో వ్యాపారాన్ని మొదలుపెట్టడానికి సులభతర వాతావరణాన్ని ఏర్పాటు చేయగలిగారు. దివాలా పరిష్కారాన్ని వేగవంతం చేయడం; నిర్మాణ అనుమతుల జారీ; సరిహద్దుల మధ్య వాణిజ్యం వంటి వాటిలోనూ గుర్తించదగ్గ సంస్కరణలే జరిగాయి. దివాలా చట్టం అమల్లోకి వచ్చాక 2000కు పైగా కంపెనీలు కొత్త చట్టాన్ని వినియోగించుకున్నాయి. అందులో 470 సంస్థలు నగదీకరణనూ చేసుకోగలిగాయి. ఇక నిర్మాణ అనుమతులను పొందే సమయంలో సమయాన్ని తగ్గించడంతో వ్యయాలూ తగ్గాయి.
విచిత్రం ఏమిటంటే ర్యాంకుల లెక్కింపులో తక్కువ విస్తీర్ణం, జనాభా ఉన్న దేశాలకే ఎక్కువ సానుకూలతలున్నప్పటికీ.. భారత్‌ తన ర్యాంకును బాగా మెరుగుపరచుకోవడం ప్రశంసార్హమే. ఆర్థిక వ్యవస్థ అనుసరిస్తున్న విధానాలు అంతర్జాతీయ ప్రమాణాలతో పోలిస్తే ఎంత మెరుగ్గా ఉన్నాయో సూచించే ‘డిస్టన్స్‌ టు ఫ్రంటియర్‌ మెట్రిక్‌’(డీటీఎఫ్‌)లో భారత్‌ 10 శాతం మెరుగై 60.8 నుంచి 67.3కు చేరింది. అంటే అంతర్జాతీయ ప్రమాణాల దిశగా మన దేశం పురోగమిస్తుందనడానికి ఇది స్పష్టమైన సంకేతం.

ప్రతికూలతలూ ఉన్నాయ్‌
అయితే కొంత మంది ప్రతికూలవాదులు మాత్రం భారత్‌ లోపాలను ఎత్తిచూపుతుంటారు. తక్కువ ర్యాంకింగ్‌ వచ్చిన అంశాలపై దృష్టి పెడుతుంటారు. కాంట్రాక్టుల అమలు(163), ఆస్తుల రిజిస్ట్రేషన్‌(154) విషయంలో భారత్‌ వెనకబడే ఉందంటున్నారు. రిజిస్ట్రేషన్‌కు 58 రోజులు, సగటున ఆస్తి విలువలో 7.8 శాతాన్ని ఖర్చు చేయాల్సి ఉంటుందంటున్నారు. ఇక వాణిజ్య వివాద పరిష్కారానికి అయితే నాలుగేళ్ల సమయం పడుతోందని.. ఇది సగటు పోటీతత్వంతో పోలిస్తే మూడు రెట్లు ఎక్కువ అని అంటున్నారు. అదే సమయంలో వాణిజ్య ఒప్పందం, కార్యకలాపాలు, అమలు వ్యయాలు విపరీతంగా పెరిగాయి. మరో పక్క, చైనా సైతం తన ర్యాంకును 46 నుంచి 31కి మెరుగుపరచుకుంది.

అన్ని దిశల్లో అభివృద్ధి అవసరం
అభివృద్ధి అనేది ఒక పెను మార్పునకు చిహ్నంగా ఉండాలి. అది గొప్ప ప్రభావాన్ని చూపాలి. సులువుగా వ్యాపారాన్ని నిర్వహించుకునేలా వీలు కల్పించడంపై ప్రభుత్వం చేపడుతున్న చర్యలు ప్రశంసించదగ్గవే కానీ.. ప్రాధాన్యాలు, దిశ, అమలు ప్రశ్నించదగ్గవిగా ఉన్నాయి. మన వనరులను, డబ్బులను అధిక ఉద్యోగాలిచ్చే ఔత్సాహిక పారిశ్రామికవేత్తలపై కాకుండా.. బడా పరిశ్రమలపై వినియోగిస్తుండడమే ఇందుకు కారణం.

ప్రభుత్వం గుర్తించాల్సింది అదే
చిన్న, మధ్య స్థాయి ఔత్సాహిక పారిశ్రామికవేత్తలను ప్రభుత్వం గుర్తించాల్సిన అవసరం ఉంది. సమతుల అభివృద్ధి, స్థిర వృద్ధికి ఇది ఉత్ప్రేరకంగా పనిచేయగలదు. ఉద్యోగాలను సృష్టించే సత్తా ప్రభుత్వానికి పరిమితంగా ఉన్న వేళ.. పెద్ద పరిశ్రమలు కూడా భారత ఉద్యోగ సమస్యలకు పరిష్కారాన్ని చూపించలేవు. రూ.కోటి పెట్టుబడితో పెద్ద కంపెనీలు 10 కంటే ఎక్కువ ఉద్యోగాలు సృష్టించలేవు. కానీ ఎమ్‌ఎస్‌ఈ రంగంలో ఈ సంఖ్య 250గా ఉంటుంది.

మన అభివృద్ధి బహుళ కోణాల్లో ఉండాలి. సానుకూల ఫలితాలను ఇవ్వగలిగాలి. ఆర్థిక వృద్ధిని వేగవంతం చేయాలంటే వ్యాపారాలకు ఉన్న అడ్డంకుల్ని తొలగించాలి. భారీ నియంత్రణలు, అధ్వాన విధానాలు, అమలు వల్ల వృద్ధి మందగమనం పాలైందని పలు పరిశోధనల్లో తేలింది. అలాగే ఇన్‌స్పెక్టర్‌ రాజ్‌, తనిఖీలు, పరిశీలనలు వంటివి భారత్‌లో కంపెనీల వృద్ధికి అడ్డంకులుగా మారాయి.

దీర్ఘకాలంలో నిలదొక్కుకునేలా..
ఔత్సాహిక పారిశ్రామికవేత్తలకు ప్రోత్సాహం ఇచ్చే దిశగా మనం ఇంకా గేర్లు మార్చలేదు. వారికి అవసరమైన పథకాలను ప్రవేశపెట్టాల్సిన, సమీక్షించాల్సిన, సవరించాల్సిన అవసరం ఉంది. సంస్కరణల్లో మలిదశ అవసరం. 1991లో ప్రవేశపెట్టిన సంస్కరణలు ఉత్పత్తులకు స్వేచ్ఛా విపణిని ప్రసాదించాయి. ఇపుడు రాజకీయ ప్రక్రియల నుంచి వ్యాపారాలకు స్వేచ్ఛ ప్రసాదించాల్సిన అవసరం ఉంది. ఇందుకు నిర్మాణాత్మక, వేగవంతమైన, స్థిర సంస్కరణల ఆవిష్కరణ అవసరం. ప్రతిరోజూ పోరాటం చేసే ఔత్సాహిక పారిశ్రామికవేత్తలకు మన వైపు సహాయం రెండింతలు కావాలి. అపుడే వారు దీర్ఘకాలంలోనూ నిలదొక్కుకోగలుగుతారు.

వీటికి సమాధానాలు చెప్పాలి

విధానకర్తలు కొన్ని ప్రశ్నలకు సమాధానాలు చెప్పాల్సిన అవసరం ఉంది.
* కార్మికులు ఎక్కువగా ఉన్న ఆర్థిక వ్యవస్థ ఎందుకు ప్రధాన తయారీదారు లేదా ఎగుమతిదారుగా మారలేదు
* 70 శాతం మంది ఔత్సాహిక పారిశ్రామికవేత్తలు ఎందుకు ఏడాదిలోపే విఫలమవుతున్నారు
* మన వ్యాపారాల్లో 75 శాతం 10 మంది చేతుల్లోనే ఎందుకు ఉన్నాయి.
* ఓ వైపు 100 మీటర్ల రేసు.. మరో వైపు 10 కి.మీ. మారథాన్‌ జరుగుతున్న సమయంలో మన ఔత్సాహిక పారిశ్రామికవేత్తలు 800 మీటర్ల రేసును ఎందుకు ఎంచుకున్నారు.
(రచయిత సీనియర్‌ ఆర్థిక నిపుణులు)

ప్రధానాంశాలు

జిల్లా వార్తలు

దేవతార్చన


రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.