close
జీడీపీ పడిపోవడం వెనుక దశ తంటాలు

ఈనాడు వాణిజ్య విభాగం

‘దశ’తంటాలే దేశ ఆర్థిక వ్యవస్థను మందగమనాసుర గుప్పిట్లోకి తీసుకొచ్చాయి. మళ్లీ వృద్ధి గాడిన పడాలంటే మందగమనాసుర సంహారం జరగాలి. ప్రభుత్వం ఇప్పటికే ఆ ప్రయత్నాలు ప్రారంభించింది. అయితే రానున్న త్రైమాసికాల్లోనూ వృద్ధి నెమ్మదించడం కొనసాగుతుందని కొన్ని నివేదికలు చెబుతుండటం ఆందోళన కలిగిస్తోంది. ముందు అనుకున్నదాని కంటే మందగమనం మరింత కాలం కొనసాగొచ్చని డన్‌ అండ్‌ బ్రాడ్‌స్ట్రీట్‌ నివేదిక చెబుతోంది. ప్రస్తుత ఆర్థిక సంవత్సరానికి వృద్ధి రేటు అంచనాను 6.3 శాతం నుంచి 5.1 శాతానికి క్రిసిల్‌ తగ్గించింది. ఇవ్వన్నీ చూస్తుంటే ఇంకొన్నాళ్లు దశతంటాలు తప్పవేమో..!!

నరేంద్ర మోదీ 1.0
ప్రధాని నరేంద్ర మోదీ నేతృత్వంలో తొలిసారి ప్రభుత్వం కొలువుతీరాక వృద్ధి రేటు చకచకా ముందుకు సాగుతూ పోయింది. సగటున 8 శాతం స్థాయిల్లో ఉండేది.

నరేంద్ర మోదీ 2.0
నరేంద్ర మోదీ ప్రభుత్వం రెండోసారి అధికారంలోకి వచ్చాక ఇప్పటివరకు ప్రకటించిన రెండు త్రైమాసికాల్లోనూ జీడీపీ వృద్ధి 4-5 శాతం స్థాయిల్లో నమోదైంది.
అంటే అప్పటికీ ఇప్పటికీ వృద్ధి రేటు ఇంచుమించు సగానికి సగం తగ్గిందన్నమాట. పోనీ ఇక్కడితోనైనా ఈ మందగమనం ఆగుతుందా? అంటే చెప్పలేం. అలాగని మరింతగా పడిపోతుందా? అనేదీ బదులు దొరకని ప్రశ్నే. ప్రపంచంలోనే వేగవంత వృద్ధితో దూసుకెళ్తోన్న మన ఆర్థిక వ్యవస్థకు ఇలాంటి పరిస్థితి ఎందుకు దాపురించింది. దారితీసిన పరిణామాలేమిటో చూద్దామా..


పెద్ద నోట్ల రద్దు

2016 నవంబర్లో పెద్ద నోట్ల రద్దుకు తీసుకున్న నిర్ణయంతో ఆర్థిక మందగమనానికి బీజం పడిందన్నది కొందరి అభిప్రాయం. నగదు లభ్యత తగ్గడంతో కొనుగోళ్లు తగ్గాయి. దీంతో ఉత్పత్తిని తగ్గించుకోవాల్సిన పరిస్థితి ఏర్పడింది. ఈ ప్రభావం అటు కంపెనీల ఆదాయంపైనే కాదు.. ఉద్యోగాల తొలగింపు, వేతనాల కోతకూ దారితీసింది. వినియోగ ఆధారిత రంగాలు, చిన్న- మధ్య తరహా పరిశ్రమలు, స్థిరాస్తిపై నోట్ల రద్దు సెగ ఎక్కువగా ఎక్కువగా కనిపించింది.


జీఎస్‌టీ

జీఎస్‌టీ విధానం అమలులో కొన్ని లోపాలు కూడా దేశ వృద్ధి రేటును వెనక్కి లాగాయన్నది కొందరి విశ్లేషణ. కొత్త పన్ను విధానం కావడంతో లైసెన్సు తీసుకోవడం, రిటర్న్‌ల దాఖలు, పన్నుల చెల్లింపుపై అవగాహన లేమి కారణంగా వ్యాపారులు దీనికి తొందరగా అలవాటు పడలేకపోయారు. ఈ పరిణామం.. రిటర్న్‌ల దాఖలు, పన్ను చెల్లింపుల జాప్యానికి దారి తీసింది. దాంతో ప్రభుత్వ పన్ను వసూళ్లు తగ్గి వృద్ధి రేటుపై ప్రభావం పడింది.


వినియోగం

దేశంలో వినియోగం తగ్గడం వృద్ధికి అవరోధంగా నిలిచింది. ముఖ్యంగా వినియోగ ఆధారిత రంగాలైన వాహన, ఎఫ్‌ఎమ్‌సీజీలో గిరాకీ తగ్గుముఖం పట్టడం వృద్ధిపై తీవ్రంగానే ప్రభావం చూపింది. డబ్బులు ఒకరి నుంచి మరొకొరికి ఎంత ఎక్కువగా చేతులు మారితే అంతలా ప్రభుత్వానికి ఆదాయం పెరుగుతుంది. అలా కాకుండా అమ్మకాల్లేకుండా గిరాకీ స్తబ్దుగా ఉంటే అది ఆర్థిక వ్యవస్థకు ఏమాత్రం మంచిది కాదు. గత కొన్ని నెలలుగా జరుగుతోంది ఇదే.


ఎన్‌బీఎఫ్‌సీ సంక్షోభం

మొండి బకాయిలు గణనీయంగా పెరగడంతో కొన్నాళ్లుగా బ్యాంకులు రుణాలిచ్చే విషయంలో దూకుడును తగ్గించాయి. దీంతో ఎన్‌బీఎఫ్‌సీల వైపు రుణ గ్రహీతలు వెళ్లడం ప్రారంభించారు. అయితే 2018 సెప్టెంబరులో ఐఎల్‌అండ్‌ఎఫ్‌సీ సంక్షోభం తర్వాత వ్యవస్థలో ద్రవ్య కొరత ఏర్పడింది. బ్యాంకులు ఎన్‌బీఎఫ్‌సీలకు రుణాలివ్వడం తగ్గించాయి. ద్రవ్యలభ్యత తగ్గడంతో వినియోగంపైనా ప్రభావం పడింది. తద్వారా వృద్ధి నెమ్మదించేందుకు కారణమయ్యింది.


తగ్గిన పెట్టుబడులు

దేశ ఆర్థిక వ్యవస్థ పురోగతిలో పెట్టుబడులు కీలక పాత్ర పోషిస్తాయి. 8% దూకుడుతో సాగుతున్న వృద్ధి రేటుపై నమ్మకంతో అప్పట్లో చాలా మంది కార్పొరేట్లు, వ్యాపారులు పెట్టుబడులు పెట్టారు. ఇప్పడు వృద్ధి పడిపోవడంతో ఆ పెట్టుబడులపై ఆశించిన ప్రతిఫలాలు రాకపోగా.. మరిన్ని పెట్టుబడులు పెట్టేందుకు ముందుకు రావాలంటే వాళ్లు ఆలోచిస్తున్నారనే అభిప్రాయం వినిపిస్తోంది. ఇది కూడా దేశ ఆర్థిక వ్యవస్థను మందగమన బాట పట్టించింది.


అధిక ప్రభుత్వ వ్యయాలు

ద్రవ్యలోటు అదుపులో ఉండాలంటే ప్రభుత్వ వ్యయ కేటాయింపులు పరిమితంగా ఉండాలి. అయితే ఇటీవల కేటాయింపులను ప్రభుత్వం గణనీయంగా పెంచింది. ఇటీవలి ఉద్దీపన నేపథ్యంలో ప్రభుత్వం ఆదాయం గణనీయంగా తగ్గనుంది. వ్యయాలు పెరిగి ఆదాయం తగ్గితే ద్రవ్యలోటు బాగా పెరుగుతుంది. ఆరు నెలలకే నిర్దేశిత లక్ష్యాన్ని ద్రవ్యలోటు మించిపోయింది. వృద్ధి రేటు నెమ్మదించడానికి ద్రవ్యలోటు పెరిగిపోవడమూ ఓ కారణమే.


ఎగుమతుల క్షీణత

దేశ ఎగుమతులు గత కొన్ని నెలలుగా తగ్గుతూ వస్తున్నాయి. సెప్టెంబరులో గణనీయంగా 6.57 శాతం క్షీణించాయి. అక్టోబరులో ఈ స్థాయిలో లేకపోయినా క్షీణత మాత్రం కొనసాగింది. ప్రపంచవ్యాప్తంగా మందగమన పరిస్థితులు నెలకొనడం, ఆయా దేశాల మధ్య అనిశ్చితిలు, చైనా- అమెరికాల మధ్య వాణిజ్య యుద్ధం లాంటి పరిణామాలన్నీ దేశీయ ఎగుమతులు తగ్గడానికి దోహదం చేస్తున్నాయి. అయితే ఇదే సమయంలో దిగుమతులు కూడా తక్కువ స్థాయిలోనే ఉంటుండటంతో వాణిజ్యలోటుపై పెద్దగా ప్రభావం పడట్లేదు. అయినప్పటికీ.. ఎగుమతులు తగ్గుముఖం పట్టడం కూడా వృద్ధి రేటుపై కొంత మేర ప్రభావం చూపిందని అనేవాళ్లు లేకపోలేదు.


పారిశ్రామికోత్పత్తి డీలా

పారిశ్రామికోత్పత్తి వరుసగా రెండు నెలలుగా క్షీణిస్తూ వస్తోంది. ముఖ్యంగా తయారీ రంగం క్షీణించడం ఇందుకు కారణమవుతోంది. 2014-15 నుంచి 2018-19 మధ్య తయారీ రంగ వృద్ధి 2.8- 4.6% మధ్య ఉంటూ వస్తోంది. దేశ వృద్ధి రేటు 8 శాతాన్ని మించాలంటే తయారీ రంగంలో రెండంకెల వృద్ధి నమోదవ్వాలి. అలా కాకుండా తయారీలో నిస్తేజం అలుముకోవడం వృద్ధి రేటును వెనక్కి లాగింది. మరోవైపు వినియోగ ఆధారిత వస్తువులకు గిరాకీ నెమ్మదించడంతో ఈ రంగాల్లో తయారీ కూడా క్షీణించింది. వీటితో పాటు కీలక రంగాల ఉత్పత్తి వృద్ధి కూడా దశాబ్ద కాల కనిష్ఠానికి పడిపోయింది. ఇవ్వన్నీ జీడీపీ వృద్ధికి అవరోధంగా నిలిచాయి.


వాణిజ్య యుద్ధం

దేశ జీడీపీ వృద్ధి నెమ్మదించడానికి దేశీయ పరిణామాలు ఎంత కారణమో.. అంతర్జాతీయ అంశాలూ అంతే కారణం అవుతాయి. ఎందుకంటే ప్రపంచీకరణతో ప్రపంచంలో ఏ దేశంలో ఏ ఒక్క ప్రతికూల పరిణామం చోటుచేసుకున్నా ఆ ప్రభావం ఎంతో కొంత అన్ని దేశాలపైనా పడుతుంది. అందుకే ఇప్పుడు దిగ్గజ దేశాలైన అమెరికా- చైనాల మధ్య నెలకొన్న వాణిజ్య యుద్ధ వాతావరణం ప్రపంచ దేశాల వృద్ధి నెమ్మదించేందుకు పరోక్షంగా కారణం అవుతోంది. ఇందుకు భారత్‌ కూడా మినహాయింపు కాదు. ఆర్థికంగా బలమైన మూలాలు కలిగి ఉన్నప్పటికీ వాణిజ్య యుద్ధ ప్రభావం దేశ ఆర్థిక వ్యవస్థపై ఎంతో కొంత ఉండే అవకాశం ఉంటుందని విశ్లేషకులు అంటున్నారు. అందువల్ల వృద్ధి నెమ్మదించడానికి దీనిని కూడా ఓ కారణంగా చెబుతున్నారు.


ప్రపంచ మందగమనం

ప్రపంచంలో అత్యంత వేగంగా అభివృద్ధి చెందుతున్న దేశం ఇప్పటికీ భారతే. అటువంటి మనదేశ జీడీపీ వృద్ధి రేటే సగానికి సగానికి తగ్గినప్పుడు ఇతర దేశాల పరిస్థితేమిటో మనం అర్థం చేసుకోవచ్చు. అందుకే ప్రపంచ వృద్ధి కూడా తీవ్ర మందగమనంలో సాగుతోంది. బ్రెగ్జిట్‌ అమలు ప్రక్రియ ఆలస్యం, అమెరికా- చైనాల మధ్య వాణిజ్య యుద్ధం, ఆయా దేశాల మధ్య భౌగోళిక, రాజకీయ అనిశ్చితులు.. ఇలా పలు అంశాలు ఇందుకు కారణం. ప్రపంచ దేశాలు మందగమనంలో సాగుతున్నప్పుడు.. ఆయా దేశాల మధ్య వాణిజ్యంపై కచ్చితంగా ప్రభావం పడుతుంది. ప్రస్తుతం భారత్‌ కూడా ఇదే సమస్యను ఎదుర్కొంటుంది. ఎప్పుడైతే వాణిజ్యం తగ్గుతుందో.. అది దేశ వృద్ధికి అవరోధంగా నిలుస్తుంది.

ప్రధానాంశాలు

జిల్లా వార్తలు

దేవతార్చన


రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.