ఒదిగిపోతే.. ఎదుగుదల!

చాలా కంపెనీలు ఉద్యోగ ప్రకటనల్లో ‘క్యాండిడేట్‌ షుడ్‌ హ్యావ్‌ అడాప్టబిలిటీ స్కిల్‌ ఇన్‌ ఎనీ వర్క్‌ ఎన్విరాన్‌మెంట్‌’ అని పేర్కొనడం చూస్తున్నాం. సిచ్యుయేషన్‌ను బట్టి సింక్‌ అయిపోవాలన్నా, వర్క్‌ ఎన్విరాన్‌మెంట్‌లో అడాప్టబిలిటీ ఉండాలన్నా ఒక్కటే. సర్దుకుపోవడం. ఇదో కీలకమైన జీవన నైపుణ్యం!

కంపెనీల్లో పనివాతావరణం (వర్క్‌ ఎన్విరాన్‌మెంట్‌)లో ఎన్నో సవాళ్లు ఎదురవుతుంటాయి. 2020 ఏప్రిల్‌- మే నెలల్లో కొవిడ్‌ విపత్కర పరిస్థితుల కారణంగా కేంద్ర, రాష్ట్ర ప్రభుత్వాలు హఠాత్తుగా లాక్‌డౌన్‌ విధించడం, కంపెనీలు అప్పటికప్పుడు ‘వర్క్‌ ఫ్రమ్‌ హోమ్‌’ విధానానికి మారడమే ఇందుకు ఉదాహరణ. అప్పటివరకు మహానగరాల్లో భారీ టవర్స్‌లో వేలాది ఉద్యోగుల మధ్య, అన్ని వనరులతో పనిచేయడం నుంచి స్వస్థలంలో అంతంతమాత్రం సౌకర్యాలతో ఓ గదిలో ఒక్కరే కూర్చొని పనిచేయాలి. నిర్దేశించిన ఫలితాలు చూపించగలగాలి. ఇటువంటి కొత్త పరిస్థితులకు అనుగుణంగా చకచకా అన్నీ చక్కదిద్దుకొని నూతన పనివాతావరణంలో ఒద్దికగా ఒదిగిపోయినవారున్నారు. ఇప్పటికీ సతమతమవుతూ వర్చువల్‌ పని విధానంలో ఇమడలేకపోతున్నవారూ ఉన్నారు.

ఏమిటీ నైపుణ్యం?

మారుతున్న పరిస్థితులకు అనుగుణంగా ఎప్పటికప్పుడు తమ ఆలోచనా సరళిని వ్యవహార విధానాన్ని మార్చుకోగలిగే నేర్పరితనాన్నే అడాప్ట్టబిలిటీ అంటారు. ఈ ప్రపంచంలో ఏదీ స్థిరం కాదు. స్థిరంగా జరిగేదల్లా మార్పు అన్నారు. ఏ జీవన రంగమైనా చైతన్యశీలంగా మార్పులకు గురవుతుంటుంది. కాబట్టి ఇందుకు అనుగుణంగా తనను తాను మలుచుకునే (అడాప్టబిలిటీ) నేర్పు ఒక జీవన నైపుణ్యంగా, కెరియర్‌ ఉన్నతికి సోపానంగా వర్ధిల్లుతోంది. పరిస్థితులకు అనుకూలంగా మారడం అనే సామర్థ్యాన్ని అలవరచుకుంటే- అలవాటుగా మార్చుకుంటే అగోచరంగా వుండే అవకాశాలను అందరికంటే ముందు అందుకోవచ్చు.

- యస్‌.వి. సురేష్‌

Tags :