ముందే తెరవండి గేట్‌

బీటెక్‌ రెండో ఏడాది నుంచే..

గేట్‌.. అమ్మో మన వల్ల కాదు.. అనే భావన చాలామంది ఇంజినీరింగ్‌ విద్యార్థుల్లో కనిపిస్తుంది. కంప్యూటర్‌ సైన్స్‌, ఐటీ అభ్యర్థులైతే ఆ పరీక్షతో లాభం లేదని అటువైపే చూడటం లేదు. ఈ రెండు అభిప్రాయాలూ సరైనవి కావంటున్నారు నిపుణులు. ముందుగానే ప్రిపరేషన్‌ మొదలు పెడితే గేట్‌ గెలవడం సులువే అంటున్నారు. మారుతున్న పరిస్థితులకు అనుగుణంగా సీఎస్‌ వారికీ అవకాశాల గేట్‌లు తెరుచుకుంటున్నాయని చెబుతున్నారు. అందుకే అందరూ సమ్మర్‌ సెలవుల్లో సన్నద్ధత ప్రణాళికలు సిద్ధం చేసుకొని, విద్యా సంవత్సరం తొలి రోజు నుంచే ప్రిపరేషన్‌ ప్రారంభించాలని సూచిస్తున్నారు.

అత్యుత్తమ సంస్థల్లో పీజీ చేయటానికైనా, ఉద్యోగ సాధనకైనా మేలైన మార్గం ‘గేట్‌’ (గ్రాడ్యుయేట్‌ ఆప్టిట్యూడ్‌ టెస్ట్‌ ఇన్‌ ఇంజినీరింగ్‌) స్కోరు. జాతీయస్థాయిలో నిర్వహించే ఈ పరీక్షకు ఎంతో పోటీ ఉంటుంది. విద్యార్థులు దీన్ని కఠినమైన పరీక్షగా భావిస్తుంటారు. సన్నద్ధతలో సమస్యల వల్ల మాత్రమే అలా అనిపిస్తుంది. దీనిపై దృష్టి పెట్టిన వారు ఇంజినీరింగ్‌ చివరి వరకూ ఆగకుండా ముందుగానే ప్రిపరేషన్‌ ప్రారంభించాలని నిపుణులు చెబుతున్నారు. మిగతా బ్రాంచిలతో పోలిస్తే కంప్యూటర్‌ సైన్స్‌ వారికి గేట్‌ ద్వారా ప్రయోజనాలు పరిమితమనే అభిప్రాయం సరైనది కాదని పేర్కొంటున్నారు.

సీఎస్‌ విభాగంలో ఎంటెక్‌ చేసినవారికి ఎంఎన్‌సీలతో పోటీపడి మరీ అంకుర సంస్థలు జీతాలను అందిస్తున్నాయి. ఐఐటీలు, ఎన్‌ఐటీలు, ఐఐఐటీలు, బిట్స్‌ మొదలైన సంస్థల నుంచి పట్టా పొందిన వారికి జీతభత్యాలు ఏడాదికి రూ.7 లక్షల నుంచి రూ.36 లక్షల వరకూ ఉంటున్నాయి.

గేట్‌ ప్రఖ్యాతి దేశంలోనే కాకుండా, విదేశాలకూ వ్యాపించింది. విదేశీ విద్యాసంస్థలు కూడా గేట్‌ స్కోరును పరిగణనలోకి తీసుకుని ప్రవేశాలు కల్పిస్తున్నాయి.

గేట్‌ ప్రఖ్యాతి దేశంలోనే కాకుండా, విదేశాలకూ వ్యాపించింది. విదేశీ విద్యాసంస్థలు కూడా గేట్‌ స్కోరును పరిగణనలోకి తీసుకుని ప్రవేశాలు కల్పిస్తున్నాయి. సింగపూర్‌కు చెందిన నేషనల్‌ యూనివర్సిటీ ఆఫ్‌ సింగపూర్‌, నాన్‌యాంగ్‌ టెక్నలాజికల్‌ యూనివర్సిటీలూ, జర్మనీకి చెందిన టెక్నికల్‌ యూనివర్సిటీ ఆఫ్‌ మునాచ్‌, ఆర్‌డబ్ల్యూటీహెచ్‌ ఏచెన్‌ యూనివర్సిటీ వంటి ప్రముఖ సంస్థలూ గేట్‌ స్కోరు ద్వారా ప్రవేశాలు కల్పిస్తున్నాయి.
మనదేశంలోని ప్రముఖ విశ్వవిద్యాలయాల్లో పీజీ/ రిసెర్చ్‌ ప్రోగ్రామ్‌లు చేయాలనుకునే వారూ, ప్రభుత్వ రంగ సంస్థల్లో ఉద్యోగం సాధించాలనుకునేవారూ గేట్‌ రాస్తే తమ లక్ష్యాన్ని చేరుకోవచ్చు. ఐఐటీలు, ఎన్‌ఐటీలు, బిట్స్‌ (పిలానీ, హైదరాబాద్‌, గోవా), ఐఎస్‌ఐ కోల్‌కతా, సీఎంఐ చెన్నై వంటి ఎన్నో సంస్థలు గేట్‌ స్కోరు ద్వారా ప్రవేశాలను కల్పిస్తున్నాయి.
దేశంలోని ఉన్నత విద్యాసంస్థల్లో పీజీ కోర్సులు, పీహెచ్‌డీ ప్రవేశాలతోపాటు ఉపకారవేతనం పొందే వీలు గేట్‌ కల్పిస్తుంది. ఎన్‌ఐటీఐఈలో పీజీ డిప్లొమా ప్రవేశాలకూ, ఐఐఎంల్లో ఫెలో ప్రోగ్రాం ఇన్‌ మేనేజ్‌మెంట్‌ అడ్మిషన్లకూ ఈ స్కోరు తప్పనిసరి. బాబా అటామిక్‌ రిసెర్చ్‌ సెంటర్‌, డీఆర్‌డీఓ లాంటి పరిశోధన సంస్థలు కూడా తమ సంస్థల్లో నియామకాలకు గేట్‌ స్కోరును ప్రామాణికంగా తీసుకుంటున్నాయి.

బీటెక్ రెండో ఏడాది నుంచే...

గేట్‌కు దరఖాస్తు చేసుకోవడానికి వయఃపరిమితి లేకపోవడంతో ఎప్పుడో చదువు పూర్తిచేసుకున్నవారు, ఇప్పటికే ఉద్యోగం చేస్తున్నవారు కూడా దీనిని రాస్తుంటారు. పైగా జాతీయ స్థాయిలో నిర్వహించే పరీక్ష కాబట్టి, పోటీ ఎక్కువగానే ఉంటుంది. విద్యార్థుల విషయానికొస్తే.. మొదటిసారే ర్యాంకు సాధించేయాలనే వారి సంఖ్య పెరుగుతోంది. ఈ పోటీని తట్టుకుంటూ, విద్యార్థి చదువు పూర్తయిన వెంటనే తన లక్ష్యాన్ని చేరుకోవాలంటే ముందు నుంచే సన్నద్ధత ప్రారంభించాల్సి ఉంటుంది. అందుకు ఏది సరైన సమయం అని ఆలోచిస్తే.. బీటెక్‌ రెండో ఏడాది అని చెప్పవచ్చు.
విద్యార్థులకు ఇంజినీరింగ్‌ సబ్జెక్టులపై ఉన్న అవగాహనను గేట్‌లో పరీక్షిస్తారు. రెండు జనరల్‌ సబ్జెక్టులతోపాటు కొన్ని కోర్‌ సబ్జెక్టులను చదవడం అంటే.. ఏ విద్యార్థి అయినా కొంత కంగారు పడతాడు. కాబట్టి, కొంత ప్రణాళికాబద్ధమైన సన్నద్ధత అవసరమవుతుంది. అందుకని విద్యార్థులు తమ బీటెక్‌ రెండో ఏడాది నుంచే సన్నద్ధత ప్రారంభించవచ్చు. మొదటి ఏడాదిలో సాంకేతిక విద్యకు సంబంధించిన పరిజ్ఞానం మాత్రమే పరిచయం అవుతుంది కాబట్టి, రెండో ఏడాదిని సరైన సమయమని నిపుణులు చెబుతున్నారు.
పైగా పరీక్షలో అడిగే టెక్నికల్‌ సబ్జెక్టుల బోధన మూడు, నాలుగు సెమిస్టర్లలోనే ప్రారంభం అవుతుంది. యూనివర్సిటీ పరీక్షలకూ, గేట్‌ సిలబస్‌కూ మధ్య భేదం ఉన్నప్పటికీ రెండింటికీ మధ్య దగ్గరి సంబంధమూ ఉంది. ప్రామాణిక మెటీరియల్‌ను, రిఫరెన్స్‌ పుస్తకాలను ముందు నుంచే సిద్ధం చేసుకునే వీలుంటుంది. అలాగే సిలబస్‌ అంశాలను చర్చించుకోవడానికీ, కాన్సెప్టులపై పట్టు ఏర్పరచుకోవడానికీ, సిలబస్‌లోని అన్ని అంశాలపై అవగాహన తెచ్చుకోవడానికీ, సందేహాల నివృత్తికీ, ఎక్కువ సాధనకూ అవకాశం లభిస్తుంది.
ముందుగా నాన్‌ టెక్నికల్‌ అంశాలైన ఇంగ్లిష్‌, ఆప్టిట్యూడ్‌ టెస్ట్‌, ఇంజినీరింగ్‌ మేథమేటిక్స్‌ అంశాలతో ప్రిపరేషన్‌ ప్రారంభిస్తే మంచిది. ఆపై టెక్నికల్‌ అంశాలపై దృష్టి పెట్టొచ్చు.

సన్నద్ధత ఎలా?

* ముందుగా గేట్‌ సిలబస్‌ను సేకరించి పెట్టుకోవాలి. ఏ రకమైన ప్రశ్నలు అడుగుతున్నారో పరిశీలించుకోవాలి. బీ ప్రాథమికాంశాలపై ఎక్కువ దృష్టి పెట్టాలి. ఒక్కో సబ్జెక్టుకు కనీసం రెండు పుస్తకాలను ఎంచుకుంటే మేలు. బీ విద్యార్థికి తన బ్రాంచికి సంబంధించిన కోర్‌ సబ్జెక్టుల పరిచయం రెండో ఏడాదిలోనే పరిచయం అవుతుంది. కాబట్టి వాటిలో గేట్‌ సిలబస్‌ అంశాలపై ఎక్కువ దృష్టి పెట్టాలి. బీ ప్రతి సబ్జెక్టుకు సంబంధించి ఫార్ములాలకు, కీ పాయింట్లకు నోట్స్‌ సిద్ధం చేసుకోవాలి. బీ పునశ్చరణకు ఉపయోగపడేలా ప్రతి అంశానికి సంబంధించిన నోట్స్‌ను ఎప్పటికప్పుడు సిద్ధం చేసుకుంటే మంచిది. బీ సిలబస్‌కు సంబంధించి అడ్వాన్స్‌డ్‌ టాపిక్‌లు పరిచయమవుతుంటాయి. వాటికీ ప్రాధాన్యమివ్వాలి. బీ సెమిస్టర్‌ పూర్తవడంతోనే అప్పటివరకూ సిద్ధం చేసుకున్న అంశాలను పునశ్చరణ చేసుకుంటుండాలి. బీ ఏదైనా కొత్త కాన్సెప్టును ఎంచుకున్నపుడు అది చదవడం పూర్తయ్యాక/ దానిపై అవగాహన తెచ్చుకున్నాక దానికి సంబంధించిన మాదిరి ప్రశ్నలను సాధన చేస్తుండాలి. బీ అవసరమైతే కోచింగ్‌ సాయమూ తీసుకోవచ్చు.
ఇదంతా రెండు, మూడు సంవత్సరాల్లోనే జరగాలి. నాలుగో ఏడాదిని పూర్తిగా పునశ్చరణకూ, స్పష్టమైన అవగాహన లేని అంశాలకూ కేటాయించాలి. ఈ ఏడాదిలోనే వీలైనన్ని ఎక్కువ మాదిరి ప్రశ్నపత్రాలను సాధన చేయాలి. ఏవైనా తప్పులు జరిగితే కారణాలను కనుక్కొని సరి చేసుకోవాలి.

కంప్యూటర్‌ సైన్స్‌ సంగతేమిటి?

సాధారణంగా గేట్‌ అనగానే కోర్‌ సబ్జెక్టుల వారికే అన్న అభిప్రాయం ఉంది. కంప్యూటర్‌ సైన్స్‌/ ఐటీ విద్యార్థుల దగ్గరికొచ్చేసరికి ఉన్నతవిద్య చదవాలనుకునేవారికో, బోధన వృత్తిని చేపట్టాలనుకున్నవారికో పరిమితం అనే భావన పడిపోయింది. అందుకే చాలామంది సీఎస్‌/ఐటీ విద్యార్థులు దీనిపై దృష్టి పెట్టరు. కానీ ఆ అభిప్రాయాలు నిజం కాదు. సీఎస్‌ఈ విద్యార్థులకు కూడా గేట్‌ ద్వారా ఎన్నో అవకాశాలు లభిస్తున్నాయి. పవర్‌ గ్రిడ్‌, ఐఓసీఎల్‌, ఓఎన్‌జీసీ వంటి పీఎస్‌యూల్లో గేట్‌ ఆధారంగా వీరికి ఉద్యోగాలు ఇస్తున్నారు. బార్క్‌, ఇస్రోల్లోనూ వీరికి అవకాశాలు ఉంటున్నాయి. గేట్‌ స్కోరు ద్వారా సుప్రసిద్ధ సంస్థల్లో ప్రవేశించి ఎంటెక్‌ చేస్తే మంచి భవిష్యత్తు ఉంటుంది. బహుళజాతి సంస్థలు వారిని ఉద్యోగాల్లో నియమించుకోవటానికి ఆసక్తి చూపుతున్నాయి. ఎందుకంటే ఐటీ కంపెనీలు ఉద్యోగార్థుల్లో టెక్నాలజీ నైపుణ్యం మాత్రమే చూడటం లేదు. అత్యాధునిక సాంకేతిక అంశాలపై వారు తరచూ శిక్షణ ఇస్తూనేవుంటారు. సబ్జెక్టు సూత్రాలపై మంచి అవగాహన ఉన్నవారికి ఆ సంస్థలు ప్రాధాన్యం ఇస్తున్నాయి. ఆ అవగాహనను నిర్ధారించే పరీక్షగా గేట్‌ను ఈ నియామక సంస్థలు భావిస్తున్నాయి. గేట్‌లో మంచి స్కోరుంటే సబ్జెక్టుపై గట్టి పట్టు ఉన్నట్టుగా పరిగణిస్తున్నాయి. అందుకే సీఎస్‌ఈ విద్యార్థులు గేట్‌పై తప్పకుండా దృష్టిసారించాలి.

సాఫ్ట్‌వేర్‌ నిపుణులకు గిరాకీ

ప్రతి పరిశ్రమలోనూ సాఫ్ట్‌వేర్‌ నిపుణులకు ఆదరణ పెరుగుతోంది. స్టార్టప్‌ సంస్థలతోపాటు, మార్కెట్‌లో నిలదొక్కుకున్న సంస్థల వరకూ వీరి అవసరం ఎక్కువగా ఉంది. సీఎస్‌ విభాగంలో ఎంటెక్‌ చేసినవారికి వస్తు ఆధారిత ఎంఎన్‌సీలతో పోటీపడి మరీ అంకుర సంస్థలు జీతాలను అందిస్తున్నాయి. ఐఐటీలు, ఎన్‌ఐటీలు, ఐఐఐటీలు, బిట్స్‌ మొదలైన సంస్థల నుంచి పట్టా పొందినవారికి జీతభత్యాలు ఏడాదికి రూ.7 లక్షల నుంచి రూ.36 లక్షల వరకూ ఉంటున్నాయి. ఇవేకాకుండా ఇంకా అవకాశాలున్నాయి.
రిసెర్చ్‌ అండ్‌ సైంటిస్ట్స్‌: గూగుల్‌, మైక్రోసాఫ్ట్‌ రిసెర్చ్‌, ఐబీఎం రిసెర్చ్‌, జిరాక్స్‌, శామ్‌సంగ్‌ రిసెర్చ్‌ అండ్‌ డెవలప్‌మెంట్‌, ఇన్ఫోసిస్‌ ల్యాబ్స్‌ మొదలైన వస్తు ఆధారిత సంస్థలు; డీఆర్‌డీఓ, ఇస్రో, బార్క్‌, బెల్‌ వంటి ప్రభుత్వ ఏజెన్సీలు వివిధ విభాగాల్లో స్పెషలైజేషన్‌ చేసిన పోస్ట్‌గ్రాడ్యుయేట్లను తీసుకుంటాయి. అభివృద్ధి చెందుతున్న డొమైన్లు- క్లౌడ్‌ కంప్యూటింగ్‌, బిగ్‌డేటా, ఆర్టిఫిషియల్‌ ఇంటెలిజెన్స్‌, మెషిన్‌ లర్నింగ్‌, డేటా సైన్స్‌ మొదలైన వాటిల్లో నైపుణ్యం సాధించడం ద్వారా వీటిల్లో మంచి కెరియర్లను నిర్మించుకోవచ్చు.
అనలిస్ట్‌, బ్యాంకింగ్‌ సాఫ్ట్‌వేర్‌ ఇంజినీర్స్‌: ఇన్వెస్టింగ్‌ బ్యాంక్‌, స్టాక్‌ అనాలిసిస్‌ వంటి పలు సంస్థలు క్వాంట్‌ అనలిస్ట్‌లను మంచి జీతంతో నియమించుకుంటున్నాయి. ట్రేడింగ్‌ అల్గారిథమ్‌లో స్పెషలైజ్‌ చేయడం ద్వారా కూడా మంచి ఉద్యోగావకాశాలను సొంతం చేసుకోవచ్చు.

- శ్రీకాంత్‌ వర్మ చేకూరి, ఐఐఎస్సీ (గేట్‌-2007లో ఆలిండియా రెండో ర్యాంకర్‌)
https://gate.appliedcourse.com

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి