Corona:చిన్నారులకు కొవిడ్‌ నుంచి రక్షణ ఇలా.. - ayush ministry issues guidelines to protect children from covid19 all you need to know
close
Published : 15/06/2021 01:12 IST
Facebook Share Twitter Share WhatsApp Share Telegram Share Link Share

Corona:చిన్నారులకు కొవిడ్‌ నుంచి రక్షణ ఇలా..

మార్గదర్శకాలు జారీ చేసిన ఆయుష్‌ మంత్రిత్వ శాఖ

దిల్లీ: భారత్‌లో కరోనా ప్రభావం మొదలైనప్పటి నుంచి చిన్నారుల్లో మహమ్మారి ప్రభావం చాలా తక్కువగా ఉంది. వారిలో సహజసిద్ధమైన రోగ నిరోధక శక్తి వారిని సంరక్షిస్తోంది. మరోవైపు కరోనా థర్డ్‌ వేవ్‌లో చిన్నారులకు ముప్పు ఎక్కువగా ఉంటుందని నిపుణులు హెచ్చరిస్తున్నారు. ఈ నేపథ్యంలో కేంద్ర ఆయుష్‌ మంత్రిత్వ శాఖ చిన్నారులకు కరోనా సోకకుండా నియంత్రించేందుకు పలు మార్గదర్శకాలను విడుదల చేసింది. చిన్నారుల్లో కరోనా ప్రభావం చాలా తక్కువగా ఉన్నప్పటికీ వైరస్‌ సోకకుండా ముందు జాగ్రత్తలు తీసుకోవడం మంచిదని ఆయుష్‌ శాఖ తమ నివేదికలో పేర్కొంది. కరోనా వైరస్‌ పలు రకాలుగా మ్యుటేట్‌ చెందుతున్న నేపథ్యంలో అందరూ కొవిడ్‌-19 నిబంధనలు పాటించాలని వారు సూచించారు.

తల్లిదండ్రులు ఏం చేయాలంటే..

కరోనా మహమ్మారి తీవ్రత, ప్రభావంపై చిన్నారులకు అవగాహన ఉండని కారణంగా తల్లిదండ్రులు పలు జాగ్రత్తలు తీసుకోవాలని ఆయుష్‌శాఖ సూచించింది. చిన్నారులు తరచూ చేతులు కడుక్కోవడం, మాస్కు ధరించడం వంటి వాటిపై వారికి ఆసక్తి కలిగించాలని ఆయుష్‌ శాఖ తెలిపింది. వారికి ఈ జాగ్రత్తలు అలవాటయ్యేవరకు చిన్న చిన్న బహుమతులు ఇవ్వడం వల్ల ప్రయోజనం ఉంటుందని వారు తెలిపారు.  5 నుంచి 18 ఏళ్లలోపు వారికి మాస్కు తప్పనిసరి అని వారు పేర్కొన్నారు. అంత కంటే చిన్న వయసున్న పిల్లలను తల్లిదండ్రులు జాగ్రత్తగా పర్యవేక్షించాలని తెలిపారు. మూడు పొరలుండి ఆకర్షణీయంగా ఉండే మాస్కులను వారికి అందించాలన్నారు. వీలైనంత వరకు చిన్నారులు ఇళ్లల్లో ఉండేలా చూడాలని వారు సూచించారు. సన్నిహితులకు దగ్గరగా ఉండేందుకు వీడియో కాల్స్‌ మాట్లాడించాలని ఆ మార్గదర్శకాల్లో పేర్కొన్నారు.

వ్యాయామం, వ్యక్తిగత శుభ్రత..

కరోనా నియంత్రణలో వ్యక్తిగత శుభ్రత కీలక పాత్ర పోషిస్తుందని అనేక పరిశోధనలు వెల్లడించాయి. ఈ నేపథ్యంలో చిన్నారులు రెండు పూటలానోటిని బ్రష్‌ చేసుకోవడంతో పాటు వేడి నీటిని తాగాలని ఆయుష్‌ శాఖ సూచించింది. ప్రాణాయామం వంటి శ్వాసకు సంబంధించిన చిన్న చిన్న వ్యాయామాలు చేయాలని వారు పేర్కొన్నారు. తాజా ఆహారంతో పాటు సరిపడినంత సమయం నిద్రకు కేటాయించాలని వారు సూచించారు.

ఒక వేళ చిన్నారులకు ఐదు రోజులకు పైగా జ్వరం, శ్వాస తీసుకోవడంలో ఇబ్బందులు ఎదురైతే వైద్యులను సంప్రదించాలని ఆయుష్‌ శాఖ సూచించింది. లక్షణాలున్న చిన్నారులకు వృద్ధులకు దూరంగా ఉంచి పర్యవేక్షించాలని వారు తెలిపారు.



మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

ఇంటర్వ్యూ

మరిన్ని

కొత్త పాట గురూ

మరిన్ని