ఇంటర్నెట్‌ డెస్క్: శ్రీదేవి తనయ జాన్వీ కపూర్‌ వైవిధ్యమైన పాత్రలు చేస్తూ ప్రేక్షకులను అలరిస్తోంది. తాజాగా ఆమె నటించిన ‘రూహి’ చిత్రం మార్చి 11న విడుదల కానుంది. హార్దిక్‌ మెహతా దర్శకత్వంలో తెరకెక్కిన ఈ సినిమాలో రాజ్‌కుమార్‌ రావ్‌ కీలక పాత్ర పోషిస్తున్నారు. మరోవైపు జాన్వీ ప్రస్తుతం ‘గుడ్‌ లక్‌ జెర్రీ’ సినిమా షూటింగ్‌లో బిజీగా ఉంది. మార్చి 6న ఈ అందాల భామకి 24 ఏళ్లు నిండుతాయి. ఆమె తన పుట్టినరోజును ఎక్కడ జరుపుకొంటారనే విషయంపై స్పందిస్తూ..

‘‘ప్రస్తుతం నేను ‘గుడ్‌ లక్‌ జెర్రీ’ చిత్రంలో బిజీగా ఉన్నా. ఇప్పట్లో సెలవు తీసుకోవడం సాధ్యమయ్యే పనికాదు. అందుకే నాన్న (బోనీకపూర్‌) చెల్లి (ఖుషి కపూర్‌) నా పుట్టినరోజుకి ఇక్కడే వస్తారని భావిస్తున్నా. అయినా పుట్టినరోజున పని చేయడం కంటే నచ్చే అంశం మరొకటి  ఏముంటుంది. చిత్రసీమలో పనిదొరకడం చాలా కష్టం. ఇలాంటి సమయంలో పనిచేయడం నా అదృష్టం. నా పుట్టినరోజుకి ఐస్‌క్రీమ్‌ కేక్‌లు కావాలని మా దర్శకుడు (సిద్దార్థ్ సేన్‌ గుప్తా)కి చెప్పాను’’

‘‘అమ్మ (శ్రీదేవి)లా నేను నటించలేను. సరైన పాత్రలు ఎంచుకోవడం, వాటికి తగ్గట్లు నటించడం సంతోషంగా ఉంది. అమ్మకు నాకూ ఏదైనా సారూప్యత ఉందంటే? అది ఆమె నేను స్విచ్‌ ఆన్‌, స్విచ్‌ ఆఫ్‌ నటిని. ‘గుంజన్‌ సక్సేనా’, ‘రూహి’ షూటింగ్‌ సమయాల్లో ఫస్ట్ టేక్‌లోనే సన్నివేశాలు చేశాను. ఇప్పుడు తెరపైకి రాబోయో ‘రూహి’ చిత్రం పూర్తి భిన్నమైంది. ఇది కొత్త జోనర్‌లోకి వెళ్లడానికి అవకాశం కల్పిస్తోందని అనుకుంటున్నా’’ అని తెలిపారు.