‘‘కోలు కోలమ్మా.. కోలో కోలో.. నా సామి.. మనసే మేలుకొని చూసే.. కలలో నిండిన వాడే.. కనులా ముందర ఉంటే... నూరేళ్లు నిదుర రాదులే’’ అంటూ మనసిచ్చిన వాడికోసం ప్రేమగీతాలు ఆలపిస్తోంది సాయిపల్లవి. మరి ఆమె మనసు దోచుకున్న ఆ అందగాడు ఎవరు?
వీళ్లిద్దరి ప్రేమకథ ఏమైంది? అన్నది తెలుసుకోవాలంటే ‘విరాటపర్వం’ చూడాల్సిందే. రానా కథానాయకుడిగా నటిస్తున్న చిత్రమిది. వేణు ఊడుగుల దర్శకుడు. సుధాకర్‌ చెరుకూరి నిర్మాత. ప్రియమణి, నందితా దాస్‌, నివేదాపేతురాజ్‌ ముఖ్య పాత్రల్లో నటించారు. సురేష్‌ బొబ్బిలి స్వరాలందించారు. ఏప్రిల్‌ 30న విడుదలవుతోంది. ఈ నేపథ్యంలోనే గురువారం ఈ చిత్రం నుంచి తొలి లిరికల్‌ గీతాన్ని విడుదల చేశారు హీరో వెంకటేష్‌. ‘కోలు కోలు’’ అంటూ సాగే ఈ పాటకు చంద్రబోస్‌ చక్కటి సాహిత్యాన్ని అందించగా.. దివ్య మాలిక్‌, సురేష్‌ బొబ్బిలి ఆకట్టుకునేలా ఆలపించారు.