‘‘ప్రతి నటుడికీ తన కెరీర్‌లో ఏదో ఒక సందర్భంలో ఓ పెద్ద విజయాన్నిచ్చే సినిమా వస్తుంది. సందీప్‌కిషన్‌కి ‘ఏ1 ఎక్స్‌ప్రెస్‌’ అలాంటి ఫలితాన్నిచ్చే సినిమా అవుతుంది’’ అన్నారు యువ కథానాయకుడు రామ్‌. ఆయన హైదరాబాద్‌లో జరిగిన ‘ఏ1 ఎక్స్‌ప్రెస్‌’ విడుదల ముందస్తు వేడుకకి ముఖ్య అతిథిగా హాజరయ్యారు. సందీప్‌కిషన్‌, లావణ్య త్రిపాఠి జంటగా నటించిన చిత్రమిది. డెన్నిస్‌ జీవన్‌ కనుకొలను దర్శకత్వం వహించారు. టి.జి.విశ్వప్రసాద్‌, అభిషేక్‌ అగర్వాల్‌, సందీప్‌కిషన్‌, దయా పన్నెం సంయుక్తంగా నిర్మించారు. హాకీ నేపథ్యంలో సాగే ఈ సినిమా ఈ నెల 5న ప్రేక్షకుల ముందుకొస్తోంది. రామ్‌ మాట్లాడుతూ ‘‘నిర్మాతలే నిజమైన హీరోలు.  కరోనా కష్టాల్లోనూ సినిమాలు తీసి విడుదల చేస్తున్నార’’ ని చెప్పారు. ‘‘రామ్‌లా నేనెందుకు డ్యాన్స్‌లు చేయడం లేదనిపిస్తుంది. సినిమా అదిరిపోయేలా ఉంటుంది. మనం కోరుకునే సంబరాలన్నీ ఇందులో ఉంటాయి’’ అన్నారు సందీప్‌కిషన్‌. ఈ కార్యక్రమంలో జెమినీ కిరణ్‌, అనిల్‌ సుంకర, ఎం.ఎల్‌.కుమార్‌చౌదరి, జి.నాగేశ్వర్‌రెడ్డి, వి.ఎన్‌.ఆదిత్య, కోన వెంకట్‌, అభిషేక్‌ అగర్వాల్‌, ఛోటా కె.నాయుడు, వివేక్‌కూచిభొట్ల తదితరులు పాల్గొన్నారు.