Team India: కృనాల్‌, చాహల్‌, కృష్ణప్పను వదిలేసొచ్చిన టీమ్‌ఇండియా - telugu news team india rechead bangaluru players tested positive are still in sri lanka
close
Published : 31/07/2021 01:11 IST
Facebook Share Twitter Share WhatsApp Share Telegram Share Link Share

Team India: కృనాల్‌, చాహల్‌, కృష్ణప్పను వదిలేసొచ్చిన టీమ్‌ఇండియా

ఇంగ్లాండ్‌కు పయనంకానున్న సూర్యకుమార్‌, పృథ్వీ షా

ఇంటర్నెట్‌డెస్క్‌: శ్రీలంకతో పరిమిత ఓవర్ల క్రికెట్‌ కోసం అక్కడికి వెళ్లిన టీమ్‌ఇండియా ఆటగాళ్లు కొద్దిసేపటి క్రితమే బెంగళూరుకు చేరుకున్నారు. అయితే, కరోనా వైరస్‌ బారిన పడిన ముగ్గురు ఆటగాళ్లు మాత్రం అక్కడే ఉండిపోయారు. ప్రస్తుతం వారు ప్రత్యేక ఐసోలేషన్‌ కేంద్రంలో ఉన్నారు. టీమ్‌ఇండియా గురువారమే మూడు టీ20ల సిరీస్‌ పూర్తి చేసుకుంది. ఈ క్రమంలోనే ఆటగాళ్లు శుక్రవారం భారత్‌కు తిరుగు ప్రయాణమయ్యే ముందు నిర్వహించిన కరోనా పరీక్షల్లో యుజువేంద్ర చాహల్‌, కృష్ణప్ప గౌతమ్‌కు పాజిటివ్‌గా తేలింది. దీంతో వారు కూడా అక్కడే ఉండిపోవాల్సి వచ్చింది.

ఇక రెండో టీ20కి ముందు తొలుత కృనాల్‌ పాండ్యకు పాజిటివ్‌గా తేలిన సంగతి తెలిసిందే. అదే సమయంలో అతడితో సన్నిహితంగా మెలిగిన మరో ఎనిమిది ఆటగాళ్లు ఐసోలేషన్‌కు వెళ్లారు. అందులో చాహల్‌, కృష్ణప్ప సైతం ఉన్నారు. వారికి వైరస్‌ సోకిందని తెలుస్తోంది. కాగా, వీరంతా బుధ, గురువారాల్లో జరిగిన రెండు టీ20ల్లో పాల్గొనలేదు. కీలక ఆటగాళ్లంతా లేకపోవడంతో అనుభవం లేని యువకులు శ్రీలంక చేతిలో ఓటమిపాలయ్యారు. దాంతో ఆతిథ్య జట్టు 2-1 తేడాతో సిరీస్‌ కైవసం చేసుకుంది. ఇక కృనాల్‌కు కరోనా సోకాక ఐసోలేషన్‌లోకి వెళ్లిన ఆటగాళ్లలో హార్దిక్‌ పాండ్య, మనీశ్‌ పాండే, ఇషాన్‌ కిషన్‌, సూర్యకుమార్‌ యాదవ్‌, పృథ్వీ షా, దీపక్‌ చాహర్‌కు నెగిటివ్‌గా తేలడంతో వారంతా తిరిగి బెంగళూరుకు చేరుకున్నారు.

నాటింగ్‌హామ్‌కు సూర్య, పృథ్వీ..

మరోవైపు ఇంగ్లాండ్‌లో పర్యటిస్తున్న టీమ్‌ఇండియాలో అవేశ్‌ ఖాన్‌, వాషింగ్టన్‌ సుందర్‌ గాయపడిన సంగతి తెలిసిందే. దాంతో వారి స్థానాల్లో శ్రీలంక పర్యటనకు వెళ్లిన పృథ్వీ, సూర్యకుమార్‌ను భర్తీ చేయాలని జట్టు యాజమాన్యం నిర్ణయించింది. ఈ క్రమంలోనే వారిద్దరూ నేరుగా నాటింగ్‌హామ్‌కు బయలుదేరనున్నారు. అక్కడ చేరుకున్నాక కొద్దిరోజులు కఠిన క్వారంటైన్‌లో ఉండి ఆపై జట్టుతో కలవనున్నారు. ఇక కోహ్లీసేన నేటితో తమ ప్రాక్టీస్‌ సెషన్‌ను పూర్తి చేసుకుంది. ఆగస్టు 4 నుంచి ఇంగ్లాండ్‌తో తొలి టెస్టు ఆడేందుకు సిద్ధమైంది.



మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

ఇంటర్వ్యూ

మరిన్ని

కొత్త పాట గురూ

మరిన్ని