Tokyo Olympics: నాగల్‌, మనికా ముందంజ.. సాయి ప్రణీత్‌ నిరాశ - telugu news tokyo olympics updates nagal manika batra won in first round
close
Published : 24/07/2021 14:13 IST
Facebook Share Twitter Share WhatsApp Share Telegram Share Link Share

Tokyo Olympics: నాగల్‌, మనికా ముందంజ.. సాయి ప్రణీత్‌ నిరాశ

టోక్యో: వెయిట్‌ లిఫ్టర్‌ మీరాబాయి చాను సాధించిన రజత పతకంతో టోక్యో ఒలింపిక్స్‌లో బోణీ కొట్టిన భారత్‌కు మిగతా క్రీడా విభాగాల్లో మిశ్రమ ఫలితాలు లభిస్తున్నాయి. టెన్నిస్‌, టేబుల్‌ టెన్నిస్‌లో దేశీయ ఆటగాళ్లు సుమిత్ నాగల్‌, మనికా బాత్రా తొలి రౌండ్‌ నెగ్గగా.. ఆర్చరీ మిక్స్‌డ్‌ టీమ్‌ ఈవెంట్‌లో భారత పోరు ముగిసింది. 

వరల్డ్‌ నం. 3 జోడీకి చిరాగ్‌- సాత్విక్‌ షాక్‌

బ్యాడ్మింటన్‌ పురుషుల డబుల్స్‌ గ్రూప్‌ మ్యాచ్‌లో భారత్‌ శుభారంభం చేసింది. ప్రపంచ నంబరు 3 జోడీపై చిరాగ్‌ శెట్టి - సాత్విక్‌ ద్వయం విజయం సాధించింది. చైనీస్‌ తైపీ ఆటగాళ్లు యాంగ్‌ లీ - చిన్‌ లిన్‌ వాంగ్‌ జోడీపై 21-16, 16-21, 27-24తో గెలుపొందింది.

అయితే బ్యాడ్మింటన్‌ గ్రూప్‌ మ్యాచ్‌లో భారత షట్లర్‌ సాయి ప్రణీత్‌ మాత్రం నిరాశపర్చాడు. ఇజ్రాయెల్‌ ఆటగాడు జిల్‌బర్మన్‌ మిషా చేతిలో 17-21, 15-21 తేడాతో ఓటమిపాలయ్యాడు.

పురుషుల టెన్నిస్‌లో నాగల్‌ చారిత్రక విజయం

టెన్నిస్‌లో భారత ఆటగాడు సుమిత్ నాగల్‌ సత్తా చాటాడు. పురుషుల సింగిల్స్‌ తొలి రౌండ్‌లో ఉజ్బెకిస్థాన్‌ క్రీడాకారుడు డెన్నిస్‌ ఇస్తోమిన్‌పై 6-4, 6-7, 6-4 తేడాతో నాగల్‌ గెలుపొందాడు. ఒలింపిక్‌ క్రీడల్లో పురుషుల సింగిల్స్‌లో విజయం సాధించిన భారత మూడో ఆటగాడు ఇతడే కావడం విశేషం. అంతకుముందు 1988 సియోల్‌ గేమ్స్‌లో జీషన్‌ అలీ, 1996 అట్లాంటా ఒలింపిక్స్‌లో లియాండర్‌ పేస్‌ సింగిల్స్‌ విభాగంలో విజయం సాధించారు. ఆ ఏడాది పేస్‌ కాంస్య పతకం కూడా సాధించాడు. 25ఏళ్ల తర్వాత నాగల్‌ మళ్లీ తొలి రౌండ్‌లో విజయం సాధించి ఒలింపిక్‌ పతకంపై ఆశలు రేపుతున్నాడు.

ఇక టేబుల్‌ టెన్నిస్‌ మహిళల సింగిల్స్‌ తొలి రౌండ్‌లో భారత్‌ విజయం సాధించింది. గ్రేట్‌ బ్రిటన్‌ క్రీడాకారిణి టిన్‌ టిన్‌ హోపై 4-0తో మనికా బాత్రా గెలుపొందింది. అయితే అంతకుముందు టేబుల్‌ టెన్నిస్‌ మిక్స్‌డ్‌ డబుల్స్‌ ప్రిక్వార్టర్స్‌లో శరత్‌ కమల్‌ - మనికా బాత్రా ద్వయం ఓటమిపాలైంది.

దీపిక, ప్రవీణ్‌ జోడీ.. ప్చ్‌

ఆర్చరీ మిక్స్‌డ్‌ టీమ్‌ ఈవెంట్‌లో భారత్‌ పోరు ముగిసింది. క్వార్టర్‌ ఫైనల్‌లో దక్షిణ కొరియా చేతిలో దీపిక కుమారి, ప్రవీణ్‌ జాదవ్‌ జోడీ 2-6 తేడాతో ఓటమిపాలైంది. ఇక 10 మీటర్ల పురుషుల ఎయిర్ పిస్టల్‌ విభాగం ఫైనల్‌లో కూడా భారత్‌కు ఓటమి తప్పలేదు.

ఈ విభాగంలో అర్హత పోటీల్లో సత్తా చాటిన యువ షూటర్‌ సౌరభ్‌ చౌదరి.. రెండో ఎలిమినేషన్‌లో ఏడో స్థానంతో సరిపెట్టుకున్నాడు. దీంతో పోటీ నుంచి నిష్క్రమించాడు.



మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

ఇంటర్వ్యూ

మరిన్ని

కొత్త పాట గురూ

మరిన్ని