హైదరాబాద్‌: ఎన్టీఆర్‌ అభిమానులకు శుభవార్త. త్రివిక్రమ్‌ దర్శకత్వంలో ఆయన కథానాయకుడిగా ఓ సినిమా తెరకెక్కనున్న సంగతి తెలిసిందే. ఈ సినిమాకు సంబంధించి త్వరలోనే ఓ గుడ్‌న్యూస్‌ను అభిమానులు వినబోతున్నారు. తాజాగా ఎన్టీఆర్‌ను త్రివిక్రమ్‌ కలిశారు. నూతన సంవత్సర శుభాకాంక్షలు చెబుతూ పుష్పగుచ్ఛాన్ని ఇచ్చారు. ఈ విషయాన్ని చెబుతూ, చిత్ర బృందం వారి ఫొటోలను పంచుకుంది. త్వరలోనే పట్టాలెక్కనున్న ‘#NTR30’ అంటూ ఈ చిత్ర నిర్మాతల్లో ఒకరైన నాగవంశీ పేర్కొన్నారు.

ఇప్పటికే కథ ఓకే కాగా, స్క్రిప్ట్‌ వర్క్‌ కూడా అయిపోయినట్లు సమాచారం. ఈ సినిమాకు ‘అయిననూ హస్తినకు పోయి రావలె’ అనే టైటిల్‌ కూడా పరిశీలిస్తున్నట్లు ప్రచారం సాగుతోంది. నటీనటులు, సాంకేతిక బృందాన్ని ఎంపిక చేసే పనిలో ఉన్నారు. ఈ నేపథ్యంలో ఎన్టీఆర్‌-త్రివిక్రమ్‌ కలవడం ఆసక్తిని కలిగిస్తోంది. కొత్త సంవత్సరం సందర్భంగా ఏదైనా న్యూస్‌ ఉంటుందని ఆశించిన అభిమానులు కాస్త నిరాశపడ్డారు. అయితే, సంక్రాంతి సందర్భంగా ఆ న్యూస్‌ చెబుతారా? లేదా? తెలియాలంటే ‘అయిననూ ఇంకొన్ని రోజులు వేచి చూడవలె’!. ప్రస్తుతం ఎన్టీఆర్‌ ‘ఆర్‌ఆర్‌ఆర్‌’లో నటిస్తున్నారు. రాజమౌళి దర్శకత్వం వహిస్తున్న ఈ చిత్రం శరవేగంగా చిత్రీకరణ జరుపుకొంటోంది. ఇది పూర్తయిన వెంటనే త్రివిక్రమ్‌ సినిమా పట్టాలెక్కనుంది.

ఇవీ చదవండి..

‘గాజు ముక్క కూడా వేస్టే.. కానీ కంట్లో పడితే’

‘లూసిఫర్‌’ రీమేక్‌లో సత్యదేవ్‌..?