Covid: కుటుంబమంతా ఛిన్నాభిన్నమైంది: మహిళా క్రికెటర్‌ వేద  - we were broken to pieces veda krishnamurthy recalls covid trauma
close
Published : 03/06/2021 01:34 IST
Facebook Share Twitter Share WhatsApp Share Telegram Share Link Share

Covid: కుటుంబమంతా ఛిన్నాభిన్నమైంది: మహిళా క్రికెటర్‌ వేద 

బెంగళూరు: కొవిడ్‌-19 తమ జీవితాలను పూర్తిగా కుదిపేసిందని టీమ్‌ఇండియా మహిళా క్రికెటర్‌ వేద కృష్ణమూర్తి తెలిపింది. తన తల్లి, సోదరి చనిపోవడంతో పూర్తిగా విషాదంలో మునిగిపోయానని ఆవేదన వ్యక్తం చేసింది. క్లిష్ట పరిస్థితుల్లో మానసిక ఆరోగ్య పరిస్థితి ఎంతో కీలకమని వెల్లడించింది. ఇప్పుడిప్పుడే ఆ బాధల నుంచి కోలుకుంటున్నానని వివరించింది.

వేద కృష్ణమూర్తి కుటుంబం బెంగళూరులో నివసిస్తోంది. ఆమెకు తప్ప కుటుంబంలో చిన్నారులు సహా మొత్తం తొమ్మిది మందికి కొవిడ్‌ సోకింది. దాంతో వైద్యానికి సంబంధించిన ప్రతిదీ తనే చూసుకుంది. అయినప్పటికీ వేద తల్లి, సోదరి మృతిచెందడం అందరినీ కలచివేసింది.

‘విధి ఎలా ఉంటే అలా జరుగుతుందని నా నమ్మకం. కానీ మా అక్క ఇంటికి తిరిగొస్తుందనే అనుకున్నా. ఆమె కూడా చనిపోవడంతో నేను పూర్తిగా చితికిపోయా. మా కుటుంబమంతా ఛిన్నాభిన్నం అయింది. అప్పుడు నేనెంతో ధైర్యవంతురాలిలా ఉండాలనుకున్నాను. జీవితం ఎదురొడ్డిన ఆ పరీక్షా సమయంలో బాధల నుంచి బయట పడేందుకు ప్రయత్నించాను. కానీ ఆ బాధ మళ్లీ మళ్లీ వెంటాడింది’ అని వేద తెలిపింది.

‘ఆ సమయంలో నా ట్విటర్‌ ఫీడ్‌ చూస్తే ఎంతోమంది ప్రజలు ఇబ్బందులు పడుతున్నట్టు అర్థమైంది. కష్టాలు ఎదురైనప్పుడు మానసికంగా బలంగా ఉండటం అవసరం. కొవిడ్‌తో చనిపోవడానికి ముందు మా అక్క వత్సల భయంతో గుండెపోట్లు తెచ్చుకుంది. మా అమ్మ కూడా భయపడే ఉంటుంది. ఆమె చనిపోవడానికి ముందురోజు రాత్రి మా ఇంట్లో పిల్లలు సహా అందరికీ కొవిడ్‌ సోకిన విషయం తెలుసుకుంది. అది కూడా ఆమెపై ప్రభావం చూపించివుండవచ్చు’ అని వేద పేర్కొంది.

ప్రస్తుతం క్రికెట్‌ ఆడుతున్న చాలామందికి మానసిక ఆరోగ్యం గురించి తెలుసని వేద తెలిపింది. ఒకవేళ వ్యవస్థ నుంచి సహకారం రాకపోయినా మానసిక నిపుణుల సహాయం తీసుకోవాలని సూచించింది. తాను ఇబ్బందులు పడ్డప్పుడు అలా సాయం తీసుకున్నట్టు వెల్లడించింది. కష్ట సమయంలో ఫోన్‌ చేయని వాళ్ల గురించి తాను పట్టించుకోవడం లేదని తెలిపింది. తనకు అండగా నిలిచిన వారికి ధన్యవాదాలు తెలియజేసింది. బీసీసీఐ కార్యదర్శి జే షా నుంచి ఫోన్‌కాల్‌ ఊహించలేదని, బెంగళూరుకు వచ్చినప్పుడు కలుస్తానని చెప్పారంది.



మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

ఇంటర్వ్యూ

మరిన్ని

కొత్త పాట గురూ

మరిన్ని