close
టాలీవుడ్‌
సరిహద్దుల్ని చెరిపేయగలమా?

పాన్‌ ఇండియా ఇమేజ్‌కి ఎంత దూరం?

మన ‘శంకరాభరణం’ మనకు మాత్రమే పరిమితం కాలేదు. తమిళంలో విడుదల చేస్తే ‘రొంబ సూపరో’ అన్నారు. మలయాళీలైతే ‘వలారే నల్లట్‌’ అంటూ నెత్తిమీద పెట్టుకున్నారు. విశేషం ఏమిటంటే... ఆయా భాషల్లో ఈ సినిమా తెలుగులోనే విడుదలైంది. కేరళలో భిక్షాటన చేసేవాళ్లు సైతం ‘శంకరా నాద శరీరాపరా’ అంటూ తెలుగులోనే పాటలు పాడుకున్నారు. ‘శంకరాభరణం’ అనే కాదు. గొప్ప సినిమా ఎప్పుడు ఎక్కడి నుంచి వచ్చినా, భాషతో సంబంధం లేకుండా ఆదరిస్తుంటారు. అర్థం కాకపోయినా ఇంగ్లిషు, కొరియన్‌ సినిమాల్ని సబ్‌ టైటిల్స్‌తో చూడటం లేదూ...? అలాగన్నమాట. సినిమాకు భాషతో పనిలేదు. భావోద్వేగాలే కీలకం. ‘బాహుబలి’ బాలీవుడ్‌లో రూ.100 కోట్లు రాబట్టిందంటే కారణం అదే. ‘కేజీఎఫ్‌’ పాతరికార్డుల్ని ‘ఉఫ్‌’మంటూ ఊదేసిందంటే దాని వెనుక రహస్యం అదే. ‘సాహో’ బాలీవుడ్‌లో జెండా పాతిందంటే సినిమాకున్న మ్యాజిక్‌ అదే. అయితే ‘శంకరాభరణం’లా తెలుగు సినిమాని తెలుగులోనే చూసి ఆదరించే రోజులు కావివి. ఓ సినిమాని అన్ని భాషల్లోనూ ఆదరించాలంటే దానికి ఓ ట్యాగ్‌ అవసరం. అదే... ‘పాన్‌ ఇండియా’.

పాన్‌ ఇండియా ఇమేజ్‌ వల్ల బడ్జెట్లు పెరుగుతాయి. నాణ్యమైన చిత్రాల్ని అందించే అవకాశం ఉంటుంది. ఓ కథని వేరే స్థాయిలో చూపించే సౌలభ్యం దక్కుతోంది. ‘సాహో’ కథపై ఈ స్థాయిలో ఖర్చు పెట్టామంటే కారణం అదే. అయితే అన్ని కథలూ అందుకు సరిపడవు. ఇది వరకు తెలుగు ప్రేక్షకులకు ఈ కథ  నచ్చుతుందా? అని ఆలోచించేవాళ్లం. ఇక మీదట మిగిలిన భాషా ప్రేక్షకుల    అభిరుచుల్నీ దృష్టిలో ఉంచుకుని కథలు ఎంచుకోవాలి.

- ప్రభాస్‌

మితాబ్‌ బచ్చన్‌ నుంచి ఆయుష్మాన్‌ ఖురానా వరకూ బాలీవుడ్‌లో ఎవరి సినిమా విడుదలైనా - తెలుగునాట మల్టీప్లెక్సులు నిండిపోతుంటాయి. స్టార్‌ హీరోల     సినిమాలకే కాదు.. బాలీవుడ్‌ ముద్ర వేసుకొచ్చిన ఏ మంచి చిత్రానికైనా తెలుగులో వసూళ్లు దక్కుతుంటాయి. హిందీ సినిమాలకున్న శక్తేమిటంటే అన్ని     భాషల్లోనూ దానికో మార్కెట్‌ ఉంది. అక్కడి తారలకు భారీ పారితోషికాలు అందుతున్నాయంటే, దర్శకులు రూ.కోట్ల కొద్దీ ఆర్జిస్తున్నారంటే దానికి కారణం... ఆ మార్కెట్టే. కానీ ప్రాంతీయ భాషా చిత్రాలు అలా కాదు. అవన్నీ ఆయా భాషలకే పరిమితం. మహా అయితే ఓ తెలుగు సినిమా తమిళంలోకి అనువాద రూపంలో వెళ్లొచ్చు. ఓ తమిళ సినిమా తెలుగులో డబ్బింగ్‌ బొమ్మగా రావొచ్చంతే. ‘బాహుబలి’ బాలీవుడ్‌కి వెళ్లే వరకూ తెలీలేదు..  అక్కడ రూ.100 కోట్లు రాబట్టే శక్తి తెలుగు సినిమాకి ఉందని.

అప్పట్లో చేశారు గానీ..
ఓ హిందీ సినిమా ‘పాన్‌ ఇండియా’ అనే  రెక్కలు కట్టుకుని దేశమంతా ఎగురుతున్నప్పుడు ప్రాంతీయ చిత్రాలు అలా చేయలేవా? హిందీ చిత్రాల్ని మనం ఆదరిస్తున్నట్టు, తెలుగు నుంచి వెళ్లిన చిత్రాల్ని వాళ్లు ఆదరించలేరా? ఈ ఆలోచన గత తరం కథానాయకులకు ఎప్పుడో వచ్చింది. కాకపోతే అప్పట్లో ‘పాన్‌ ఇండియా’ అనే మాటలు తెలీవంతే. చిరంజీవి, కమల్‌హాసన్‌, రజనీకాంత్‌, నాగార్జున లాంటి దక్షిణాది స్టార్లు బాలీవుడ్‌లో సినిమాలు చేశారు. కానీ వాళ్లని దక్షిణాది తారలుగానే బాలీవుడ్‌ చూసింది. ఈతరం కథానాయకులకు చాలాసార్లు బాలీవుడ్‌ ఆఫర్లు వచ్చాయి. మహేష్‌బాబుకి ఎప్పుడూ ‘బాలీవుడ్‌ సినిమా ఎప్పుడు?’ అనే ప్రశ్న ఎదురవుతుంటుంది. తను మాత్రం ‘నాకు తెలుగు సినిమానే ముఖ్యం’ అని చెబుతుంటారు. బాలీవుడ్‌లో ఓ సినిమా చేసి మెప్పించడం ఎంత కష్టమో మన హీరోలకు తెలుసు. అందుకే ఆచితూచి అడుగులేస్తుంటారు.

కథలో దమ్ముంటే..
దేశమంతా తెలుగు సినిమాకి ఇప్పుడు ద్వారాలు తెరచుకున్నాయి. కాకపోతే ఉత్తరాది ప్రేక్షకుల అభిరుచులకు తగినట్టుగా మన కథలో ఏముందన్న విషయాన్ని దృష్టిలో పెట్టుకోవాలి. ‘బాహుబలి’ ఓ జానపద కథ. అలాంటి కథలు బాలీవుడ్‌కి కొత్త. పైగా విజువల్‌గా బాలీవుడ్‌ని తలదన్నే సినిమా అది. ‘కేజీఎఫ్‌’ నేపథ్యం బాలీవుడ్‌కి కొత్తగా అనిపించింది. హీరోయిజానికి సరిహద్దులు ఉండవు. ఎక్కడైనా మాస్‌ హీరో అలానే ఉండాలి. అందుకే ‘కేజీఎఫ్‌’ అందరికీ నచ్చింది. ‘సాహో’లో యాక్షన్‌ సీక్వెన్సులు చూసి అంతా ఫిదా అయిపోయారు. రాబోయే ‘సైరా’లోనూ విజువల్‌ గ్రాండియర్‌   కనిపించనుంది. ఎన్టీఆర్‌-చరణ్‌ల ‘ఆర్‌ ఆర్‌ ఆర్‌’ పాన్‌ ఇండియా ట్యాగ్‌తోనే విడుదలవుతోంది. తెలుగుతో పాటు మలయాళంలోనూ క్రేజ్‌ ఉన్న అల్లు అర్జున్‌ సహా మిగిలిన హీరోలూ పాన్‌ ఇండియాపై దృష్టి పెడుతున్నారు. మునుముందు బాలీవుడ్‌లో తెలుగు సినిమా మరిన్ని ప్రకంపనాలు సృష్టిస్తే ఆశ్చర్యం లేదు.


తాజా వార్తలు

టాలీవుడ్‌

మరిన్ని

ఫోటోలు

హీరో మరిన్ని

హీరోయిన్ మరిన్ని

సినిమా స్టిల్స్ మరిన్ని

ఈవెంట్స్ మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.