‘తప్పులు చేశా.. నేర్చుకుంటున్నా‘

హైదరాబాద్‌: ‘యువ కథానాయకులతో నేను పోటీ పడుతున్నాను అన్నప్పుడు సంతోషంగా అనిపిస్తుంది’ అంటున్నారు అక్కినేని నాగార్జున. వయసు పెరుగుతున్న కొద్దీ నాగ్‌ ఇంకా యంగ్‌గా తయారౌతున్నారు. న్యూ జనరేషన్‌ కథతో ఆయన నటించిన సినిమా ‘మన్మథుడు 2’. రాహుల్‌ రవీంద్రన్‌ దర్శకుడు. రకుల్‌ ప్రీత్‌ సింగ్‌ కథానాయిక. లక్ష్మి, రావు రమేశ్‌, వెన్నెల కిశోర్‌ తదితరులు కీలక పాత్రలు పోషించారు. సమంత, కీర్తి సురేశ్‌ అతిథి పాత్రల్లో సందడి చేయనున్నారు. ఈ సినిమా ఆగస్టు 9న విడుదల కాబోతున్న నేపథ్యంలో నాగ్‌ మీడియాతో మాట్లాడారు. ఆ విశేషాలివి..

రొమాన్స్‌ కాదు..
‘ఫ్రెంచ్‌ సినిమాకు రీమేక్‌ ‘మన్మథుడు 2’. మొదటిసారి మాతృకను చూసినప్పుడు నచ్చింది. ఓ ప్రముఖ ఫ్రెంచ్‌ స్టార్‌ అందులో నటించారు. కథ చాలా ఫన్నీగా అనిపించింది. ఇది రొమాన్స్‌, ప్రేమ గురించి కాదు. ఓ మధ్య వయస్కుడు తన కుటుంబాన్ని కాదనలేక, తన అభిప్రాయాల్ని వదులుకోలేక ఏం చేశాడన్నదే కథ. అతడి జీవితంలోకి 25 ఏళ్ల అమ్మాయి వస్తే ఏం జరిగింది? అనేది ఆసక్తికరంగా ఉంటుంది’.

అతడికి తెలుసు
‘దర్శకుడిగా రాహుల్‌ తొలి సినిమా ‘చి.ల.సౌ’ చూశాను. అది చిన్న ప్రాజెక్టు, అయినా చక్కగా తీశాడు. ఆర్టిస్టులతో నటన ఎలా రాబట్టుకోవాలో అతడికి బాగా తెలుసు. ‘మన్మథుడు 2’ను అద్భుతంగా తెరకెక్కించాడు. ఓ తల్లి, ముగ్గురు సిస్టర్స్‌, ఓ బ్రదర్‌కు మధ్య ఉన్న బంధాన్ని చాలా బాగా చూపించాడు. మొదట నేను రీమేక్‌ అనగానే అతడు సమ్మతించలేదు. సినిమా చూసిన తర్వాత అన్నీ కుదిరాయి. పోర్చుగల్‌లో సాగే కథ ఇది. ‘నిన్నే పెళ్లాడతా’ తర్వాత లక్ష్మి నా తల్లి పాత్రలో నటించారు. ఆమె పాత్ర చాలా ముఖ్యం. ‘అన్నమయ్య’ తర్వాత ఈ సినిమా కోసం నేను స్వచ్ఛమైన తెలుగు మాట్లాడాను. గత ఆరు రోజులుగా ఈ సినిమా చూస్తున్నా. కుటుంబం మొత్తం కలిసి చూసేలా ఉంది. వినోదాత్మకంగా రూపొందించాం. ఇకపై కూడా న్యూ జనరేషన్‌ కథల్నే చేయాలి. లేకపోతే జనాలు చూడరు, మానేశారు (నవ్వుతూ)’.

‘ఆర్‌.ఎక్స్‌ 100’ నచ్చింది
‘ఇటీవల వచ్చిన కార్తికేయ ‘ఆర్‌.ఎక్స్‌ 100’ సినిమాను చూశాను. నాకు సినిమా బాగా నచ్చింది. సంగీతం కూడా చక్కగా అనిపించింది. చైతన్‌ భరద్వాజ్‌ను పిలిపించాను. నాకు నీ పాటలు ఎంతో నచ్చాయని మెచ్చుకున్నా. ‘మన్మథుడు 2’ కోసం అతడ్నే తీసుకున్నా. కొత్త వారితో కలిసి పనిచేయడానికి నేను ముందుంటాను. వారితో పనిచేసినప్పుడు నాలోని కొత్తదనం బయటికి వస్తుంటుంది. అంతేకాదు అది సినిమాలోనూ కనిపిస్తుంది’.

తప్పులు చేశా
‘నాకు సీరియస్‌గా సాగే సినిమాలు చూడటం ఇష్టం లేదు. బాధతో కన్నీరు పెట్టుకోవడం నచ్చదు. ఫన్నీగా నవ్వుకుంటూ ఉంటే సినిమాలు చూసేందుకు ఇష్టపడతాను. ‘శివ’, ‘అన్నమయ్య’ తదితర చిత్రాల్లోని నా పాత్రలు స్ఫూర్తిదాయకంగా ఉంటాయి. నా కెరీర్‌లో కొన్ని పాత్రల ఎంపిక విషయంలో తప్పులు కూడా చేశాను. వాటి నుంచి చాలా నేర్చుకున్నా’.

వర్క్‌ కాలేదు
‘ద్విభాషా సినిమాలు ఎక్కువగా ప్రేక్షకాదరణ పొందలేవు. నేను నాలుగు సినిమాలు అలానే చేశాను. తెలుగులో హిట్‌ అందుకున్న ‘గీతాంజలి’, ‘శివ’, ‘ఊపిరి’ సినిమాలు తమిళంలో ఆదరణ పొందలేదు. రెండు రాష్ట్రాల మధ్య కల్చర్ చాలా విభిన్నంగా ఉంటుంది. నా సినిమాల నుంచి నేను పాఠాలు నేర్చుకున్నా. నా మార్కెట్‌ పెంచుకోవాలని నాకూ ఉంది. కానీ అది వర్క్‌ కాలేదు. ’

‘బిగ్‌బాస్‌’ను ఎంజాయ్‌ చేస్తున్నా
‘ధనుష్‌తో నా తమిళ సినిమా రద్దయ్యింది. ఆ ప్రాజెక్టునే పూర్తిగా ఆపేశారు. దాదాపు 35 రోజులు షూట్‌ కూడా చేశారు. ఆ తర్వాత ఏమైందో తెలియదు. నేను షాక్‌ అయ్యా. ఇప్పుడు హిందీలో ‘బ్రహ్మాస్త్ర’ చిత్రంలో నటిస్తున్నా. ఇది చాలా గొప్ప సినిమా. ప్రతి పాత్ర అద్భుతంగా ఉంటుంది. అందుకే నటిస్తున్నా. ఇంకా షూటింగ్‌ జరుగుతోంది. అలాగే ‘బిగ్‌బాస్‌’కు వ్యాఖ్యాతగా వ్యవహరిస్తున్నా. హౌస్‌లోని వ్యక్తులు రోజురోజుకీ మారిపోతున్నారు. ఈ రోజు ఒకలా ఉంటే.. రేపు మరోలా ఉంటున్నారు (నవ్వుతూ). ఈ షోకు కూడా పాపులారిటీ పెరిగిపోతోంది. షూట్‌ను చాలా ఎంజాయ్‌ చేస్తున్నా’.

రకుల్‌తో వివాదమైందని..
‘రకుల్‌ ఎంతో నైపుణ్యం ఉన్న నటి. ‘మన్మథుడు 2’లోనేకాదు.. వేరే సినిమాల్లోనూ ఆమె నటన అద్భుతం. తెలుగు కూడా బాగా నేర్చుకుంది. అదే తనకు సినిమాలపై ఉన్న ఆసక్తిని చెబుతోంది. మా ఇద్దరి మధ్య వివాదాలు వచ్చాయని వదంతులు వచ్చాయి. తను చూడటానికి బాగోలేదని నేను చెప్పానట (ఆశ్చర్యంగా). కానీ.. ‘రకుల్‌లా ఆరోగ్యంగా ఉండాలి, అంత హెల్తీగా ఉండే అమ్మాయిని నేను ఇంతవరకూ చూడలేదు’ అని నేను అందరికీ చెబుతుంటా. ఈ సినిమాలో సమంత, కీర్తి సురేశ్‌ అతిథి పాత్రల్లో కొద్దిసేపు మాత్రమే కనిపిస్తారు’ అని నాగ్‌ అన్నారు.

అనంతరం ఓ విలేకరి ‘యువ నటులకు మీరు పోటీ అవుతున్నారు?’ అని ప్రశ్నించగా.. ‘అలాంటి మాటలు విన్నప్పుడు సంతోషంగా అనిపిస్తుంది (నవ్వుతూ) అని ఆయన పేర్కొన్నారు.