తెలంగాణ గడీల్లో దొరలు, దొరసానుల చెప్పుచేతల్లో బతికే స్త్రీల విషాదగాథలకు నిలువుటద్దం బి.నరసింగరావు తీసిన ‘దాసి’ (1988) చిత్రం. అప్పటికే ‘మా భూమి’ (1980), ‘రంగుల కల’ (1984) చిత్రాల ద్వారా తనకంటూ ఒక శైలిని, తెలుగు చిత్రాలకు జాతీయ స్థాయి గౌరవాన్నీ  సంపాదించిన నేపథ్యంతో నర్సింగరావు నిర్మించిన ‘దాసి’ తెలుగు వారి ఖ్యాతిని అంతర్జాతీయ స్థాయికి తీసుకు వెళ్లింది. ఒక పాత్రికేయుడు ఆయనతో జరిపిన ముఖాముఖీ ‘దాసి’ కథకు పునాదులు వేసిందట. ఆ పాత్రికేయుడు గతంలో పాలమూరు ప్రాంతంలోని ఓ సంస్థానానికి వెళ్లినప్పుడు ఓ అందమైన అమ్మాయి వచ్చి ఆయన కాళ్లు కడగబోయిందట. అందుకు ఆయన తిరస్కరించగా ఆ మహిళ ఆశ్చర్యపోతూ అన్న మాటల్ని పాత్రికేయుడి నోటి ద్వారా విన్న నరసింగరావు తీవ్రంగా ఆలోచించారట. ఆ ఆలోచనలు ఓ అద్భుతమైన సృజనకు బీజాలు వేసి, జాతీయ, అంతర్జాతీయ స్థాయికి చెందిన ప్రతిభావంతుల ప్రశంసలను అందుకునే దిశగా ఆయనను నడిపించాయి. దొరల గడీల్లో దాసీల ఉదంతాల్ని తన తల్లి గారిని అడిగి తెలుసుకోడంతో పాటు తెలంగాణ ప్రాంతంలోని వివిధ జిల్లాలు పర్యటించి, కథకు అవసరమైన 1920-40 సంవత్సరాల నాటి నేపథ్య సమాచారాన్ని విస్తృతంగా సేకరించి, ఓ అద్భుతాన్ని సృష్టించారాయన.